2 Tekwaro 32 - Acoli Baibul

Cenakerib omonyo lobo Juda

¹ I ŋe lok magi ki tic magi ducu me gen-gu, Cenakerib kabaka me Aciria obino ka lweny i gaŋi ducu me Juda ma girumogi ki cel gogo, kun otamo me loyogi woko wek gubed mere.

² Ka Kejekia oneno ni Cenakerib otyeko bino ma mito lweny i kom Jerucalem,

³ ocako bedo ki yub gin ki rwodine kacel ki oteka lweny ducu me juko wan pii ma i ŋe gaŋ; ci gin gukonye.

⁴ Ci lwak mapol gucokke, gucako juko wan it kacel ki ora kulu ma yam piine mol wok ki i lobo meno, kun giwacci, “Piŋo waweko luker me Aciria gibino kany gilimo pii madwoŋ?”

⁵ En ocako tic matek cut ci ogero cel matek ma yam orette woko piny-nyi, ka dok oketo lubele i wiye, ki yo tuŋ wokone ogero cel mukene; ci omiyo Millo ma en kabedo ma i gaŋ kal pa Daudi ocuŋ matek, En bene otiyo jami lweny ki kwodi mapol ata,

⁶ Ka dok ocako keto ludito luwi mony me loyo lwak, ocokogi ducu kacel i kabedo mo malac ma i nyim dog gaŋ, ci oloko botgi lok me cuko cwiny, kun wacci,

⁷ “Wubed tek dok jo macir. Pe wubed lwor, cwinywu bene pe myero oballe i nyim kabaka me Aciria ki lwak ducu ma tye kacel kwede; pien ŋat madit makato en tye kwedwa,

⁸ En tye ki dul mony pa dano ma gigeno tekogi; ento wan watye ki Rwot Lubaŋawa ma konyowa dok lwenyo piwa.” Lwak gucako bedo ki gen pi lok pa Kejekia kabaka me Juda.

⁹ Lacen Cenakerib kabaka me Aciria kacel ki dul monnye ducu ma onoŋo gumonyo Lakic, ocwalo lukwenane gucito i Jerucalem bot Kejekia kabaka me Juda ki lwak ducu me Juda ma onoŋo gitye i Jerucalem, kun giwacci,

¹⁰ “Cenakerib, kabaka me Aciria, owaco kuman ni, ‘In ijeŋo genni i kom gin aŋo, ma miyo pud icuŋ matek i Jerucalemmi?

¹¹ Kejekia mono pe tye ka umo waŋwu wek wuto woko ki kec kacel ki orwo pii, ma noŋo en tito botwu ni, “Rwot Lubaŋawa tika bilarowa ki i cin kabaka me Aciria”?

¹² En Kejekia acel-li aye pe ojwero waŋ jogine ma i wi godi kacel ki keno tyerre woko ducu, kun ociko jo Juda ki jo Jerucalem ni, “Myero wubed ka woro Lubaŋa i nyim keno tyer acel keken, dok wuwaŋ gitum mewu iye”?

¹³ Tika wun wuŋeyo gin ma an kacel ki kwarina watyeko tiyone i kom lwak ducu me lo bo mukene? Wuneno lwak lubaŋa pa rok me lobo magi gutwero laro lwak me lobo meno ki i ciŋa?

¹⁴ Tye lubaŋa mo acel ki i kin lwak lubaŋa mukene-ni ma yam kwarina gujwero wo ko liweŋ-ŋi ‘ma twero laro lwakke ki i ciŋa, mumiyo wutamo ni Lubaŋawu bene twero larowu ki i ciŋa?

¹⁵ Pi meno, kombeddi pe wuwek Kejekia obwolwu nyo oum waŋwu kit man, dok pe wuye lokke, pien pe tye lubaŋa me rok nyo ker mo ma yam olaro lwakke ki i ciŋa nyo ki i ciŋ kwarina. Ci Lubaŋawu bitwero larowu ki i ciŋa niŋniŋ?’ ”

¹⁶ Lukwena pa Cenakerib dok gumed de ki loko lok mapol i kom Rwot Lubaŋa ki i kom laticce Kejekia.

¹⁷ Ci Cenakerib kikome ocoyo waraga ma nyuto cac madwoŋ i kom Rwot Lubaŋa pa Icrael ki loko 1ok marac i kome, kun wacci, “Kit macalo lwak lubaŋa me rok mukene pe gutwero laro lwakgi ki i ciŋa, ci Lubaŋa pa Kejekia bene pe bitwero laro lwakke ki i ciŋa.”

¹⁸ Gucako daŋŋe i kom jo Jerucalem ma onoŋo gitye wi cel ki dwan maloŋo i leb pa Lujudaya, kun giburogi ma gimiyogi lworo, ka wek gima gaŋ pa jo Jerucalem woko.

¹⁹ Gubedo ka loko lok i kom Lubaŋa pa jo Jerucalem kit macalo koŋ gubedo ka loko i kom lwak lubaŋa pa lurok me wi lobo-ni, ma dano aye gutiyogi ki ciŋgi.

Rwot olaro Kejekia ki i ciŋ Cenakerib

²⁰ Lacen kabaka Kejekia kacel ki lanebi Icaya, wod pa Amoj, gulego pi lok man kun gicwalo kokogi i polo.

²¹ Ci Rwot ocwalo lamalaika cut, ma otyeko twoni oteka lweny ki ludito wi mony ki ludito mukene woko ducu ki i gony pa kabaka me Aciria, Kit meno en odok i lobone ki lewic ma waŋe olwal woko. I kare ma en obino odonyo i ot pa lubaŋane, litinone ma en onywalogi gutone ki pala lucwan guneke woko kenyo.

²² Meno en aye kit ma Rwot olaro kwede Kejekia ki jo ma gibedo i Jerucalem ki i ciŋ Cenakerib kabaka me Aciria, ka dok ki i ciŋ lumerokgi ducu. Rwot omiyogi yweyo i kabedo ducu.

²³ Jo mapol gucako kelo mot mapol bot Rwot i Jerucalem kun gikelo bene jami mabeco me wel bot Kejekia kabaka me Juda; cakke i kare meno wot kwede anyim gimiye woro madit twatwal i nyim rok me lobo ducu.

Two pa Kejekia

²⁴ I kare meno two omako Kejekia ma onoŋo cok to woko, ci olego Rwot; Rwot odokke iye kun omiye lanyut.

²⁵ Ento Kejekia pe otimo gin mo macalo adwoggi me gin maber ma gitiyo bote, pien obedo ki wakke i cwinye. Pi meno akemo omako Rwot i kome kacel ki jo Juda ki jo Jerucalem.

²⁶ Ento Kejekia omwolle kene oweko wakke ma i cwinye, en kacel ki jo ma gibedo i Jerucalem, omiyo akemo pa Rwot pe obino i komgi i kare pa Kejekia.

Kejekia ojolo lukwena ma gua ki i Babilon

²⁷ Kejekia onoŋo tye ki lonyo kacel ki yweka madwoŋ mada. En ogero ot kano lim pi keto ryal, jabu, litino godi me wel, aŋwece, kwodi ki pi jami me wel-gu ducu.

²⁸ Ogoyo bene dero me kano cam, ka ma en keto iye bel, koŋo vino, ki moo, ogoyo bene dwol pi kit kwa dyaŋ i ducu, ki dwol romi bene.

²⁹ En ogero gaŋi mapol pire kene, ocoko romi ki dyaŋi mapol ata; pien Lubaŋa onoŋo omiye jami madwoŋ twatwal.

³⁰ En Kejekia acel-li aye oloro wan pii ma tye yo tuŋ malo ka ma pii ma a i Gikon mol kato kwede woko, en dok oyubo omiyo pii omol okemo yo tuŋ potoceŋ i ŋet gaŋ kal pa Daudi. Kejekia obedo ki gum maber kacel ki lonyo i kom ticce ducu ma en otiyo.

³¹ Doŋ i lok ma dok i kom lukwena pa luker me Babilon, ma gicwalogi bote me penyo en pi lanyut ma onoŋo Lubaŋa otiyo i lobone, Lubaŋa oweko gire pire kene, pi temo en ki pi ŋeyo lok ducu ma tye i cwinve.

To pa Kejekia

³² Lok kom Kejekia mudoŋŋe ducu, ki tic mabeco ma en otiyo, nen, gityeko coyone i lok kom ginanyuta ma lanebi Icaya wod pa Amoj oneno, i buk pa Luker me luca ki Icrael.

³³ Kejekia oto, oywe kacel ki kwarine ci giyike i lyel ma malo ma i kin lyel pa likwayo pa Daudi. Jo Juda ki jo ma gibedo i Jerucalem ducu gumiye deyo i kare me tone. Ci wode Manace aye oleyo ka tyene.