2 Tekwaro 2 - Acoli Baibul

Solomon ocikke ki kabaka Kuram

¹ Solomon otamo pi gero ot pa Lubaŋa pi nyiŋ Rwot, kacel ki gaŋ kalle kikome.

² Solomon oyero jo alip pyerabiro me yweko yec, ki jo alip pyeraboro me muko godi i lobo ma obedo gotgot, ki jo alip adek ki miya abicel me bedo ludito ma loyo lutic.

³ Solomon dok ocwalo lok bot Kuram kabaka me Turo ni, “Kit ma yam ibedo ki wora Daudi kun icwalle bao cedar me gero ode me bedone, ber ibed kweda bene kit meno.

⁴ Nen, ayubbe pi gero ot pi nyiŋ Rwot Lubaŋana, ci abidyero bote pi waŋo iye odok eceta ma ŋwece kur i nyime, ki pi tyero iye mugati me gitum awaŋa odiko ki otyeno, ki i ceŋ cabit ducu, ki i por dwe, ki i nino madito ma Rwot Lubaŋawa oketo, ma yam en ociko pi jo Icrael matwal.

⁵ Ot ma abigero-ni bibedo dit mada, pien Lubaŋawa du makato lubaŋa’ mukenegu ducu.

⁶ Ento aŋa ma twero gero ot pi Lubaŋa? Kadi polo kulu ma tye malo twal-li, pe twero romo en bedo iye. An kono an aŋa ma atwero gero ot pire? Ento kono atwero tiyo ot mo macalo kabedo me waŋo odok eceta i nyime keken.

⁷ Pienno amito icwalla dano mo makwiri ma twero tic i kom jabu, ki ryal, ki mola, ki nyonyo, ki boŋo ma lamar lamar, ki makwar ki ma bulu, ki dano ma gipwonyo ki goro kom jami, wek oti ki lutic makwiri ma gitye kweda i Juda ki i Jerucalem, ma yam wora Daudi oyubogi.

⁸ Dok icwalla bao cedar, ki ciprec, ki bao algum ma gia i Lebanon, pien aŋeyo ni luticci giŋeyo toŋo yadi ma i Lebanon. Dok luticca gibibedo ki luticci,

⁹ wek guyubba bao madwoŋ, pien ot ma abigero-ni bibedo dit dok me aura.

¹⁰ Abimiyo bot joni ma gitiŋo bao ŋano ma nyige ma romo guniya alip pyerabicel, ki cayiri ma romo guniya alip pyerabicel, ki koŋo ŋino ma romo debe alip pyeraŋwen, ki moo jeituni bene debe alip pyeraŋwen, obed pi luticci me acamagi.”

¹¹ Kuram kabaka me Turo odok iye ki waraga ma ocwalo bot Solomon ni, “Pien Rwot maro jone omiyo oketo in ibedo kabaka ma loyogi.”

¹² Kuram dok owacci, “Gipwo Rwot Lubaŋa pa Icrael, ma con otiyo polo ki lobo, ma omiyo ki Daudi wode maryek, ma tye ki niaŋ matut, ma bigero ot pi Rwot, kacel ki gaŋ kalle kikome.

¹³ “An doŋ acwalli dano ma ladiro ma tye ki ŋec matut, en Kuram-abi,

¹⁴ ma wod pa dako ma anyira Dan, ma wonne dano me Turo, Gipwonyo en ki tic i kom jabu, ki ryal, ki mola, ki nyonyo ki godi, ki bao, ki boŋo ma lamar lamar, ki ma bulu ki makwar ki camanini maberre, En ŋeyo bene tic ducu me goro coc i kom jami, ŋeyo lubo kit cal mo me tic ma gimiye, kun tiyo kacel ki ludironi, ki ludiro pa rwoda Daudi ma woru.

¹⁵ Pienno gin ma rwoda owaco-ni, doŋ ocwal ki luticce, ŋano ki cayiri, ki moo ki koŋo yiŋo;

¹⁶ Ci wan wabitoŋo kit bao ducu ma imito ki i Lebanon, wabitweyogi ci gibikwan i wi pii macalo bwoda nio wa i Jopa, wek in doŋ iom iter i Jerucalem.”

¹⁷ Solomon dok ocako kwano wel jo ducu me rok mukene ma gibedo i lobo Icrael, kit ma yam wonne Daudi koŋ okwanogi-ni. Ginoŋo ni welgi romo jo alip miya acel ki pyerabic wiye adek ki miya abicel.

¹⁸ En oyero jo alip pyerabiro ki i kingi me yweko yec ducu, ki jo alip pyeraboro me muko godi i lobo ma obedo gotgot, ki jo alip adek ki miya abicel me bedo ludito ma loyo lutic, pi cuko cwiny dano wek guti tic.