2 Tekwaro 25 - Acoli Baibul

Loc pa Amajia

¹ Amajia ocamo ker ma mwaka me ditte pyeraryo wiye abic, ci obedo ka loc i Jerucalem pi mwaka pyeraryo wiye aboŋwen, Nyiŋ minne Yekoadan me Jerucalem.

² En obedo ka tiyo gin ma nen atir i waŋ Rwot, ento pe ki cwinye ducu.

³ Ka ker omoko matek i cine, ci ocako neko luticce ma yam guneko wonne ma kabaka-ni.

⁴ Ento pe oneko litino pa lunek-ki, kit macalo gicoyo i buk me cik pa Moses ka ma yam Rwot ociko ni, “Won latin pe gibineko pi bal pa wode, nyo latin pi bal pa wonne; ento dano acel acel bito pi balle kikome,

⁵ Amajia dok ocoko lwak me Juda, ci oketogi muporo dog odi pa kwarogi i te ludito ma giloyo buca mony pa jo alip ki pa jo miya, pi jo Juda ki jo Benjamin ducu, Okwanojo ma mwaka me ditogi romo pyeraryo dok kwede malo, ci onoŋo ni jo ma giyero ma gin twoni oteka lweny giromo alip miya adek, ma giyerogi ayera ma giromo lweny, ma giŋeyo mako toŋ ki kwot.

⁶ Dok onoŋo twoni oteka lweny alip miya acel mu kene ki bot jo Icrael kun owilogi ki talanta me ryal miya acel.

⁷ Ento dano pa Lubaŋa obino bote owacce ni, “Rwoda kabaka, pe iye mony pa Icrael ocit kwedwu, pien Rwot pe tye ki jo Icrael, pe tye ki jo Epraim magi ducu,

⁸ Ento ka in itamo ni ibilimo tek me lweny pi lok meno, ci Lubaŋa bireti woko piny ki i nyim lumerokki; pien Lubaŋa tye ki tek me miyo kony ki me reto piny.’

⁹ Amajia ogamo dog dano pa Lubaŋa ni, “Wabitimo aŋo pi talanta mi ya acel ma doŋ atyeko miyone bot mony pa Icrael-li?” Dano pa Lubaŋa odok iye ni, “Rwot twero miyi lim madwoŋ makato man,”

¹⁰ Amajia ocako cwalo mony ma oa ki i Epraim gubino bote-ni, me dok woko cen i pacogi doki. Ci kiniga omakogi matek i kom jo Juda, gucako dok i gaŋgi ki kiniga mager.

¹¹ Ento Amajia odiyo cwinye, ci otero lwakke, ocito kwedgi wa i nota me Kado, ci oneko jo Ceir ma giromo alip apar.

¹² Jo Juda gumako jo mukene makwo ma giromo alip apar bene, ci guterogi i wi got ka gucorogi woko piny ki i wi got kunnu; gin ducu gupoto gunyot woko.

¹³ Ento jo mony ma Amajia okwerogi ni pe gucit i lweny kwedgi-ni, ma ocwalogi gudok cen-ni, gumonyo gaŋi me Juda, cakke ki i Camaria, nio kwede i Bet-koron, ci guneko jo alip adek ki kunnu, dok guyako jami mapol.

¹⁴ Ka Amajia odwogo ki ka neko jo Edom, okelo ki lwak lubaŋa pa jo Ceir, ci ocibogi gucuŋ macalo lubaŋane cut, ocako worogi, kun tyero gitum botgi.

¹⁵ Pi meno kiniga omako Rwot i kom Amajia ci ocwalo lanebi mo bote, ma owacce ni, “Piŋo icako lubo kor lubaŋa me rok mukene, ma pe gutwero laro lwakgi kikome ki i ciŋi-ni?”

¹⁶ Ka pud tye ka lok kwede kabaka openye ni, “Wan waketo in me bedo lami-tam pa kabaka bo? Tugi liŋ! Piŋo imito ni gineki woko?” Lanebi ocako liŋ, ento owacci, “Aŋeyo ni Lubaŋa otyeko yubo me neki woko, pien in itiyo lok man ma pe iwinyo tamma.”

¹⁷ Amajia kabaka me Juda dok openyo tam ki bot jo mukene ci ocwalo lukwena bot Yoaci wod pa Yekoakaj, wod pa Yeko, kabaka me Icrael, kun wacce ni, “Bin wacam co wanenne waŋ ki waŋ.”

¹⁸ Yoaci kabaka me Icrael odwoko lok bot Amajia kabaka me Juda kun waco ni, “Yam okuto mo ma i wi Lebanon ocwalo kwena bot yat cedar me Lebanon, kun wacci, ‘Miya nyari wek anyom ki woda.’ Ci lee tim mo me Lebanon ma owok ki kunnu onyono okuto woko piny.

¹⁹ In iwacci, ‘Doŋ atyeko neko Edom woko,’ ci cwinyi otiŋimalo ki wakke madwoŋ. Bed ki deyo meno rommi, ci ibed kwede i paconi: piŋo irobo dog dano me kelo ayela i komi, miyo ipoto wa ki Juda kacel kwedi.”

²⁰ Ento Amajia pe owinyo; pien onoŋo Lubaŋa oyubo ni, wek emigi i ciŋ lumerokgi, pien gulokke bot lwak lubaŋa pa jo Edom.

²¹ Yoaci kabaka me Icrael ocito; ci en ki Amajia kabaka me Juda gucamo co gunenne kekengi i lweny i Bet-cemec, ma gaŋ me Juda.

²² Icrael ocako loyo Juda, ci dano acel acel oriŋo woko i pacone.

²³ Yoaci kabaka me Icrael omako Amajia kabaka me Juda wod pa Yekoac, ma wod pa Akajia, ki i Bet-cemec, ka otere wa i Jerucalem, ci omuko cel me Jerucalem ma romo yadi miya aryo kulu, nia ki i dogcel ma gilwoŋo ni pa Epraim nio kwede wa i dogcel ma i twok gaŋ.

²⁴ En oyako jabu ki ryal ducu ki atabo-gu ducu ma onoŋo i ot pa Lubaŋa, kacel ki Obed-edom; oyako lim ki i ot kano lim pa kabaka, kacel ki jo ma gimako me akoka, ci odok kwede wa i Camaria.

²⁵ Amajia wod pa Yoaci kabaka me Juda koŋ dok obedo kwo ki i ŋe to pa Yoaci wod pa Yekoakaj, kabaka me Icrael pi mwaka apar wiye abic.

²⁶ Lok kom Amajia mudoŋŋe ducu, nia i acakkine nio i agikkine, gityeko coyone i buk pa Luker me Juda ki Icrael.

²⁷ Cakke i kare ma en obwoto Rwot woko jo mogo ‘gucako piro lok i kome ki i Jerucalem, ci olwi oriŋo woko i Lakic. Ento gucwalo dano i kore wa i Lakic ci guneke woko ki kunnu,

²⁸ Gukelo kome ki aguragura, ci giyiko kacel ki kwarine i gaŋ kal pa Daudi.