2 Tekwaro 15 - Acoli Baibul

Aca odwoko cwiny jone i kom Rwot

¹ Cwiny pa Lubaŋa obino i kom Ajaria wod pa Oded,

² omiyo en ocito orwatte ki Aca, ci otitte ni, “Winy an, Aca, ki jo Juda ki Benjamin ducu. Rwot tye kwedwu, ka ce wun wutye kwede. Ka wuyenyo en, ci wubinoŋo en, ento ka wubwoto en, en bene bibwotowu.

³ Jo Icrael onoŋo gubedo laboŋo Lubaŋa me ada pi kare malac, wa ajwaka ma pwonyogi bene onoŋo pe, dok gubedo laboŋo cik;

⁴ ento i kare ma arubaruba madwoŋ odiyogi gulokke bot Rwot, Lubaŋa pa Icrael, kun giyenyo en, omiyo gunoŋo en,

⁵ I kare meno ducu onoŋo nar mo pe tye ki kuc me kato woko nyo kadi me dwogo gaŋ, pien cwiny dano orubbe woko pi can mapatpat ma obedo ka poto i kom jo ma gibedo i lobo ducu,

⁶ Kingi opokke woko atata, rok lwenyo ki rok wadi ki gaŋ i kom gaŋ wadi, pien Lubaŋa odiyogi ki can i kit yo mapatpat.

⁷ Ento wun, cwinywu obed nwaŋ! Pe wuwek badwu okwe woko, pien Lubaŋa biculo waŋ ticwu.”

⁸ Ka Aca owinyo lok meno ducu, ma lanebi Ajaria wod pa Oded otito-ni, ci cwinye odoko nwaŋ, ocako jwero cal jogi me kipyeda woko ducu ki i lobo Juda ki Benjamin ki i gaŋi ducu ma en omayogi i lobo godi ma i Epraim, ci oyubo keno tyer pa Rwot ma yam tye i nyim kicika ma gidonyo kwede i ot pa Rwot.

⁹ En ocoko jo Juda ducu ki jo pa Benjamin, ki jo ma gua i Epraim ki Manace ki Cimeon, ma onoŋo gibedo i kingi, pien onoŋo jo mapol gudak gua ki i Icrael gukobo bote pien guneno ni Rwot Lubaŋa tye kwede.

¹⁰ Gucokke i Jerucalem i dwe me adek i mwaka me apar wiye abic me loc pa Aca,

¹¹ Gutyero gitum bot Rwot i nino meno, kun gikwanyo ki i kom jami ma gukelo, ma yam guyako, twoni ma romo miya abiro ki romi alip abiro.

¹² Ci gucako keto gicikke me cito bot Rwot, Lubaŋa pa kwarigi, ki cwinygi ducu ki tipogi ducu;

¹³ dok guciko matek ni ŋat ma pe bicito bot Rwot, Lubaŋa pa Icrael, myero ginek woko, kadi bed dano matidi nyo dano muteggi, laco nyo dako.

¹⁴ Gucako kwoŋo kwoŋ bot Rwot ki dwan maloŋo, kun gidaŋŋe, ma gikuto tum-gu ki tuŋ romi-gu.

¹⁵ Ci jo Juda ducu cwinygi obedo yom pi kwoŋo kwoŋ; pien gukwoŋo kwoŋ ki cwinygi ducu, gubedo ka yenyo Rwot ki mitgi ducu, ci gunoŋo en, ka Rwot ocako miyogi yweyo i kabedo ducu.

¹⁶ Kabaka Aca oryemo wa minne Maaka woko, pe oye ni omed bedo daker pien en otiyo cal me kipyeda pi Acera ma jok ma dako. Aca otoŋo cal jokke oŋido woko, ci owaŋo woko i nota kulu Kidron,

¹⁷ Ento waŋ jogi ma i wi godi pe gimukogi woko ki i Icrael’ Kadi bed kumeno, Aca obedo ki leŋic i kom Rwot pi kare me kwone ducu,

¹⁸ En okelo i ot pa Rwot mot ma wonne odyero, kacel ki mere kikome bene ma odyero, ryal ki jabu ki weer-gu,

¹⁹ Lweny koŋ dok obedo pe nio kwede wa i mwaka me pyeradek wiye abic me loc pa Aca.