2 Tekwaro 18 - Acoli Baibul

Lanebi Mikaya otito ni gibiloyo Akab ki Yekocapat

¹ Yekocapat onoŋo tye ki lwak lonyo madwoij wa ki deyo bene; ocako ribbe ki Akab, ci omiyo wode onyomo nya pa Akab,

² Lacen i ne mwaka mogo manok ocito bot Akab i Camaria. Akab oneko lwak romi ki twoni dyaŋi mapol ata pire ki pi lwak ducu ma onoŋo gitye kwede, Man oti mo pi bito en wek ocit kwede ka lweny i kom Ramot-gilead.

³ Akab kabaka me Icrael open yo Yekocapat kabaka me Juda ni, “Ibicito kweda ka lweny i kom gaŋ Ramot-gilead?” Yekocapat ogamo dog kabaka me Icrael kun wacce ni, “An ki in wan acel, lwakka gin aye lwakki. Wabibedo kwedi i mony.”

⁴ Yekocapat owaco bot kaba ka me Icrael ni, “Koŋ ikwon penyo lok ki bot Rwot.”

⁵ Kabaka me Icrael ocoko lwak lunebi ducu kacel, gucokke miya aŋwen, En owaco botgi ni, “Wacit ka lweny i kom Ramot-gilead, nyo pa aciti?” Gin lu ne bi gugamo ni, “Tugi cito cut, kabaka, pien Lubaŋa bimiyo i ciŋi.”

⁶ Ento Yekocapat dok owaco ni, “Lanebi mo mukene pa Rwot pe tye ka ny, wek koŋ dok wapeny doge?”

⁷ Kabaka me Icrael ogamo dog Yekocapat ni, “Pud tye dano mo ma myero wapenye wek wawiny dog Rwot ki bote, en Mikaya wod pa Imla; ento cwinya dage matek, pien peya otitta kit lok mo maber, en titta lok maracce keken.” Yekocapat ogamo ni, “Pe kumene, kabaka, wek lok kit meno obedi.”

⁸ Kabaka me Icrael ocak o lwoŋo ladit mo ci owacce ni, “Cit icikel Mikaya wod pa Imla oyotoyot.”

⁹ Onoŋo kabaka me Icrael ki Yekocapat kabaka me Juda gubedo wi komkergi, ma guruko jor kergi mabeco; gubedo kwede i laro moyo me dino bel ma i ŋet dogcel ma gidonyo kwede i Camaria, kun lunebi ducu gitye ka tito lok i nyimgi.

¹⁰ Jedekia wod pa Kenaana otiyo cal tuŋ lee me nyonyo pire kene, ci owacci, “Rwot owaco kuman ni, ‘Ibitwomo jo Ciria ki magi nio ka ityekogi woko ducu.’ ”

¹¹ Ci lunebi ducu gutito lok ma kit meno, kun giwacci, “Tugi cito i Ramot-gilead, ci ibiloyo; Rwot bimiyo i ciŋi, kabaka.”

¹² Lakwena ma ocito ka lwoŋo Mikaya-ni obino owacci, “Nen ba, lok pa lunebi ducu obedo me cuko cwiny kabaka; pienno wek lokki bene obed ma rom ki megi, lokki bene obed lok me cuko cwmy.”

¹³ Mikaya ogamo doge ni, “Macalo Rwot tye makwo-ni, gin ducu ma Lubaŋana owacca, en aye abilokone.”

¹⁴ Ka Mikaya oo bot kabaka, kabaka openye ni, “Mikaya, wacit ka lweny i kom Ramot-gilead, nyo pe aciti?” En ogamo ni, “Tugi cito cut, ci ibiloyo; Rwot bimiyogi i ciŋi.”

¹⁵ Ento kabaka dok owacce ni, “An mono abiciki i nyiŋ Lubaŋa tyen adi ni ilokka lok ada keken i nyiŋ Rwot?”

¹⁶ Ci Mikaya owacci, “Anene jo Icrael ducu guket woko lijayi i wi godi, macalo romi ma gipe ki lakwat; dok Rwot bene owacci, ‘Jo-ni laditgi peke; wek ŋat acel acel odok gire i pacone ki kuc.’ ”

¹⁷ Kabaka me Icrael owaco ki Yekocapat ni, “An pe onoŋo awacci ni, Mikaya pe bitito lok mo maber ma otika, ento bitito maracce?”

¹⁸ Mikaya ogamo ni, “Pi meno koŋ dok iwiny lok pa Rwot mono. Abedo ka neno Rwot ma obedo i wi komkerre, kun lwak mony me polo ducu gucuŋ ka ŋete ki yo tuŋ bade malacuc ki yo tuŋ bade malacam.

¹⁹ Rwot owacci, ‘Aŋa mono ma bibito Akab kabaka me Icrael, wek ocit oto i Ramot-gilead?’ Ci giwaco lok mapatpat.

²⁰ Lacen kit cwiny mo obino ci okato anyim ocuŋ wa i nyim Rwot, kun wacci, ‘An aye abibito en.’ Rwot openye ni, ‘Ibibito en niŋniŋ?’

²¹ En ogamo ni, ‘An abicito, ci abibedo cwiny ma lagoba kun aloko ki i dog lunebine ducu.’ Rwot ogamo ni, ‘In ibibite, ci biye lokk i; doŋ icitim kumeno.’

²² Kombeddi in doŋ inen ka Rwot ‘otyeko keto cwiny ma lagoba i dog lunebini magi ducu; Rwot doŋ otyeko ciko pi kelo lok marac i komi.”

²³ Ci Jedekia wod pa Kenaana ocito bot Mikaya cok ci odoŋo leme ki ciŋe, kun wacci, “Cwiny Rwot dok oa ki i koma niŋniŋ ka okobo oloko boti?”

²⁴ Mikaya owaco ni. “Meno ibiniaŋ iye i nino ma ibidonyo i kicika ma i tyelo wek ikanne iye.”

²⁵ Kabaka me Icrael owacci, “Wumak Mikaya woko, wudwoke cen wa bot Amon ma laloyo me gaŋ, ki bot Yoaci ma wod pa kabaka.

²⁶ Iciwacogi ni, ‘Kabaka owaco kuman ni, Wuket dano man i mabuc, dok wumiye ocam cam me mabuc, mugati ki pii keken, nio ka abidwogo paco ki kuc.’’’

²⁷ Mikaya ogamo ni, “Ka ce idwogo paco ki kuc, ci pe Rwot aye oloko ki i doga.” Dok owacci, “Wun rok ducu doŋ wuwiny!”

To pa Akab

²⁸ Kit meno kabaka me Icrael ki Yekocapat kabaka me Juda gucako cito i Ramot-gilead.

²⁹ Kabaka me Icrael owaco bot Yekocapat ni, “An abirukke macalo dano mo ata ka doŋ acako cito ka lweny, ento in iruk jorri me ker.” Kabaka ocako rukke macalo dano mo ata, ka ocito kwede i mony.

³⁰ Onoŋo kabaka me Ciria otyeko ciko ludito mony ma giloyo gadigadine me lweny ni, “Pe wucilweny i kom dano mo matidi nyo madit, ento wucilweny i kom kabaka me Icrael keken.”

³¹ Ka ludito mony ma giloyo gadigadi lweny guneno Yekocapat, ci guwacci, “Meno aye kabaka me Icrael kikome.” Ci gulokke ka lweny i kome. Yekocapat ocako daŋŋe ki mwoc, ci Rwot okonye. Ci Lubaŋa okwanyogi woko ki bote.

³² Ka ludito mony guneno ni pe en kabaka me Icrael, ci gulokke gudok woko cen gubwoto lubo kore.

³³ Ento dano mo otelo atumme ocelo ata, ci ocelo kwede kabaka me Icrael atura; atero obaro kin nyonyo me geŋo kore ki nyonyo mukene me geŋo kome ma obedo macalo pok rec. Kabaka owaco ki laryem gadigadine ni, “Lokke idok cen wek icikwanya woko ki i waŋ lweny, pien ret otyeko maka woko.”

³⁴ Ci lweny odoko malyet i nino meno, kabaka me Icrael obedo ojeŋŋe i gadigadine kun waŋe okemo jo Ciria nio wa otyeno, ka ocako to ma ceŋ cito ka poto,