2 Luker 4 - Acoli Baibul

Moo pa dako ma cware oto

¹ I kare meno dako mo acel ma i kin mon pa lunebi ocito okok bot Elica ni, “Cwara ma laticci oto woko; in bene iŋeyo ni laticci yam lworo Rwot, ento won banya obino ka mako litino awobena aryo wek gubed opiine.”

² Elica owacce ni, “Abitimmi kit gin aŋo? Titta; gin aŋo ma it ye kwede i odi?” En ogamo ni, “Pe atye ki gin mo i ot, ladit, kono nyo ablrtomoo aye tye.”

³ Dok owacce ni, “Cit woko ka lego agulu pa luwoti ducu, ikel ma igi noŋo, kel mapolpol.

⁴ Ka idony i ot, ci ilor doggola iceg wii ki wi litino awobeni woko i ot, ka iony moo i lwak agulu meno ducu; ka ce acel acel opoŋ, ci iket ocuŋ cen.”

⁵ Dako-nu ocito ci oloro doggola, ocego wiye ki wi litino awobene aryo; ka en tye ka onyo moo i igi ci gin gikelo agulu mukene bote.

⁶ Ka agulu ducu opoŋ woko, ci owaco bot wode ni, “Kella agulu mukene.” Ogamo ni, “Mukene doŋ peke.” Moo ocako gik woko ma pe dok mol.

⁷ En obino otito bot dano pa Lubaŋa, en ogamo ni, “Cit icicat moo wek icul banyani woko, ci wek in ki litino awobeni wukonnye ki mudoŋŋe.”

Elica ki dako Lacunem

⁸ I nino mo acel Elica ocito wa i Cunem ka ma dako mo ma lalonyo bedo iye; ci dako-nu olege ni ocam bote. Lacen i kare ducu ma en wok ki kenyo, en ŋak koŋ ca mo kunnu.

⁹ Dako-nu owaco bot cware ni, “Nen ba, aniaŋ atika ni dano man en dano maleŋ pa Lubaŋa, ma en bedo ka wirre i yowa jwijwi.

¹⁰ Wek wagerre latin kicika mo i wi ot, ci waket iye kitanda mo pire ki meja, ki kom, ki mac tara, ce ka en bino botwa, wek ocit obed iye.”

¹¹ I nino mo acel, en ocito kunnu ci odonyo i kicika ocako ywe iye.

¹² Owaco bot laticce Gikaji ni, “Cilwonna Lacunem man.” Ka olwone, ci ocuŋ i nyime.

¹³ Owacce ni, “Wacce ni, Nen, ibedo ki ayela man ducu piwa; gin aŋo ma myero atimmi? In it ye ki lok mo ma imito atit bot kabaka nyo ladit ma loyo mony?” En ogamo ni, “An abedo gira i kin lutuwa.”

¹⁴ Elica openyo ni, “Dok gin aŋo ma gitim pire?” Gikaji ogamo ni, “En pe tye ki wode mo, ki cware bene doŋ oti woko.”

¹⁵ Owacce ni, “Lwoŋe.” Ka olwoŋe, en ocuŋ i doggola.

¹⁶ Ci owacce ni, “I mwaka ca ka onyoo, ka kare oromo, ci ibitiŋo wodi i kori.” En ogamo ni, “Pe kumeno, rwoda, ai dano pa Lubaŋa; pe ibwol aŋecani ba.”

¹⁷ Ento dako-nu ogamo ic, ci onywalo wode i kare meno kikome, i mwaka ma olubo-ni, kit macalo yam Elica owaco bote.

¹⁸ Ka latin odoŋo, ci i nino mo acel ocito bot wonne i kin lukac,

¹⁹ ci owaco bot wonne rii, “Ai, wiya do, wiya do!” Wonne owaco bot laticce ni, “Tiŋ itere bot minne.”

²⁰ Ka otine ci otere bot minne. Latin obedo i em minne nie i dyeceŋ abwora, ci oto woko.

²¹ Ci dako oa ocito opyelo i wi kitanda pa dano pa Lubaŋa-ni, ka oloro wiye woko i ot, ci ocito woko.

²² Olwoŋo cware, owacci, “Cwalla laticci mo acel ki kana mo acel, wek acit bot dano pa Lubaŋa oyot, ka adwogi.”

²³ Ogamo ni, “Piŋo icito wa bote tin? Pien dwe peya opor, kadi cabit bene pudi.” En ogamo ni, “Bibedo ber.”

²⁴ Gitweyo kom i ŋe kana, ci dako owaco bot laticce ni, “Wek kana oriŋ, pe icuŋ nio ka awacci.”

²⁵ En ocako a ocito bot dano pa Lubaŋa wa i got Karmel. Ka dano pa Lubaŋa oneno en bino, owaco bot laticce Gikaji ni, “Nen, Lacunem loka ca;

²⁶ riŋ oyot icirom kwede, ci ipenye ni, Itye maber? Cwari tye maber? Latin tye maber?” Dako-nu ogamo ni, “Tye maber.”

²⁷ Ka obino i wi got bot dano pa Lubaŋa, ci opoto omako tyene. Gikaji obino ka cwale woko cen. Ento dano pa Lubaŋa ojuke ni, “Wek en obedi, pien tye ki can madwoŋ i cwinye; ento Rwot okano lokke woko bota, pe otitta.”

²⁸ Dako owacci, “An yam alegi pi latin laco mo, rwoda? Yam pe awacci, pe ibwola?”

²⁹ Elica owaco bot Gikaji ni, “A malo, itwe pyeri, ci ikwany odoona imak i ciŋi, wek iciti. Ka iromo ki dano mo, pe imote; ka dano mo omoti, pe igam doge; cit iciket odoona ipyel i wan latin.”

³⁰ Min latin dok owacci, “Kit macalo Rwot tye makwo-ni, macalo in bene it ye makwo-ni, pe abibwoto in,” En bene oa ocako lubo kor dako-nu.

³¹ Gikaji ocito mere anyim, ci oketo odoo i wan latin, ento gin mo pe otimme kadi wa kit gin ma nyuto ni kwo. Omiyo odok cen ka romo kwede iyo, ci otitte ni, “Latin peya oco.”

³² Ka Elica obino i ot, oneno latin obuto i wi kitandane ma oto woko.

³³ En odonyo oloro doggola woko i wigi gin aryo, ocako lego Rwot.

³⁴ Dok oa malo ocito obuto i kom latin, kun keto doge i dog latin, ki waŋe bene oketo i waŋ latin, ki bade bene opyelo i bad latin, kun ryene i kome, ci kom latin odoko lyet,

³⁵ Dok oa malo, ocako woto kun wirre i dye ot tuŋŋi ki tuŋŋi, ka oryene i kome; latin ocako jiro tyen abiro, ci oyabo waŋe,

³⁶ Ka olwoŋo Gikaji owacce ni, “Lwoŋ Lacunem man,” Ocito olwoŋe. Ka obino bote, ci owacci, “Gam wodi eno,”

³⁷ Dako-nu obino opoto ka tyene, orumo coŋe piny i nom; ci otiŋo latinne ocito woko.

Elica otiyo taŋo pi lunebi

³⁸ Elica dok ocito i Gilgal i kare ma kec tye i lobo. Ka yam lwak lunebi gubedo i nyime, owaco bot laticce ni, “Cib agulu madit i keno, wek ited dek ki lwak lunebi-ni.”

³⁹ Ŋat acel ocito i poto ka ŋwedo dek, ci onoŋo agaba me tim, opwono nyige poŋ kanyi ma odolo, ci obino onwero oketo i agulu dek kun pe ŋeyo kitgi.

⁴⁰ Ka gitoko wek jo-nu gucam, ka gitye ka camo dek-ku, ci gudamje matek ni, “Ai dano pa Lubaŋa, yat to aye tye i agulu-ni!” Ci camone oloyogi woko.

⁴¹ Elica ogamo ni, “Wukel moko kwon.” Ci oonyo i agulu, kun wacci, “Tok dek ki jo-nu gucam.” Ci gin marac mo pe dok onen i agulu.

⁴² Laco mo onoŋo oa ki i Baal-calica, okelo kwon me wi mwaka bot dano pa Lubaŋa, mugati cayiri pyeraryo, ki wit kal manyen i kicaane. Elica owacci, “Mi ki jo-nu wek gucam.”

⁴³ Ento laticce ogamo ni, “Man abiketo i nyim jo miya acel-li niŋniŋ?” En onwoyo waco ni, “Migi bot jo-nu, wek gucam, pien Rwot aye owaco kuman ni, ‘Gibicamo ci giweko mogo doŋ.’ ”

⁴⁴ Ci oketo i nyimgi, Gucamo, guweko mogo odoŋ, kit macalo Rwot owaco-ni.