2 Tekwaro 12 - Acoli Baibul

Cicak omonyo jo Juda

¹ Ka ker pa Rekoboam doŋ omoko maber, kun medde ki cuŋ matek, en kacel ki jo Icrael ducu gucako bwoto cik pa Rwot.

² I mwaka me loc pa Rekoboam me abicce, en aye Cicak kabaka me Ejipt obino kwede ka lweny i kom jo Jerucalem, pien gubwoto Rwot woko.

³ Gubino ki gadigadi lweny alip acel ki miya aryo, ki lulweny ma giriŋo ki aguragura alip pyerabicel. Lwakjo ma welgi pe kwanne gubino kwede ma gua ki i Ejipt, jo Libya, jo Cukiim, ki jo Etiopia,

⁴ Ci omako gaŋi ma girumo ki cel gogo ma i Juda ducu nio kwede wa i Jerucalem.

⁵ Cemaya ma lanebi ocito bot Rekoboam ki bot rwodi me Juda, ma onoŋo gucokke i Jerucalem pi Cicak owaco botgi ni, “Rwot owaco kuman ni, ‘Wun wuryeko bwoto an woko, pi meno an bene atyeko miyowu i ciŋ Cicak.’’’

⁶ Rwodi me Icrael kacel ki kabaka gumwolle woko, omiyo guwacci, “Rwot lokke tye kakare.”

⁷ Ka Rwot oneno ni gumwolle kengi, lok pa Rwot obino bot Cemaya ma wacci, “Gin gumwolle kengi; pe doŋ abityekogi woko, ento doŋ abilarogi, pe doŋ abitoyo akemona i kom Jerucalem ki cin Cicak.

⁸ Ento gibibedo luticce, ka wek guŋe tic kweda ki dok me tic ki luloc me lobo mukene bene,”

⁹ Kit meno Cicak kabaka me Ejipt ocako bino ka lweny i kom Jerucalem, ci oyako jami ma gikano i ot lim pa Rwot, ki jami ma gikano i ot lim pa kabaka. En oyako woko ducu, dok oyako lwak kwodi me jabu ma yam Solomon otiyogi.

¹⁰ Kabaka Rekoboam dok otiyo lwak kwodi mukene; otiyo kwodi mola, ci omiyogi i ciŋ ludito pa lugwok kabaka ma gigwoko doggola ot pa kabaka.

¹¹ I kare ducu ma noŋo kabaka cito i ot pa Rwot, lugwok en yam gimako kwodi, ka dok gidwoko kakagi i ot kicika pa lugwok kabaka,

¹² Ka doŋ en omwolle kene ci akemo pa Rwot oa woko i kome, ci pe miyo gityekogi woko liweŋ, dok piny onoŋo ber i Juda.

¹³ Kit meno Rekoboam omoko ker mere matek i Jerucalem dok obedo ka loc bene, Rekoboam ocamo ker ma mwaka me ditte romo pyeraŋwen wiye acel, obedo ka loc i Jerucalem pi mwaka apar wiye abiro, Jerucalem ma en aye gaŋ ma yam Rwot oyero ki i kin kaka ducu me lerael pi keto iye nyiŋe. Nyiŋ minne Naama ma anyira Ammon.

¹⁴ En con obedo ka tiyo gin marac, pien pe oketo cwinye ka yenyo Rwot.

¹⁵ Lok kom Rekoboam mudoŋŋe ducu, nia i acakki nio i agikkine, gityeko coyone i buk me Tekwaro ma lanebi Cemaya ocoyo, ki i buk pa Iddo ma lanen, Lweny yam obedo tye i kin Rekobo am ki Jeroboam pi kare ducu ma pe gik.

¹⁶ Rekoboam oto, oywe kacel ki kwarine, ci giyiko kacel ki kwarine i gaŋ kai pa Daudi; wode Abija aye oleyo ka tyene.