Acakki 12 - Acoli Baibul

Lubaŋa olwogo Abram

¹ Rwot owaco bot Abram ni, “A woko ki i lobo tuwu, ki i kakawu, ki i paco pa woru, ci icit i lobo ma abinyutti.

² Abimiyi idoko rok madit, abimiyi gum bene, abimiyo nyiŋi bedo dit, pien ibibedo lakelgum.

³ Abimiyo gum i kom jo ma leggi gum, abiceno ŋat mo ma biceni; dok piri en aye kaka ducu ma wi lobo bilimo iye gumgi.”

⁴ Kit meno Abram ocako wot, macalo Rwot ocike; ki Lot bene owoto kacel kwede. Abram onoŋo doŋ tye ki mwaka me ditte pyerabiro wiye abic i kare ma en a kwede ki i Karan.

⁵ Abram ocito ki dakone Carai, ki Lot latin pa ominne, ki lwak limgi ducu ma gucoko kacel, ki lwak jo ducu ma gucokke botgi ki i Karan; gutiŋo wot me cito i lobo Kanaan, Ka doŋ gutyeko o i lobo Kanaan,

⁶ Abram obaro dye lobo obino i kabedo ma i Cekem, nio wa i te yat kworo me More. I kare meno onoŋo jo Kanaan aye gitye i lobo meno.

⁷ Ci Rwot dok onen bot Abram kun wacce ni, “Abimiyo lobo man bot likwayi.” Ocano keno tyer kunnu pi Rwot ma onen bote-ni,

⁸ Ka dok odak woko ki kunnu, okobo i te got ma tye yo tuŋ wokceŋ me Betel, oguro iye kemane, kun weko Betel yo tuŋ potoceŋ, ki Ai yo tuŋ wokceŋ; dok ocano keno tyer pi Rwot kunnu, ci olwoŋo iye nyiŋ Rwot.

⁹ Abram dok okobo, omedde ki wotte yo tuŋ Negeb.

Abram i lobo Ejipt

¹⁰ Kec onoŋo opoto i lobo, omiyo Abram owoto piny i Ejipt, wek koŋ ebed kunnu, pien kec onoŋo doŋ lyet twatwal i lobo.

¹¹ I kare ma cok donyo i Ejipt, owaco bot dakone Carai ni, “Aŋeyo ni in i dako ma nen mwonya;

¹² ka Luejipt gibineni, ci gibiwacci, ‘Man dakone’; ci gibineka woko, ento gibiweki makwo.

¹³ Wac ni, in lamera, ci gibibedo kweda maber piri, miyo abikwo piri.”

¹⁴ Ka Abram otyeko donyo i Ejipt, ci Luejipt guneno dako meno mwonya matek twatwal,

¹⁵ Ka ludito ma i kal pa Parao guneno, ci guboro pire bote, gutero dako wa i ot pa Parao.

¹⁶ Ci omiyo Parao obedo maber ki Abram pi Carai: gikolle lim, romi, ki twoni; twoni kana, lwak opii ki aŋeca-gu, megi kana-gu, ki lwak kinaga-gu,

¹⁷ Ento Rwot ocwalo cog two gemo mogo madoŋo i kom Parao ki jo ma i ode, pi Carai dako pa Abram.

¹⁸ Omiyo Parao olwoŋo Abram bote, ci openye ni, “Itima kuman piŋo? Piŋo nene pe ititta atir ni en dakoni?

¹⁹ Piŋo dok iwaco ni, ‘En lamera,’ omiya akwanyo, odoko dakona? Nen doŋ, dakoni ennu. Kwany icit kwede giri.”

²⁰ Parao ociko jone pire, ci gulwoke iyo, kacel ki dakone, ki lwak jami ducu ma yam tye bote.