Acakki 10 - Acoli Baibul

Likwayo pa litino awobe pa Nua

¹ Man aye tekwaro pa litino awobe pa Nua, Cem, Kam ki Yafeci. Gunywalo litino awobe i ŋe kare ma pii aluka ocorre i wi lobo.

² Litino awobe pa Yafeci aye Gomer, Magog, Madai, Javan, Tubal, Mecek ki Tirac.

³ Litino awobe pa Gomer aye Acikenaj, Ripat ki Togarma.

⁴ Litino awobe pa Javan aye Elica, Tarcic, Kitim ki Dodanim.

⁵ Jo ma i dog nam guket ki i kom jo meno. Magi aye litino awobe pa Yafeci ki lobogi, kun ŋat acel acel loko leb tugi, macalo kakagi ki rokgi tye kwede.

⁶ Magi aye litino awobe pa Kam: Kuc, Ejipt, Put ki Kanaan.

⁷ Litino awobe pa Kuc aye Seba, Kavila, Cabta, Raama ki Cabteka. Litino awobe pa Raama aye Ceba ki Dedan.

⁸ Kuc onywalo mere Nimulodi; en aye dano ma okwoŋo bedo oteka i wi lobo.

⁹ En obedo ladwar oken i nyim ‘Rwot; mumiyo giwacci, “Calo Nimulodi ma ladwar oken i nyim Rwot-ti.”

¹⁰ Acakki kerre onoŋo Babel, Erek, Akkad ki Kalne; gin ducu gibedo i lobo Cinar.

¹¹ Nia i lobo meno kerre omedde, ocito oo wa i Aciria, ci ogero iye Nineve, Rekobot-Ir, Kala,

¹² ki Recen ma i kin Nineve ki Kala; meno aye gaŋ madit.

¹³ Ejipt onywalo jo Lud, jo Anam, jo Leab, jo Naptuk,

¹⁴ jo Patruc ki jo Kaptor, ma en aye kaka ma jo Piliciti gua ki i komgi.

¹⁵ Kanaan onywalo Cidon latin kayone, ki Ket,

¹⁶ jo Jebuc, jo Amor, jo Girgac,

¹⁷ jo Kiv, jo Arki, jo Cin,

¹⁸ jo Arvad, jo Jemar ki jo Kamat. Lacen kaka pa jo Kanaan gucako ket woko ata.

¹⁹ Waŋ lobo pa jo Kanaan ocakke ki i Cidon odok kwede i yo tuŋ Gerar, nio kwede wa Gaja; ka odok yo tuŋ Codom ki Gomora ki Adma ki Jeboim, nio kwede wa Laca.

²⁰ Magi aye litino awobe pa Kam, macalo kakagi, ki lebgi, ki lobogi, ki rokgi tye kwede.

²¹ Cem, omin Yafeci maditte, en aye kwaro litino pa Eber ducu, en bene onywalo litino.

²² Litino awobe pa Cem aye Elam, Acur, Arpakcad, Lud ki Aram,

²³ Litino awobe pa Aram gin aye Uj, Kul, Geter ki Mac.

²⁴ Arpakcad onywalo Cela, Cela onywalo Eber.

²⁵ Eber onywalo litino awobe aryo; nyiŋ ŋat acel onoŋo Peleg, pien i kare mere aye gipoko iye lobo, ki nyiŋ ominne onoŋo Yokotan.

²⁶ Yokotan onywalo Almodad, Celep, Kajarmavet, Jera,

²⁷ Adoram, Ujal, Dikla

²⁸ Obal, Abimael, Ceba,

²⁹ Opir, Kavila ki Jobab; magi gin ducu litino awobe pa Yokotan.

³⁰ Lobo ma gubedo iye wane ocakke ki i Meca, odok kwede yo tuŋ Cepar nio kwede wa lobo godi ma tuŋ wokceŋ.

³¹ Magi aye litino awobe pa Cem, macalo kakagi, lebgi, lobogi, ki rokgi tye kwede.

³² Man aye kaka pa litino awobe pa Nua, kit ma tekwarogi tye kwede, i rokgi; rok ocako ket nia ki i komgi oromo lobo, cakke i ŋe kare ma pii aluka ocorre i wi lobo.