2 Tekwaro 9 - Acoli Baibul

Kabaka ma dako me lobo Ceba olimo Solomon

¹ I kare ma kabaka ma dako me lobo Ceba owinyo pi yweka pa Solomon, en obino bote i Jerucalem ka temo iye ki peny matego, Obino ki lwak jo madito mapol ma gicom i kore, kacel ki lwak kinaga-gu ma giyweyo aŋwece, ki jabu madwoŋ twatwal, ki litino godi me wel-gu. Ka obino bot Solomon, ci ocako titte lok ducu ma onoŋo tye i cwinye.

² Solomon odok iye i pennye ducu; pe onoŋo tye lok mo wacel ma okanne ki bot Solomon ma pe romo tucone bot dako-nu,

³ Ka kabaka ma dako me Ceba oneno ryeko pa Solomon ducu, ki ot ma en ogero,

⁴ ki cam ma i wi mejane, ki kit kabedo pa luditone, ki tic pa luticce, ki boŋŋime arukagi, ki lutin kikopo-gu, ci tam otum woko ki i cwinye.

⁵ Owaco bot kabaka ni, “Lok ducu ma i komi ma yam gitero bota ki i lobona, ki lok i kom ryekoni bene, onoŋo lokke tye kakare,

⁶ ento yam pe aye lok ma gitero bota ducu, nio ka abino aneno ki waŋa. Ci nen, kadi wa nucu ryekoni maditte onoŋo pe gititta kulu, pien ryekoni ki lonyoni kato lok dog ma giterra awinyo-ni.

⁷ Monni gitye ki yomcwiny kuman! Luticci magi ducu gitye ki yomcwiny ma rom mene, ma gibedo ka cuŋ i nyimi jwijwi ka winyo lok me ryekoni!

⁸ Gipwo Rwot Lubaŋani ma cwinye opwoyo in ci oketi i wi komker me bedo kabaka pi Rwot Lubaŋani! Pien Lubaŋani omaro jo Icrael matwal, dok omito mokogi gubed matek, en aye omiyo en oketi ibedo kabaka ma loyogi, wek ibed ka ŋolo kop atir dok kakare.”

⁹ En omiyo bot Solomon jabu madwoŋ ma romo talanta miya acel ki pyeraryo, ki lwak aŋwece mapatpat madwoŋ twatwal, ki lwak litino godi me wel, I kare ca onoŋo pe tye aŋwece mukene macalo meno ma kabaka me Ceba omiyo bot Solomon-ni.

¹⁰ Ka dok lutic pa Kuram ki lutic pa Solomon ma onoŋo gukelo jabu nia ki i Opir, gukelo wa ki bao yat algum ki lwak godi matino me wel.

¹¹ Kabaka otiyo ki bao yat algum pi jeŋo kor ot pa Rwot ki kor ot pa kabaka. Otiyo kwede opuk bene ki nana pa luwer. Kit jami macalo meno onoŋo peya yam onen kulu i lobo Juda.

¹² Kabaka Solomon omiyo bot kabaka ma dako me Ceba jami ducu ma cwinye omito, omiye gin ducu ma openyo, ma pe giribo iye jami ma onoŋo en okelo bot kabaka. Kit meno kabaka me Ceba ocako wot me dok wa i lobone kikome, kacel ki luticce ducu.

Lonyo pa Solomon ki ywekane

¹³ Lwak jabu ma obino bot Solomon i mwaka acel acel pekke oromo talanta miya abicel ki pyerabicel wiye abicel

¹⁴ ma pe giribo iye ma lucat-wil gukelo; luker pa jo Arabia, ki ludito ma loyo lobo bene gukelo jabu ki ryal bot Solomon.

¹⁵ Kabaka Solomon otiyo lwak kwodi madoŋo miya aryo me jabu, ma gitetogi ki nyol; i kom kwot acel acel odonyo iye jabu ma pekke romo cekel miya abicel.

¹⁶ Dok otiyo kwodi matinone miya adek me jabu ma gitetogi ki nyol, kun kwot acel acel giteto ki jabu ma pekke cok romo ratili apar, Kabaka oketogi i ot ma gilwoŋo ni, Buŋa me Lebanon.

¹⁷ Kabaka dok otiyo komker madit me lak lyec, ci omwono kome woko ki jabu ma giliyo maber.

¹⁸ Komker meno onoŋo tye ki rwomme abicel ki kom me jabu me teno tyen, ma gikubogi i kom komker. Ka ŋete tuŋŋi ki tuŋŋi giketo iye ka teno ciŋ dano, ki labwor aryo gucuŋ ka ŋet bad kom me teno ciŋ,

¹⁹ kun tye bene lwak labwor apar wiye aryo ma gucuŋ i agikki rwom abicel-li, tuŋŋi ki tuŋŋi. Pe tye kom mo ma gitiyo ma cal ki meno i te ker ducu.

²⁰ Jami ducu ma yam kabaka Solomon mato kwede onoŋo me jabu keken, wa jami ducu ma gitiyo kwedgi i ot Buŋa me Lebanon yam gitiyogi ki jabu ma giliyo maber; i kare pa Solomon pe tye ŋatti mo ma tamo pi ryal.

²¹ Onoŋo kabaka tye ki lwak mel ma giwoto Tarcic kacel ki mel pa Kuram, Mel me Tarcic yam dwogo cen ka mwaka okato adek adek kun gikelo lwak jabu ki ryal ki lak lyec-gu, ki ayom-gu ki gunya-gu.

²² Kabaka Solomon obedo dit makato lwak luker ma wi lobo ducu pi lonyone ki pi ryekone.

²³ Lwak luker ducu me wi lobo gubedo ka yenyo kit yo me neno waŋ Solomon ki pi winyo kit ryekone-gu ma Lubaŋa oketo i cwinyeni,

²⁴ Dano acel acel yam tero motte bote, kun gitero jami me ryal ki me jabu-gu, ki ginaruka-gu, ki odok murra, ki aŋwece, ki aguragura-gu, ki kana-gu, mwaka ki mwaka,

²⁵ Solomon tye ki loc aguragura alip aŋwen pi aguragura ki gadigadi lwennye, ki lulweny ma giriŋo ki aguragura alip apar wiye aryo, En yam oketo mogo i gaŋi me gadigadi lweny ki mukene gubedo bot kabaka i Jerucalem.

²⁶ En oloyo luker ducu cakke wa i kulu Euprate nio kwede i lobo pa jo Piliciti, ki i wan lobo me Ejipt.

²⁷ Kabaka yam omiyo ryal odoko gin ma lam ma rom ki gweŋ-gu i Jerucalem, dok okelo yadi cedar mapol ata ma rom ki olam ma i bar Cepela.

²⁸ Solomon yam limo aguragura ma a ki i Ejipt ki i lobo ducu.

To pa Solomon

²⁹ Lok kom Solomon mudoŋŋe ducu, nia i acakki nio i agikkine, gityeko coyone i buk me Tekwaro ma lanebi Natan ocoyo, ki i kin lok pa Lubaŋa ma Akija ma jo Cilo otito, ka dok i buk me lok kom gin ma Iddo ma lanen oneno ma okemo kom Jeroboam wod pa Nebat.

³⁰ Kare ma Solomon oloyo kwede jo Icrael kun bedo i Jerucalem oromo mwaka pyeraŋwen,

³¹ Solomon oto ci oywe kacel ki kwarine, ka giyike i gaŋ kai pa wonne Daudi. Rekoboam ma wode aye oleyo ka tyene.