2 Luker 10 - Acoli Baibul

Yeko oneko jo me ot pa Akab otyeko woko

¹ Onoŋo Akab tye ki awobene pyerabiro ma gibedo i Camaria. Yeko ocako coyo waraga mogo, ci ocwalogi i Camaria bot ludito ma giloyo gaŋ meno, ki bot ludoŋo, ki bot lugwok litino awobe pa Akab, kun waco ni,

² “Litino pa rwotwu tye botwu, dok bene wutye ki gadigadi lweny ki aguragura-gu, ki gaŋi ma girumo ki cel gogo, ki jami lweny-gu. Doŋ ka ce waraga man oo botwu,

³ wuyer latin ker mo maber ki ma romo loc ki i kin litino awobe pa rwotwu, ci wuket i wi komker pa wonne, ka doŋ wulweny pi ot pa rwotwu.”

⁴ Ento gubedo ki lworo matek, ci guwacci, “Nen ba, ka luker aryo ca pe gucuŋ i nyime, ci wan kono watwero cuŋ i nyime niŋniŋ?”

⁵ Pienno dano ma onoŋo loyo kal ki ŋat ma loyo gaŋ ducu, kacel ki ludoŋo ki lugwok litino, gucwalo lok bot Yeko kun giwacci, “Wan luticci; wabitiyo gin ducu ma ibicikowa kwede. Wan pe wabiketo kabaka mo; in iti gin ma ineno ni ber.”

⁶ Dok onwoyo coyo botgi waraga me aryo, kun waco ni, “Ka ce wun wutye tuŋ bota, ka ce wuyubbe me woro doga, ci wukwany wi litino awobe pa rwotwu, ci wubin bota i Jejreel diki ka onyoo.” Onoŋo litino awobe pa kabaka ma romo jo pyerabiro gitye bot jo madito ma i gaŋ meno ma gibedo ka pitogi.

⁷ Ka waraga oo botgi, ci gumako litino awobe pa kabaka, gunekogi woko, jo pyerabiro-nu, gucoko wigi i aduku mogo, gutero wa i Jejreel.

⁸ Ka lakwena ocito otitte ni, “Doŋ gityeko kelo wi litino awobe pa kabaka ducu,” ci en ogamo ni, “Wucan wigi obed odu aryo ki i ŋet dogcel me gaŋ, ka ma gidonyo iye, obed nio wa odiko.”

⁹ Ka okato odiko, ocuŋ iye ci owaco bot lwak ducu ni, “Wun pe wutye ki bal mo. An gira apiro lok me neko rwoda, ci atyeko neko en woko; ento aŋa ma oneko jo magi woko ducu?

¹⁰ Ber wune atir ni lok pa Rwot pe poto piny noŋo. Lok ma yam Rwot oloko ma dok i kom ot pa Akab bicobbe ducu; pien Rwot otyeko tiyo gin ma yam owaco ki i dog Laticce Elia.”

¹¹ Yeko dok oneko jo ducu ma i ot pa Akab mudoŋŋe i Jejreel, oneko wa jone madito-gu ducu, ki lureme ma cok kwede, ki ajwagine, nio ka otyekogi woko ducu ma acel mo pe odoŋ.

¹² Ka otiŋo wot ocito wa i Camaria. Ki i yo ma onoŋo en tye i Bet-eked ka ma lukwat gigurre iye.

¹³ Yeko oromo ki jo ma gin ludoggola pa Akajia kabaka me Juda, openyo ni, “Wun aŋa-gi?” Gugamo ni, “Wan ludoggola pa Akajia, wan wabino ka moto litino kal ki litino awobe pa daker yo.”

¹⁴ En owacci, “Wumakgi makwo.” Ci gumakogi makwo, gunekogi woko ka ŋet bur me Bet-eked, jo ma giromo pyeraŋwen wiye aryo, ne oweko acel mo obwot.

¹⁵ Ka oa woko ki kunnu, ci orwatte ki Yekonadab wod pa Rekab ma bino ka jolo wiye; ci omoto en, owacce ni, “Cwinyi leŋ i koma macalo an cwinya leŋ kwede i komi-ni?” Yekonadab odok iye ni, “At ye kit meno.” Yeko owacci, “Ka it ye kit meno, ci cwal ciŋi bota.” En ocako cwalo ciŋe. Yeko otiŋe i gadigadine,

¹⁶ kun wacce ni, “Bin wacit kacel, wek inen kit ma akemo maka kwede pi Rwot.” Kit meno Yeko ocako tere i gadigadine.

¹⁷ Ka oo i Camaria, ci oneko jo pa Akab ducu ma onoŋo gudoŋ kunnu, nio ka oyweyogi woko ducu liweŋ, kit ma yam Rwot oloko ki Elia-ni.

Yeko ojuko woro Baal woko

¹⁸ Yeko dok ocoko lwak ducu, owaco botgi ni, “Akab yam otiyo ki Baal manok mo, ento abitiyo bote makato.

¹⁹ Pienno wulwonna lunebi pa Baal ducu, ki jo ma giworo en ducu, ki ajwagine ducu; pe ŋatti mo obed peke, pien atye ki gitum madwoŋ me atyera bot Baal; dano mo ma obedo pe, pe bibedo makwo.” Ento Yeko otiyo ki ryeko laum wan: pien onoŋo oyubbe me tyeko luwor Baal woko.

²⁰ Yeko dok ociko ni, “Wulwon cokke madit pi Baa!.” Ci gucako lwoŋone.

²¹ Yeko ocwalo kwena oromo i Icrael ducu, ci luwor Baal ducu gubino; pe dano mo odoŋ ma pe obino. Gucako donyo i ot pa Baal, ci ot pa Baal opoŋ tuŋŋi ki tuŋŋi ducu.

²² Yeko owaco bot ladit me ot boŋŋi ni, “Kel ginaruka pi luwor Baal ducu.” En ocako kelo ginaruka pigi.

²³ Yeko ocako cito i ot pa Baal kacel ki Yekonadab wod pa Rekab; ci owaco bot luwor Baal ni, “Wuyeny, wek wunen ni lutic pa Rwot mo pe odoŋ i kinwu, kono luwor Baal keken.”

²⁴ En dok odonyo iye ka tyero gityer ki gitum awaŋa-gu. Yeko onoŋo doŋ okano jo pyeraboro woko i ŋe ot, kun wacci, “Dano mo ma oye ŋat mo acel ki i kom jo ma amiyo i ciŋwu-ni obwot, ci kwone aye bidyero ka waŋe.”

²⁵ Ka otyeko tyero gitum awaŋa, Yeko owaco bot lukur-piny ki ludito pa askari ducu ni, “Wudony i ot, wunekgi woko; pe wuwek dano mo obwoti.” Kit meno gunekogi woko ki pala lucwan, ci lukur-piny ki ludito pe askari ducu gucako bologi woko, ka gudonyo kwede wa i kicika ma i tyelo ot pa Baal,

²⁶ ci gukelo wir ma nene tye i ot pa Baal woko, guwaŋo woko.

²⁷ Dok gumuko wir pa Baal woko, ka dok gumuko ot pa Baal bene, guloko odoko ot coron nio wa onyoo,

²⁸ Yeko ojwayo tim me woro Baal woko ki i Icrael kit meno.

²⁹ Ento Yeko pe obwoto lubo bal pa Jeroboam wod pa Nebat ma omiyo jo Icrael bene gubalo-ni, en aye bal me woro litino twoni me jabu ma i Betel ki Dan.

³⁰ Rwot owaco bot Yeko ni, “Pien in itimo ber pi tiyo gin ma nen atir i waŋa, dok ityeko timo ot pa Akab kit ducu ma tye i cwinya-ni, pienno likwayi gibibedo i wi komker me Icrael nio i yalwak me aŋwenne.”

³¹ Ento Yeko yam pe ogwokke ka lubo cik pa Rwot Lubaŋa pa Icrael ki cwinye ducu; pe obwoto lubo bal pa Jeroboam, ma en omiyo jo Icrael bene gubalo-ni.

³² I kare meno Rwot ocako ŋwido i lobo Icrael woko. Kajael olwenyo i komgi, oloyogi ki i lobo Icrael ducu.

³³ Tuŋ wokceŋ me kulu Jordan omayo iye lobo Gilead ducu, ki jo pa Gad, jo pa Reuben ki jo pa Manace, cakke ki i Aroer ma i ŋet nota kulu Amon, en aye lobo Gilead ki Bacan.

³⁴ Lok kom Yeko mudoŋŋe ducu, ki gin ducu ma yam otiyo, ki tekke ducu, gityeko coyone i buk me Tekwaro pa Luker me Icrael.

³⁵ Kit meno Yeko oywe kacel ki kwarine, ci giyiko i Camaria. Wode Yekoakaj aye oleyo ka, tyene.

³⁶ Kare ma Yeko oloyo jo Icrael ki i Camaria oromo mwaka pyeraryo wiye aboro.