Acakki 13 - Acoli Baibul

Abram ki Lot gupokke woko

¹ Kit meno Abram odwogo woko ki i Ejipt, en ki dakone, ki lwak jami ducu ma yam tye bote, kacel ki Lot, ci gutiro i Negeb.

² I kare meno onoŋo Abram odoko lalonyo dyaŋ mada, ki lim me ryal, ki jabu-gu.

³ Okobo, omedde ki wotte nia ki i Negeb, odak wa Betel, ka ma yam koŋ okwono guro iye kemane, ma tye i kin Betel ki Ai,

⁴ i kabedo ma yam okwoŋo caŋo iye keno tyer; ki kunnu aye dok Abram olwoŋo iye nyiŋ Rwot.

⁵ Ki Lot ma yam onywako wot ki Abram, ceŋ tye ki romi ki dyani-gu ki kema bene.

⁶ Lobo onoŋo doŋ pe romo ka kwat pi gin aryo ducu; pien onoŋo gin ducu ciŋgi ki lim madwoŋ, ma pe romogi bedo kacel.

⁷ Onoŋo mone doŋ tye i kin lukwa lim pa Abram ki lukwa lim pa Lot. I kare meno onoŋo jo Kanaan ki jo Periji aye gibedo i lobo meno.

⁸ Abram ocako waco ki Lot ni, “Pe wawek mone obed i kin in ki an, ki i kin lukwa limmi ki lukwa limma, pien wan ot acel.

⁹ Lobo man ducu pe ineno i nyimi ene? Ber ipokke giri woko keni ki i koma. Ka ibidok tuŋ acam, ci an abidok gira tuŋ acuc: ce ka in idok tun acuc, ci an abidok gira tuŋ acam.”

¹⁰ Ci Lot ocako tiŋo waŋe malo, ka oneno nota Jordan ducu ma iye ki pii macalo poto pa Rwot, rom ki lobo Ejipt mudok yo tuŋ Joar; man yam otimme i kare ma Rwot peya ojwero Codom ki Gomora.

¹¹ Pienno Lot oyero gire pire kene lobo ducu ma yam tye i nota Jordan, ci Lot ocako dak yo tuŋ wokceŋ: kit meno gupokke woko kekengi.

¹² Abram obedo mere i lobo Kanaan, kun Lot kono bedo mere i kin gaŋi ma gitye i nota, ocako dak ki kemane nio wa Codom.

¹³ Jo ma i Codom onoŋo jo maraco, balgi dwoŋ twatwal i nyim Rwot.

¹⁴ Rwot oloko ki Abram ma doŋ onoŋo gutyeko pokke woko ki Lot ni, “Tiŋ waŋi malo, nen piny nia ki i kabedo ma it ye iye-ni, nen tuŋ acam ki tuŋ acuc, ki tuŋ wokceŋ ki tuŋ potoceŋ;

¹⁵ pien lobo meno ducu ma ineno-ni abimiyone boti ki bot likwayi matwal.

¹⁶ Abimiyo likwayi bedo pol ma rom ki apwa me ŋom; mumiyo ka ŋatti mo twero kwano wel apwa me ŋom, ci likwayi welgi bikwanne.

¹⁷ Doŋ ia malo, iwot i dye lobo-ni, wek inen borre ki lacce, pien abimiyo boti.”

¹⁸ Kit meno Abram okobo kemane, odak, obedo i te kworo me Mamre, ma tye i Kebron; dok ocano keno tyer pi Rwot kunnu.