2 Luker 8 - Acoli Baibul

Gidwoko lobo pa dako Lucanem

¹ I kare meno Elica owaco ki dako ma yam ocero latinne ni, “A woko wek icit ki jo ma i odi icibed ka mo ma itwero ducu; pien Rwot ociko pi kec, ci bipoto i lobo pi mwaka abiro.”

² Dako-nu ocako a woko ci otiyo kit macalo dano pa Lubaŋa owaco-ni; ocito ki jo ma i ode ci obedo i lobo pa jo Piliciti mwaka abiro.

³ Ka mwaka abiro otum, dako-nu ocako dwogo nia ki i lobo pa Jo Piliciti, okato ocito bot kabaka ka koko pi ode ki pi lobone.

⁴ I kare-nu onoŋo kabaka tye ka lok ki Gikaji ma latic pa dano pa Lubaŋa, kun wacce ni, “Titta gin madito ducu ma doŋ Elica otyeko tiyo.”

⁵ Ka onoŋo obetito bot kabaka kit ma Elica ocero ki dano muto-ni, nen, dako ma en ocero wode-ni okok bot kabaka pi ode ki pilobone. Ci Gikaji owacci, “Rwoda, kabaka, man en aye dako, ki wode bene ene, ma Elica ocero-ni.”

⁶ Ka kabaka openyo dako-nu, ci en otitte, omiyo kabaka okwanyo dano mo madit pire, kun wacci, “Dwok jami ma yam pa dako-nu ducu bote, kacel ki jami ma ocek i pottine nia wa i kare ma en obwoto ki lobone nio kwede wa onyoo.”

Kajael odoko kabaka me Ciria

⁷ I kare meno El ica ocito i Damaciko. Ben-adad kabaka me Ciria onoŋo two; ka onoŋo gititte pire ni, “Dano pa Lubaŋa obino kany,”

⁸ kabaka owaco bot Kajael ni, “Kwany mot icit kwede ka jolo wi dano pa Lubaŋa, ci ipeny dog Rwot ki bote, kun ipenye ka abicar, ki i two man.”

⁹ Kit meno Kajael ocako cito ka jolo wiye, otero ki mot bene, kit kwa jami ducu mabeco ma tye i Damaciko, ma kinaga pyeraŋwen guyeyo. Ka ocito ocuŋ i nyime, owacci, “Wodi Ben-adad ma kabaka me Ciria ocwala boti, kun wacci, ‘Abicaŋ i two man?’

¹⁰ Elica owacce ni, “Cit iciwacce ni, ‘In ibican adada’; ento Rwot otyeko nyuto bota ni en bito woko adada.”

¹¹ En ociko waŋe i kom Kajael kun gaye kwede, nio ka lewic omako, ci dano pa Lubaŋa ocako koko.

¹² Kajael openyo ni, “Rwoda, dok ikok piŋo kaa?” En ogamo ni, “Pien aŋeyo tim marac ma ibitime ki jo Icrael; ibiwaŋo gaŋi gogogi woko ki mac, ibineko co matino woko ki pala lucwan, kun inyoto litino lukere woko, dok mongi ma giyac gibiryeko igi woko.”

¹³ Kajael ogamo ni, “Laticci odoko gin aŋo, ma en gwok ma mwa-ni, ci twero tiyo gin madit ma rom meno kulu?” Elica odok iye ni, “Rwot otyeko nyutta ni, in aye ibibedo kabaka me Ciria.”

¹⁴ En ocako a woko ki bot Elica, ci ocito wa bot rwode. Rwode openye ni, “El ica owaco boti lok aŋo?” En owacci, “En otitta ni in ibicaŋ adada.”

¹⁵ Orwone en okwanyo taulo, oluto i pii ci oyaro i waŋe, nio ka oto kwede. Kajael oleyo ka tyene.

Loc pa Jekoram me Juda

¹⁶ I mwaka me abic me ker pa Joram wod pa Akab kabaka me Icrael, en aye Jekoram wod pa Yekocapat kabaka me Juda ocako iye loc.

¹⁷ Ocamo ker ma onoŋo mwaka me ditte pyeradek wiye aryo, ci obedo ka loc i Jerucalem pi mwaka aboro.

¹⁸ Obedo ka lubo kit pa luker me Icrael, kun tiyo kit macalo jo me ot pa Akab gutiyo, pien dakone nya pa Akab. Obedo ka tiyo gin ma nen marac i waŋ Rwot.

¹⁹ Ento Rwot pe omito tyeko Juda woko ducu, pi laticce Daudi, kit ma con ocikke bote ni ebimiye bedo ki mac tara, en ki likwaye matwal.

²⁰ I karene en aye jo Edom gujemo iye woko i kom loc pa Juda, ci guketo kabakagi pigi kengi.

²¹ Joram okato loka Jair kacel: ki gadigadi lwennye ducu, ci oa woko i dyewor, ci en ki ludito ma giloyo gadigadi lwennye gulwenyo i kom jo Edom ma gurume dyere-ni; ento monnye oriŋo odwogo woko paco.

²² Omiyo Edom ojemo woko i kom loc pa Juda nio wa onyoo. Ka dok Libna bene ocako jemo woko i kare-nu.

²³ Lok kom Joram mudoŋŋe ducu, ki gin ma yam otiyo ducu, gityeko coyone i buk me Tekwaro pa Luker me Juda.

²⁴ Joram oto, oywe kacel ki kwarine, dok giyike kacel ki kwarine i gaŋ pa Daudi; Akajia ma wode aye oleyo ka tyene.

Loc pa Akajia kabaka me Juda

²⁵ I mwaka me apar wiye aryo me loc pa Joram wod pa Akab, kabaka me Icrael, Akajia wod pa Jekoram, kabaka me Juda, ocako camo iye ker.

²⁶ Akajia onoŋo ditte romo mwaka pyeraryo wiye aryo ka ocamo ker, ci obedo ka loc i Jerucalem pi mwaka acel. Minne nyiŋe Atalia; en yam lakwar Omri kabaka me Icrael.

²⁷ Akajia bene obedo ka lubo kit pa jo me ot pa Akab, obedo ka tiyo gin ma nen marac i waŋ Rwot, kit macalo jo me ot pa Akab obedo ka tiyone, pien onoŋo jo paoce ot pa Akab.

²⁸ En ocako cito gin ki Joram wod pa Akab ka lweny ki Kajael kabaka me Ciria wa i Ramot-gilead, ci jo Ciria guketo ret i kom Joram.

²⁹ Kabaka Joram odwogo ka mado rette i Jejreel, en aye waŋ ret ma jo Ciria guketo i kome ki i Rama, i kare ma en olwenyo i kom Kajael kabaka me Ciria. Akajia wod pa Jekoram kabaka me Juda ocito ka limo Joram wod pa Akab i Jejreel, pien onoŋo kome lit.