Acakki 15 - Acoli Baibul

Lubaŋa omoko gicikkene ki Abram

¹ I ŋe lok meno ducu, lok pa Rwot dok obino bot Abram i ginanyuta, ni, “Pe ilwor, Abram, an a kwotti, abimiyi mot madit twatwal.”

² Ento Abram ogamo ni, “Ai Rwot Lubaŋa, ibimiya mono gin aŋo? Pud abedo laboŋo latin mo en do, ki Lale oda bene Eliejer Ladamaciko-ni do.”

³ Abram dok owacci, “Nen, in peya imiya nyodo mo; latin opii ma i oda bibedo Laleyo.”

⁴ Ci dok nen, lok pa Rwot obino bote ni, “Dano man pe bibedo Lale ka tyeni; wodi kikome aye bileyo ka tyeni.”

⁵ Ci okele woko, ka owacce ni “Nen malo i polo, kwan wel Lakalatwe, ka itwero kwano welgi.” Dok owacce ni. “Kit meno wel likwayi bene bibedo rom meno.”

⁶ Ci en oye lok pa Rwot; ci gikwane ni en dano ma kite atir.

⁷ Dok owacce ni, “An a Rwot ma akeli nia ki i Ur ma gaŋ pa jo Kaldaya, pi mini lobo-ni wek obed meri.”

⁸ En ogamo ni, “Ai Rwot Lubaŋa, man abiŋeyo niŋŋiŋ ni lobo-ni bibedo mera?”

⁹ Owacce ni, “Kella latin roya mo me mwaka adek, ki bwoŋ dyel me mwaka adek, ki nyok romo me mwaka adek, ki amam, ki latin akuri.”

¹⁰ Ci okelo bote lwak gin meno ducu, ci onuno igi ari aryo aryo, ka opyelogi ma gukemme ki luwotgi; pe oŋuno i winyo aryo.

¹¹ Ka acut bino ka camo rinogi, ci Abram ryemogi woko.

¹² I kare ma ceŋ doŋ mito poto woko, ci nino madwoŋ omako waŋ Abram; nen, ka piny ocako yutte woko macol licuc.

¹³ Rwot owaco ki Abram ni, “Ŋe atir ni, likwayi gibidoko lubedo i lobo ma pe megi, dok gibibedo opii kunnu, gibibwoyogi ki tek mwaka miya aŋwen;

¹⁴ ento abiŋolo kop i kom rok ma biloyogi-ni, lacen gibiwiro, gidwogo kany ki lwak lim madwoŋ.

¹⁵ Ki tuŋ boti in kikomi, ibicito bot kwarowu ki kuc; gibiyiki ma noŋo doŋ iti likoŋ,

¹⁶ Dok gibidwogo kany i kare me likwayo ma i yalwak me aŋwen; pien bal pa jo Amor oromo.”

¹⁷ Ka ceŋ doŋ opoto, ma piny doŋ odoko col, nen, agulu ma duny yito, ki mac raa ma lyel, owok i dye riŋo ma giŋuno-ni.

¹⁸ I nino meno aye Rwot oketo iye gicikkene ki Abram, kun wacci, “Amiyo lobo man bot likwayi, nia wa i kulu me Ejipt nio wa i kulu madit, en ku lu Euprate,

¹⁹ lobo pa jo Keni, jo Keniji, jo Kadmon

²⁰ jo Kit jo Periji, jo Repa,

²¹ jo Amor, jo Kanaan jo Girgac ki jo Jebuc.”