Acakki 1 - Acoli Baibul

Lubaŋa oketo lobo ki dano

¹ I acakki piny Lubaŋa oketo polo ki lobo.

² Lobo onoŋo tye nono, onyobbe woko atata piny macol ocido wi kut matut, kun Cwiny pa Lubaŋa twago wi pii.

³ Lubaŋa owacci, “Wek leŋo obed tye”; ci piny obedo leŋ.

⁴ Lubaŋa oneno leŋo ni ber; Lubaŋa opoko kin leŋo ki colpiny.

⁵ Lubaŋa olwoŋo leŋo ni Dyeceŋ, ki colpiny olwoŋo ni Dyewor. Piny oyuto dok piny oru, meno nino acel.

⁶ Lubaŋa owacci, “Wek pete orine i kin pii, me poko kin pii ki pii wadi.”

⁷ Ci Lubaŋa otiyo pete me poko pii ma tye piny i te pete ki pii ma tye malo i wi pete; ci otimme kit meno.

⁸ Lubaŋa olwoŋo dan pete ni polo, Piny oyuto dok piny oru, meno nino me aryone.

⁹ Lubaŋa owacci, “Wek pii ma tye i te polo ocokke, ogurre i kabedo acel, wek piny mutwo onen”; ci otimme kit meno.

¹⁰ Lubaŋa olwoŋo piny mutwo ni Lobo, ki pii ma ocokke, ogurre kacel-li ni Nam; ci Lubaŋa oneno ni ber.

¹¹ Lubaŋa owacci, “Wek lum otwi i wi lobo, ki ginapita ma nyako nyiggi, ki yadi ma nyako nyiggi ma kodi tye i igi, macalo kit kwagi tye, i wi lobo”; ci otimme kit meno.

¹² Lum ocako twi i wi lobo, ki ginapita ma nyako nyiggi i kit kwagi acel acel, ki yadi ma nyako nyiggi ma kodi tye i igi, macalo kit kwagi tye. Ci Lubaŋa oneno ni ber.

¹³ Piny oyuto dok piny oru, meno nino me adekke.

¹⁴ Lubaŋa owacci, “Wek gin ma ryeny obed i kom pete me polo me poko dyeceŋ ki dyewor, ki me bedo ginanena ma nyuto kare ki nino ki mwaka,

¹⁵ wek gubed gin ma ryeny i kom pete me polo ma menyo lobo”; ci otimme kit meno.

¹⁶ Lubaŋa oketo gin madito aryo ma giryeny, wek ma ryeny madit-te aye olo dyeceŋ, ki ma ryeny matidine olo dyewor; dok oketo lwak lakalatwe bene.

¹⁷ Lubaŋa oketogi i kom pete me polo me menyo lobo,

¹⁸ me loyo dyeceŋ ki dyewor, ki me poko kin leŋo ki colpiny. Ci Lubaŋa oneno ni ber.

¹⁹ Piny oyuto dok piny oru, meno nino me aŋwenne.

²⁰ Lubaŋa owacci, “Wek pii onywal gin makwo ma gicorre limuk, ki winyo bene gutuk lamalo i wi lobo i dan pete me polo.”

²¹ Lubaŋa oketo nyaŋ madoŋo i nam, ki kwa gin makwo ducu ma gimol, ma gicorre limuk i pii, macalo kit kwagi tye, ki winyo ma gituk ki bwomgi, macalo kit kwagi tye. Ci Lubaŋa oneno ni ber.

²² Lubaŋa omiyogi gum kun wacci, “Wunywal, wunya, wupoŋ pii ki nami, winyo bene gunya i wi lobo.”

²³ Piny oyuto dok piny oru, meno nino me abicce.

²⁴ Lubaŋa owacci, “Wek lobo onywal gin makwo i kit kwagi: lee ma paco, ki gin ma lak alaka, ki lee me tim macalo kit kwagi tye”; ci otimme kit meno.

²⁵ Lubaŋa oketo lee tim macalo kit kwagi tye, ki lee ma paco macalo kit kwagi tye, ki gin ma lak alaka piny i ŋom, macalo kit kwagi tye, Ci Lubaŋa oneno ni ber.

²⁶ Lubaŋa owacci, “Weku wacweyu dano ma gical ki wan; wek gin aye gulo rec ma i nam, ki winyo me polo, ki lee ma paco, ki wi lobo ducu, gulo bene gin ducu ma lak alaka wi lobo,”

²⁷ Lubaŋa ocweyo dano i Kit calle kikome; ocweyo laco ki dako.

²⁸ Lubaŋa omiyogi gum kun wacogi ni, “Wunywal, wunya, wupoŋ lobo, wulo bene; dok wulo wa rec ma i nam, ki winyo me polo, ki gin ducu makwo ma giwoto i wi lobo.”

²⁹ Lubaŋa owacci, “Nenu, amiyowu ginapita ducu ma nyako nyiggi ma tye i wi lobo ducu, ki yadi ducu ma nyako nyiggi fila kodi tye i igi; wubicamogi.

³⁰ Dok lee ducu me tim, ki winyo ducu me polo, ki gin ducu ma lak alaka wi lobo, ma gitye ki kwo, amiyo botgi ginapita ducu madyak me bedo camgi”; ci otimme kit meno.

³¹ Lubaŋa oneno gin ma doŋ otiyo ducu, ci nen, tye mabeco twatwal. Piny oyuto dok piny oru, meno nino me abicelle.