2 Tekwaro 5 - Acoli Baibul

¹ Tic ma Solomon otiyo i kom ot pa Rwot otum kit meno. Solomon okelo jami ma yam wonne Daudi odyero ki Rwot-ti, ci okano ryal, ki jabu, ki jami tic-gu ducu i ot kano lim ma i ot pa Lubaŋa.

Solomon okelo canduk pa Rwot i ot pa Lubaŋa

² Solomon ocoko ludoŋo pa jo Icrael ki ludito wi kaka ducu, ma gin aye lutel wi doggola pa kwarogi ma i kin jo Icrael, ci gubino i Jerucalem pi kwanyo canduk me gicikke pa Rwot ki i gaŋ kal pa Daudi, ma gilwoŋo ni Cion.

³ Ci lwak jo Icrael ducu gucokke i nyim kabaka pi nino madito ma tye i dwe me abiro-ni.

⁴ Ludoŋo pa jo Icrael ducu gubino, ci Lulevi gucako tino canduk me gicikke.

⁵ Gutero canduk ki kema me rwatte, kacel ki jami maleŋ ducu ma yam tye i kema; ajwagi ki Lulevi gukelogi.

⁶ Kabaka Solomon ki lwak jo Icrael ducu ma gucokke bote-ni, gubedo i nyim canduk kun gitumo romi ki twoni-gu mapol ma welgi pe kwanne dok pe nene bene.

⁷ Kit meno ajwagi gucako kelo canduk me gicikke pa Rwot wa i kabedone ma i tyelo me ot, en aye kabedo maleŋ makato ducu-ni, ci guketo piny i te bwom lukerubi.

⁸ Lukerubi guyaro bwomgi ka wi kabedo me canduk wek lukerubi guum wi canduk woko kacel ki tal latiŋŋe ducu.

⁹ Dok tal latiŋŋe yam wigi nen ki i kabedo maleŋ ma i nyim kabedo maleŋ ma i tyelo-ni; ento pe gitwero nenogi ki woko; pud gitye kunnu nio wa onyoo.

¹⁰ Gin mo onoŋo pe tye i canduk, kono kidi aryo ma apada keken ma yam Moses oketo i iye ki i Koreb, ka ma yam Rwot oketo iye gicikke ki jo Icrael, i kare ma gia ki i lobo Ejipt.

¹¹ Ajwagi gukato woko ki i kabedo maleŋ, pien ajwagi ducu ma onoŋo gitye-ni doŋ gutyeko lonnye kekengi, ma pe giparo pi dul ticgi;

¹² ci Lulevi ducu ma gin luwer, Acap ki Eman, ki Jedutun, ki awobegi, ki utmegigi, onoŋo gurukke ki boŋŋi camanini mabecone, ci gimako atego agoya, ki nana ki opuk. Kacel kwedgi obedo ajwagi ma giromo miya acel ki pyeraryo ma gin lukut tumo

¹³ Tic pa lukut tum ki luwer en aye me ribo dwangi kacel ka pako ki ka pwoyo Rwot, ki dwangi ma winnye maloŋo. I kare ma gucako wer, kacel ki tum ki atego agoya ki jami mukene ducu me wer, pi pako Rwot kun giwero ni, “Pien en ber, mar mere ma pe lokke bedo nakanaka,” ci deyo pa Rwot opoŋo i ot woko, en ot pa Rwot.

¹⁴ Pienno omiyo ajwagi pe gitwero cuŋ ka tiyo ticgi, pi pol meno, pien deyo pa Rwot noŋo opoŋo i ot pa Lubaŋa woko.