2 Tekwaro 20 - Acoli Baibul

Yekocapat oloyo jo Moab ki jo Ammon

¹ Lacen jo Moab ki jo Ammon ki jo mogo me Meun gubino ka lweny i kom Yekocapat,

² Jo mogo gucito gutito bot Yekocapat ni, “Mony madwoŋ tye ka bino ka lweny i komi ma gia ki i Edom, gua ki loka nam; nen, doŋ gitye wa i Kajajon-tamar” (en aye En-gedi).

³ Lworo ocako mako Yekocapat, en kikome ocako yenyo kony ki bot Rwot cut, ka dok ociko pi ri kec oromo i lo bo Juda ducu,

⁴ Ci jo Juda gucokke kacel pi yenyo kony ki bot Rwot; dano ma gua ki i gaŋi ducu me Juda gucito ka yenyo kony ki bot Rwot.

⁵ Yekocapat oa malo ocuŋ i nyim jo Juda ki jo Jerucalem ma gucokke, ocuŋ i ot pa Rwot, ki i nyim dyekal manyen,

⁶ olego ni, “Ai Rwot, Lubaŋa pa kwariwa, in aye pe Lubaŋa ma i polo-ni? Pe in aye iloyo lwak ker ducu ma i lwak rok-ki ducu? Tek ki twero tye i ciŋi, pienno pe tye ŋatti mo ma twero cuŋ i nyimi.

⁷ Pe in aye Lubaŋawa, ma oryemo jo ma i lobo-ni ki i nyim joni jo Icrael, ci omiyo bot likwayo pa Abraim laremi matwal-li?

⁸ Ka gubedo iye, ci gugero piri kabedo maleŋ pi nyiŋi, kun giwacci,

⁹ ‘Ka gin mo marac opoto i komwa, macalo lweny nyo lok ma iŋolo i komwa, nyo two gemo, nyo kec, ci wan wabicuŋ i nyim ot man, pien nyiŋi tye i ot man, ci wabikok boti pi aroma can wa i nyimi; in ibiwinyo ci ilarowa.’

¹⁰ Doŋ inen jo Ammon, jo Moab, ki jo Lugot Ceir, ma yam in pe iye Icrael omonyogi i kare ma gua ki i lobo Ejipt, ma yam gubwoto odoŋ ma pe gijwerogi woko-ni.

¹¹ Nen ka doŋ giculowa waŋe ki bino ka ryemowa woko ki i loboni ma wacamo ma yam imiyowa me bedo ginaleyawa.

¹² Ai Lubaŋawa in pe ibinologi kop? Pien wan pe watye ki tek me lweny i kom mony man madwoŋ ma gubino ka lweny i komwa-ni. Pe waneyo gin ma watiyo, ento waketo waŋwa i komi.”

¹³ I kare-nu onoŋo jo Juda gucuŋ i nyim Rwot, ki jo ma gikwo i komgi, mongi ki litinogi.

¹⁴ Cwiny Rwot obino opoto i kom Jakajiel wod pa Jekaria, wod pa Benaya, wod pa Jeyel, wod pa Matania, ma Lalevi ma jo pa Acap; onoŋo en tye i dye cokke.

¹⁵ En owaco ni, “Wuwiny, wun jo Juda ki jo Jerucalem, ki in kabaka Yekocapat: Rwot owaco botwu kuman ni, ‘Pe wulwor, dok bene cwinywu pe opoti pi kom lwak man madwoŋ-ŋi; pien lweny man pe mewu ento pa Lubaŋa gire.

¹⁶ Diki wucit ka lweny i komgi; nen, gibibino kun giwok ki i wi cere me Jij; wubinonogi wa ka ma nota ogik iye, yo tuŋ wokceŋ me tim Jeruel.

¹⁷ Lweny man pe wun aye wubilwenyo, wun wubed i kabedowu, wucuŋ iye mot, wek wunen kit ma Rwot bilarowu kwede tin, wun jo Juda ki Jerucalem.’ Pe wulwor, pe cwinywu opoti, diki wucit ka lweny i komgi, Rwot bibedo kwedwu.”

¹⁸ Yekocapat okulo wiye oluŋo waŋe piny i ŋom, ci jo Juda ducu ki jo Jerucalem guryebbe piny i nyim Rwot, kun giworo Rwot.

¹⁹ Lacen Lulevi ma jo pa Kokat ki jo pa Kora, gucuŋ ka pako Rwot. Lubaŋa pa Icrael, ki dwangi maloŋo,

²⁰ Gua malo odiko con ci gucito i tim Tekoa. I kare ma gicito, Yekocapat ocuŋ ci owacci, “Wuwiny an, wun jo Juda kacel ki wun jo ducu ma wubedo i Jerucalem! Wuye Rwot Lubaŋawu, ci wubicuŋ matek; wuyelok pa lunebine, ci wubiloyo.”

²¹ Ka otyeko noŋo tam ki bot lwak, ocako yero jo ma myero gubed ka wer bot Rwot kun gipake ma guruko bone maleŋ kun gitelo kwede nyim mony, ma giwero kuman ni, “Wumi pwoc bot Rwot, pien mar mere ma pe lokke bedo nakanaka.”

²² Ka gucako wer ki pwoc, Rwot oketo mony ma gubuto pi kuro lweny ki jo Ammon, ki jo Moab, ki jo got Ceir, ma gubino i kom Juda-ni, ci giloyogi woko.

²³ Pien jo Ammon ki jo Moab gubino ka lweny i kom jo ma gibedo i lobo godi me Ceir, gujwerogi woko liweŋ. I kare ma lweny tum i kom jo ma gibedo i Ceir, gin bene gucako nekke kekengi.

²⁴ Ka jo Juda gua malo guito wa i wi lubele ma yo tuŋ tim, ka guneno tuŋ bot lwak mony-nyi, guneno lwak kom dano muto ka guradde piny; acel mo pe obwot.

²⁵ Ka Yekocapat ki lwakke gucito ka yako jamigi, ci gunoŋo dyaŋ i mapol, ki jami ki boŋŋi ki jami me wel-gu, ma gubedo ka yako ne me bedo megi nio ka tiŋone oloyogi. Gubedo ka yako jami pi nino adek, ento jami obedo dwoŋ mukato kare,

²⁶ I nino me aŋwenne gucokke i nota Beraka, pien gubedo ka pwoyo Rwot ki kenyo; mumiyo nyiŋ kabedo meno gilwoŋo ni nota Beraka nio wa onyoo.

²⁷ Dano gudok cen, jo Juda ducu ki jo Jerucalem kun Yekocapat telo wigi; gudok cen i Jerucalem ki nyatte, pien Rwot omiyo gubedo ki nyatte pi loyo lumerokgi.

²⁸ Gubino i Jerucalem ki nanagi ki opuk ki obute wa i ot pa Rwot.

²⁹ Lubaŋa omiyo lworo omako ker ducu ma i lobo mapatpat i kare ma guwinyo ni Rwot obedo ka lweny ki lumerok pa jo Icrael.

³⁰ Kit meno ker pa Yekocapat obedo mupye mot, pien Lubaŋa omiye yweyo i kabedo ma orumo ŋete ducu,

Loc pa Yekocapat

³¹ Kit meno Yekocapat oloyo lobo Juda. Yekocapat ocamo ker ma mwaka me ditte pyeradek wiye abic, ci obedo, ka loc i Jerucalem pi mwaka pyeraryo wiye abic. Nyiŋ minne Ajuba ma nya pa Cilki.

³² En obedo ka lubo k it pa wonne Aca ducu; pe olokke oweko lubo kore; en obedo ka tiyo gin ma nen atir i wan Rwot.

³³ Ento wan jogi ma i wi godi pe gimuko woko; lwak ducu onoŋo pud peya guketo cwinygi i kom Lubaŋa pa kwarigi.

³⁴ Lok kom Yekocapat mudoŋŋe ducu, nia i acakkine nio i agikkine, gityeko coyo i lok me tekwaro pa Ye ko wod pa Kanani, ma gicoyo i buk pa Luker me Icrael.

³⁵ Lacen Yekocapat kabaka me Juda oribbe gin ki Akajia kabaka me Icrael, ma yam obedo ka tiyo bal maraco.

³⁶ Oribbe kwede pi payo mel mapol me cito i Tarcic; gubedo ka payo mel i Ejion-geber,

³⁷ Eliejer wod pa. Dodayaku me Mareca otito lok ma kemo Yekocapat, kun wacci, “Rwot bijwero gin ma wutiyo-ni woko, pien ityeko ribbe ki Akajia.” Ci mel ducu gutur woko, pe gucito i Tarcic,