2 Luker 9 - Acoli Baibul

Giwiro Yeko me bedo kabaka me Icrael

¹ Elica olwoŋo ŋat acel i kin lwak pa lunebi ci owacce ni, “Twe pyeri, ci ikwany cupa moo man imak i ciŋi, icit kwede wa i Ramot-gilead.

² Ka io kunnu, ci iciyeny Yeko wod pa Yekocapat, wod pa Nimci; cit iciwacce oa woko ki i kin luwote, ci itel wiye itere i kicika ma i tyelo.

³ Ka ikwany cupa moo, iony i wiye, kun iwacci, ‘Rwot owaco kuman ni, Awiro in me bedo kabaka ma loyo Icrael.’ Ka doŋ iyab doggola ci ilwi woko; pe ibed kunnu.”

⁴ Latin awobi meno ma lanebi-ni ocako wot i Ramot-gilead.

⁵ Ka ocito oo, nen, onoŋo ludito me mony gubedo i kacokke ka laro lok, ci owaco ni, “At ye ki kwena mo boti, ai ladit me mony.” Yeko ogamo ni, “Ibino bot aŋa ki i kinwa kany?” En ogamo ni, “Abino boti, ai ladit me mony.”

⁶ Yeko oa ocito kwede i ot; ci latin awobi-nu oonyo moo i wiye, kun wacce ni, “Rwot Lubaŋa pa Icrael owaco kuman ni, Awiro in me bedo kabaka ma loyo lwak pa Rwot, wek ilo jo Icrael.

⁷ In aye ibimuko ot pa laditti Akab woko, wek an acul kwor i kom Jejebel pi remo pa luticca ma lunebi, ki pi remo pa lutic pa Rwot ducu.

⁸ Pien ot pa Akab bitum woko ducu; abineko co woko ducu ki bot Akab, ma opii ki ma anywalli-gu, ma gitye i Icrael.

⁹ Abimiyo ot pa Akab bedo calo ot pa Jeroboam wod pa Nebat, dok bibedo macalo ot pa Baaca wod pa Akija.

¹⁰ Gwogi aye bimwodo kom Jejebel woko ki i lobo Jejreel, ŋatti mo pe biyiko en.” Ka oyabo doggola, ci olwi woko.

¹¹ Ka Yeko okato woko bot lutic pa laditte, gupenye ni, “Lok aŋo doŋ? Piŋo lapoya-nu obino boti?” En owaco botgi ni, “Wun wuŋeyo laco-nu ki lokke.”

¹² Dok gupenye ni, “Meno goba; tucciwa lok kikome.” En otito botgi kikore ni, “En olokka kuman kun wacca ni, ‘Rwot owaco kuman ni, Awiro in me bedo kabaka ma loyo Icrael.’ ”

¹³ Ŋat acel acel okwanyo boŋone oyotoyot opeto piny i rwom ma obedo gotgot wek en obed iye, gucako kuto tumgi kun gidaŋŋe matek ni, “Yeko aye kabaka.”

¹⁴ Kit meno Yeko wod pa Yekocapat wod pa Nimci ocako piro lok i kom Joram. (I kare-nu onoŋo Joram ki jo Icrael ducu gubedo ka gwoko Ramotgilead pi geŋo Kajael kabaka me Ciria wek pe olweny i kome;

¹⁵ ento onoŋo kabaka Joram otyeko dwogo i Jejreel wek gimad rette ma yam jo Ciria guketo i kome, i kare ma onoŋo en olwenyo ki Kajael kabaka me Ciria.) Yeko owacci, “Ka ce tamwu tye kit man, pe wuwek dano mo obucce ki i gaŋ ka tero lokke i Jejreel.”

¹⁶ Yeko ocako ito i wi gadigadi lwennye, ocito wa i Jejreel, pien onoŋo Joram buto kunnu. Ka dok Akajia kabaka me Juda bene ocito kunnu ka limo Joram.

¹⁷ I kare meno onoŋo lakur-piny Ocuŋ malo i lubele ma i Jejreel, ci oneno buca mony pa Yeko ka bino, ci owacci, “Aneno buca mony.” Joram owacci, “Kwany won aguragura mo, icwal ocirwatte kwede wek openye ni, ‘Ibino ki kuc bo?’”

¹⁸ Dano mo oito i wi aguragura ocako cito ka rwatte kwede, ci openye ni, “Kabaka owacci, ‘Ibino ki kuc bo?’’’ Yeko ogamo ni, “In iyelle ka penyo pi kuc piŋo kaa? Lokke, ilub kora.” Lakur-piny odwoko lok kun wacci, “Lakwena oo kunnu, ento pe doŋ obedwogo.”

¹⁹ Dok ocwalo won aguragura me aryone. Ka oo botgi owacci, “Kabaka owacci, ‘Ibino ki kuc bo?’” Yeko ogamo ni, “In iyelle ka penyo pi kuc piŋo? ‘Lokke, ilub kora.”

²⁰ Lakur-piny dok odwoko lok ni, “En oo botgi, ci pe doŋ obedwogo. Dok laryem gadigadi lweny ryemo macalo Yeko wod pa Nimci; pien ryemo ki tek twatwal calo lapoya.”

²¹ Joram owacci, “Wuyub gadigadina!” Ci giyubo gadigadine, ka Joram kabaka me Icrael ki Akajia kabaka me Juda gucako wot, kun ŋat acel acel oito i gadigadine, gucito ka rwatte ki Yeko. Gurwatte kwede i poto pa Nabot ma jo Jejreel.

²² Ka Joram oneno Yeko, ci openyo ni, “Ibino ki kuc bo?” En ogamo ni, “Kit kuc aŋo ma dok bedo tye-ni, ma kun kono tim kwele kwele pa meni Jejebel, ki tim jokjokke doŋ dwoŋ twatwal?”

²³ Joram owiro gadigadine, oriŋo woko kun waco bot Akajia ni, “Roro doŋ ocakke, Akajia.”

²⁴ Yeko otelo atumme ki tekke ducu, ci obayo ocelo Jorami kin kwaya bade, ci atero ocun wa i kom adunone, omiyo en opoto piny i gadigadine.

²⁵ Yeko owaco bot Bidkar ma lakony en ni, “Kwanye woko, ibol piny i poto pa Nabot ma jo Jejreel. Po pi lok ma Rwot’ yam otito i kome i kare ma an ki in warino ki aguragurawa kacel i kor: Akab ma wonne kun waco ni,

²⁶ ‘Macalo laworo aneno remo pa Nabot, ki remo pa awobene-ni, abiculo kwor i komi i poto man! Man lok pa Rwot kikome.’ Doŋ itine ibole i po to kany, kun ilubo lok ma yam Rwot owaco-ni.”

Yeko oneko Akajia

²⁷ Ka Akajia kabaka me Juda oneno, ci oriŋo woko odok yo tuŋ Bet-kagan Yeko olubo kore ci owacci, “Cel en woko bene”; ci gicelo en woko ki i gadigadine kun obeito wi cere ma wo to i Gur, ma cok ki i get Ibleam, Oriŋo olaro Megido, ci oto kunnu.

²⁸ Luticce gutiŋo en ki gadigadi gutere i Jerucalem, ci guyike i lyelle kacel ki kwarine i gaŋ kal pa Daudi.

²⁹ Onoŋo Akajia ocako loyo jo Juda i mwaka me apar wiye acel me loc pa Joram ma wod pa Akab.

To pa Jejebel

³⁰ Ka Yeko oo i Jejreel, ci Jejebel owinyo pire. Owiro yat macol i ŋet waŋe ryoryo, okedo wiye, ocako neno woko ki i waŋ dirica.

³¹ Ka Yeko donyo ki i dog gaŋ, ci Jejebel openyo ni, “Ibino ki kuc bo, in Jimri, lanek rwodi-ni?”

³² Yeko otiŋo waŋe malo ka oneno dirica, ci owacci, “Aŋa ma tye tuŋ bota? Aŋa?” Co aryo nyo adek ma lugwok daker, ma gikologi, guneno yo tuŋ bote.

³³ Yeko owaco botgi ni, “Wubole woko piny.” Gubolo Jejebel woko piny, ci remone okir i kor ot ki i kom aguragura, aguragura bene gunyono kome.

³⁴ Yeko odonyo i gaŋ, ci ocamo ka omato. Lacen owacci, “Wunen dako man ma giceno-ni, wuyike woko: pien en nya pa kabaka.”

³⁵ Ka gucito ka yiko kome, pe ginoŋo gin mo mudoŋ i kome, kono nyo olar wiye ki tyene aryo ki opany cine aryo.

³⁶ Ka gudwogo bote, gutitte, ci ogamo ni, “Meno en aye lok pa Rwot, ma yam owaco ki i dog Elia Laticbe-ni, ni meno, ‘Gwogi aye bimwodo kom Jejebel ki i lobo me Jejreel;

³⁷ dok kom Jejebel bibedo macalo cet dyaŋ ma giketo ata i nom i poto ma i lobo Jejreel, ma bimiyo dano mo pe twero waco ni, Man aye Jejebel.’ ”