2 Tekwaro 4 - Acoli Baibul

Jami ma gitiyo pi ot pa Lubaŋa

¹ Otiyo keno tyer me mola ma borre romo futi pyeradek, ki lacce bene futi pyeradek; borre ma dok malo romo futi apar wiye abic,

² Ka dok otiyo nam me mola ma giliyo ma otwodde aduno, ma lacce romo futi apar wiye abic, nia i doge tuŋcel nio i doge tuŋcel; borre tuŋ malo romo futi abiro ki nucu. Gipimo doge ki tol ci oromo futi pyeraŋwen wiye abic.

³ Ki i tere piny tye iye cal keno munyak ma orumo kom nam ducu, ma borre futi pyeraŋwen wiye abic; cal keno magi giryeyogi latyeŋ aryo, I kare ma gitiyo nam, gitiyo ki cal keno i kome lawanace!.

⁴ Gicibo nam ocuŋ i wi cal twoni dyaŋi apar wiye aryo; giketo adek gineno yo tuŋ acam, adek gineno yo tuŋ potoceŋ, adek gineno yo tuŋ acuc, ki adek gineno yo tuŋ wokceŋ. Gicibo nam ocun i ŋe twoni-nu, kun ŋegi ducu odok tuŋ iye.

⁵ Kome kinoŋ maromo incic adek; ki doge bene calo dog kikopo, ma, rom ki cal ature lena, Piine romo debe makato alip abicel.

⁶ Ka dok otiyo otako apar me lwok, oketo abic yo tuŋ acuc, ki abic yo tuŋ acam. Magi obedo me lako jami ducu ma gitiyo kwedgi pi gitum awaŋa: nam giketo me lwok pa ajwagi.

⁷ Dok otiyo okar-mac me jabu apar kit ma giciko-ni, oketogi i ot pa Lubaŋa; oketo abic yo tuŋ acuc ki abic yo tuŋ acam.

⁸ En dok otiyo meja apar, oketogi i ot pa Lubaŋa, abic yo tuŋ acuc ki abic yo tuŋ acam. Dok otiyo becen me jabu miya acel.

⁹ Ka dok oyubo dyekal pa ajwagi, ki dyekal maditte, ki kika me dyekal, omwono kom ki ka ducu ki mola;

¹⁰ ka oketo nam i twok ot i kin tuŋ acuc ki tuŋ wokceŋ,

¹¹ Kuram ocweyo agulu mapol bene, ki akwaya, ki becen-gu, Kit meno Kuram otyeko tic i kom ot pa Lubaŋa pi kabaka Solomon.

¹² Otiyo wir aryo, ki lalukana aryo ma oluŋŋe macalo agulu ma giketo i wi wir, ki obwo aryo me umo kom lalukana aryo ma oluŋŋe ma obedo i wi wir-ri.

¹³ Dok otiyo cal okwer pomegranat miya aŋwen pi obwo aryo-nu, kun cal pomegranat giryeyo latyeŋ aryo i kom obwo acel acel me umo kom lalukana aryo ma oluŋŋe ma obedo i wi wir.

¹⁴ Otiyo bene litino gadigadi apar, ki otakomola apar ma giluto i litino gadigadi,

¹⁵ ki nam acel, ki cal twoni dyaŋi apar wiye aryo ma i te namo

¹⁶ Lwak agulu ki akwaya latokke-gu, ki gin lacob riŋo, ki jami ducu ma mitte pi tic ki jami magi ma Kuram-abi otiyogi pi ot pa Rwot ki pi kabaka Solomon obedo me mola ma gijwane maleŋ.

¹⁷ Kabaka omiyo giliyo mola meno i pwor kulu Jordan, ka ma lobo agulu tye iye, i kin Cukot ki Jereda.

¹⁸ Solomon otimo gin lwak jami-nu madwoŋ twatwal, ma pek pa molane pe gikwano.

¹⁹ Solomon otiyo jami ducu ma tye i ot pa Lubaŋa kit man: keno tyer me jabu, ki lwak meja me caŋo mugati ma giketo i nyim Rwot,

²⁰ okar-mac ki lwak laputgi me jabu ma giliyo maber, ma myero gubed ka lyel i kabedo maleŋ ma i tyelo, kit ma giciko-ni;

²¹ ki lwak cal ature, ki laput-gu, ki boyi lakar mac, ducu me jabu ma giliyo maber makato.

²² Magac-gu, becen-gu, atabo me odok eceta, ki weer me waŋo mac otiyogi ki jabu ma giliyo maber; ki pata me ot pa Lubaŋa ma giketo i kom kika me kabedo maleŋ ma i tyelo, ki i kika me kicika maditte bene, gubedo me jabu,