2 Tekwaro 6 - Acoli Baibul

Kwero ot pa Lubaŋa pi tic maleŋ

¹ I nino meno Solomon owacci, “Rwot otyeko wacci en ebibedo i pol macollicuc.

² Agerri doŋ ot ma ocudo malo, wek obed kabedoni ma ibedo iye matwal.”

³ Ka dok kabaka olokke, ci olamo gum i kom lwak jo Icrael ma gucokke ducu, kun jo Icrael ma gucokke-ni gucuŋ mot.

⁴ En ocako lamo gum ni, “Gipwo Rwot, Lubaŋa pa Icrael, ma doŋ cine otyeko cobo gin ma “am oloko ki doge bot wora Daudi-ni, kun wacci,

⁵ ‘Nia wa i kare ma akwanyo ki jona jo Icrael ki i Ejipt, peya ayero gaŋ mo ma i kaka ma i Icrael pi gero iye ot mo, wek nyina obed iye. Dok pe ayero laker mo me loyo jona jo Icrael;

⁶ ento doŋ atyeko yero Jerucalem wek nyina obed kenyo, ka dok ayero Daudi me bedo lalo lwakka jo Icrael.’

⁷ I kare-nu onoŋo wora Daudi obedo ki tam i cwinye me gero ot pi nyiŋ Rwot, Lubaŋa pa Icrael.

⁸ Ento Rwot aye owaco bot wora Daudi ni, ‘Kit macalo onoŋo doŋ tam tye i cwinyi me gero ot pi nyina, itimo ber pi keto lok meno i cwinyi.

⁹ Ento pe in aye dok ibigerra ot, ento wodi ma ibinywalo aye bigero ot pi nyiŋa.’

¹⁰ I kare-ni Rwot doŋ otyeko cobo gin ma en ociko i cikkene; pien an doŋ atyeko leyo ka tyen wora Daudi, doŋ atyeko bedo i wi komker pa Icrael, kit ma yam Rwot ociko-ni, dok atyeko gero ot pi nyiŋ Rwot Lubaŋa pa Icrael.

¹¹ Doŋ atyeko keto iye kabedo pa canduk pa Rwot, ma tye iye gicikke ma Rwot con oketo ki jo Icrael.”

¹² Solomon dok ocuŋ i nyim keno tyer pa Rwot ki i nyim lwak jo Icrael ma gucokke ducu, ocako taŋo ciŋe aryo ducu malo,

¹³ Solomon onoŋo otiyo abam mola ma borre futi abiro ki nucu, ki acee futi abiro ki nucu, ki borre nia piny dok malo futi aŋwen ki nucu, ocibo i dyekal; en ocuŋ i wiye. Ka dok orumo coŋe piny i nyim lwak jo Icrael ducu ma gucokke, ka ocako taŋo ciŋe aryo ducu malo okemo polo,

¹⁴ kun wacci, “Ai Rwot, Lubaŋa pa Icrael, pe tye Lubaŋa mo macalo in, kadi malo i polo nyo piny i wi lobo, ma tye ka gwoko gicikkene macalo in, ma inyuto mar meri ma pe lokke bot luticci ma bedo ka lubi ki cwinygi ducu.

¹⁵ Ibedo ka lubo kit gin ma yam itito bot wora Daudi, iyo, gin ma yam iloko ki dogi, icako doŋ tiyo i kare man ki ciŋi, ci ico bo ducu maber.

¹⁶ Kombeddi ai Rwot, Lubaŋa pa Icrael, doŋ ilub gin ma yam iciko ki laticci wora Daudi, kun iwacci, ‘Pe ibibedo laboŋo danoni mo i nyima ma bibedo i wi komker pa Icrael, tekke awobeni gugwoko kitgi maber, kun gilubo cikka kit macalo ibedo kwede i nyimani.’

¹⁷ Ai Rwot, Lubaŋa pa Icrael, kombeddi mi lokki doŋ omok matek, kit ma cen iloko ki wora Daudi ma laticci.

¹⁸ “Ento Lubaŋa bibedo i wi lobo-ni kacel ki dano ada? Nen, kadi oolo bene kutu ma malone twatwal-li pe romo in me bedo iye, ci ot ma agero-ni tidine rom mene kono!

¹⁹ Dok in pud iciko iti ka winyo legana, an laticci, ki kit ma abako kwede doga, ai Rwot Lubaŋana, doŋ iwiny koko ki lega ma atye ka lego i nyimi tin;

²⁰ wek waŋi obed twolo onen ot man dyeceŋ ki dyewor, en aye kabedo ma yam iwaco pire ni ibiketo iye nyiŋi, wek ibed ka winyo legana ma akelo boti kun alokke akemo kabedo man atir.

²¹ Dok iwiny bako dog laticci ki pa joni jo Icrael, i kare ma walego wakemo kabedo man atir; iyo, in doŋ ibed ka winyone ki i polo ka ma ibedo iye-ni; ci ka doŋ ityeko winyone, doŋ iwek balwa.

²² “Ka ce dano mo otimo bal i kom wadi mo, ci gimiye okwono kwon mo pire, ka obino ce okwoŋo kwoŋŋe ki i nyim keno tyerri ma i ot man,

²³ ci in Lubaŋa iwiny ki i polo, iket i tic; ŋol kop pa laticci-ni, imi kop olo dano mutino alii, kun iketo gin ma en otimo i wiye kene, dok imi dano ma pe obalo olo kop, kun itime ber muporo leŋcwinye.

²⁴ “Ka ce mony pa lumerok guloyo jonijo Icrael pi balgi ma gutimo i komi, ka ce guŋut gudwogo boti, ci gucako tuco nyiŋi, ma gilego in ka gibako doggi boti ki i ot man,

²⁵ ci iwinygi ki polo, iwek bal pa joni jo Icrael, ka dok idwokgi cen wa i lo bo ma yam i miyo bot kwarogi.

²⁶ “Ka ce polo ocegge woko, ma kot mo pe ocwer pi lakit balgi mo i komi, ka ce lwakki gucako lega kun gukemo kabedo man, kun gituco nyiŋi, ka guŋut ci gubwoto balgi, ki i kare ma iketo can i komgi-ni,

²⁷ ci in Lubaŋa iwinygi ki i polo, iwek bal pa luticci, gin joni jo Icrael, dok ipwonygi ki yo maber ma myero gulubi; ci doŋ imi kot ocwer i loboni-ni ma yam imiyo bot lwakki obed megi.

²⁸ “Ka ce kec opoto i lobo, ka two gemo opoto, nyo ka bel obwarre nyo odoko ocone, nyo ka bonyo opoto nyo okwil obino, ka ce merokgi orumogi i gaŋigi mogo nyo kadi bed kit gemo aŋo, nyo kit two mo-ni,

²⁹ ka ce lwakki gucako lega nyo bako doggi, kadi bed dano acel kok boti, nyo joni jo Icrael ducu, kun dano acel acel ŋeyo kit atwomme kene, ki cwercwinye bene, ka ce otaŋo ciŋe okemo ki ot man;

³⁰ ci in Lubaŋa iwinygi ki i polo ka ma ibedo iye-ni, iwek balgi. Tim dano acel acel kit ma iŋeyo kwede cwinye, ma rwatte ki kit kwone ducu, pien in aye, in keni, iŋeyo kit cwiny pa dano ducu;

³¹ meno bimiyo gibedo ka lworo in kun gilubo yo meri nino ducu ma gibedo, iye i lobo ma yam imiyo bot kwarowa.

³² “Obed kit meno bene ka ce larok mo, ma pe joni jo Icrael, obino kany ma oa ki i lobo mo mabor, ma obino pi nyiŋi madit-ti, ki badi matek-ki, ki ciŋi ma iryeyo, ka ce larok obino ce ocako lega ma okemo ot man,

³³ ci in Lubaŋa iwiny ki i polo ka ma ibedo iye-ni, itim kit gin ducu ma larok-ki okok kwede i nyimi, wek rok ma wi lobo ducu guŋe nyiŋi, gucak lwori, kit ma I wakki jo Icrael gilwori-ni, dok wek guŋe maber ni, ot man ma agero-ni, gilwoŋo ki nyiŋi keken.

³⁴ “Ka ce lwakki gucito ka lwenyo i kom lumerokgi i kabedo mo ducu ma icwalogi iye, ka ce gukelo legagi boti ma gukemo gaŋ man ma in iyero, ki ot man ma agero pi nyini-ni,

³⁵ ci in iwiny legagi ki bako doggi ki i polo, ci ikony korgi macalo ineno ni lokgi tye atir.

³⁶ “Ka ce gutimo bal i komi, pien pe tye dano mo ma pe balo, ka ce kiniga omaki i komgi, ci imiyogi i ciŋ lamerok mo, ma oyakogi ci oterogi i opii wa i lobo mo ka mabor nyo ka ma cok;

³⁷ ento ka cwinygi otamo lok ki i lobo ma giterogi iye i opii-ni, ce guŋut ci gubako doggi boti ki i lobo ma gitye iye i opii, kun gikok ni, ‘Wabalo, watyeko ŋak woko ata, watiyo lwak bal-gu mapol’,

³⁸ ka ce gutyeko nut Ici tamgi ducu ki cwinygi ducu, ki i lobo ka ma giterogi iye i opii-ni, kun doŋ gilego i nyimi ma gukemo lobogi, ma yam imiyo bot kwarogi-ni, ki gaŋ ma nene iyero, ki ot ma atyeko gerone pi nyiŋi,

³⁹ in Lubaŋa iwiny legagi ki bako doggi ki i polo ka ma ibedo iye-ni, ci iye konyo korgi ka ce ineno ni lokgi tye atir, dok iwek bal pa joni ma gubalo i komi.

⁴⁰ Ai Lubaŋa, kombeddi doŋ wek waŋi obed twolo ci icik iti iwiny lega ma gilego i kabedo man.

⁴¹ “A malo, ai Rwot Lubaŋa, ci idony i kabedo me yweyoni, in ki canduk me tekki. Ai Rwot Lubaŋa, wek ajwagini gurukke ki larre, wek joni maleŋ cwinygi obed yom pi berri.

⁴² Ai Rwot Lubaŋa, pe ikwer lega pa lakerri ma giwiro! Po pi mar meri ma pe lokke i kom laticci Daudi.”