1 Tekwaro 9 - Acoli Baibul

Dano ma gudwogo cen ki i Babilon

¹ Yam gicoyo nyiŋ jo Icrael ducu i buk me tekwarogi, ma gicoyogi i buk pa Luker me Icrael. Jo Juda yam giterogi i opii i Babilon pien onoŋo guŋayo waŋ Lubaŋa.

² Jo ma gukwono dwogo cen ka bedo i dul lobo ma yam gimiyo botgi i gaŋigi gin aye jo Icrael kacel ki ajwagi pa Lubaŋa, Lulevi, ki lutic i ot pa Lubaŋa,

³ Jo mogo me kaka pa Juda, Benjamin, Epraim ki Manace gucako bedo i Jerucalem.

⁴ Gin aye Utai wod pa Amikud, ma wod pa Omri, wod pa Imri, wod pa Bani ki i kin likwayo pa Perej ma wod pa Juda.

⁵ Dok i kin likwayo pa Cela, Acaya ma latin kayo ki litino awobene.

⁶ Ki i kin likwayo pa Jera, Jeuel ki lukakagi, gin miya abicel ki pyeraboŋwen noŋo.

⁷ Ki i kin jo Benjamin Calu ma wod pa Meculam, wod pa Kodavia, wod pa Kacenua,

⁸ Ibneya wod pa Jerokam, Ela wod pa Uji ma wod pa Mikri, ki Meculam wod pa Cepatia ma wod pa Reuel, wod pa Ibinija,

⁹ kacel ki lukakagi ma lubo yalwakgi, dano miya aboŋwen ki pyerabic wiye abicel. Gin ducu ludito kaka i odi pa kwarogi.

¹⁰ Ajwagi pa Lubaŋa ma gudwogo cen ma gubedo i Jerucalem gin aye Jedaya, Jekoyarib, Jakin

¹¹ ki Ajaria wod pa Ilkia ma wod pa Meculam, wod pa Jadok, wod pa Merayot, wod pa Akitub, ma en aye ladit ma loyo ot pa Lubaŋa;

¹² ki Adaya wod pa Jerokam ma wod pa Packur, wod pa Malkija; ki Maacai wod pa Adiel ma wod pa Jakajera, wod pa Meculam, wod pa Mecilemit, wod pa Imer;

¹³ kacel ki lukakagi bene ma gin tudito kaka i odi pa kwarogi, gin dano alip acel ki miya abiro ki pyerabicel, jo makwiri twatwal i kom tic i ot pa Lubaŋa.

¹⁴ Lulevi ma gudwogo cen ma gubedo i Jerucalem gin aye Cemaya wod pa Kacub, ma wod pa Ajrikam, wod pa Kacabia, wod pa Merari;

¹⁵ ki Bakbakar, Kerec, Galal, ki Matania wod pa Mika ma wod pa Jikri, wod pa Acap;

¹⁶ ki Obadia wod pa Cemaya ma wod pa Galal, wod pa Jedutun; kacel ki Berekia wod pa Aca wod pa Elkana ma obedo i kin gaŋi pa jo Netopa.

¹⁷ Lugwok-doggola ot pa Lubaŋa ma gubedo i Jerucalem gin aye Calum, Akub, Talmon, Akiman ki lukakagi, ma Calum aye laditgi.

¹⁸ Nio wa i kare meno onoŋo gubedo lugwok-doggola ot pa Lubaŋa ma kabaka wok ki iye, yo tuŋ wokceŋ. Magi aye lugwokdoggola gaŋ pa Lulevi.

¹⁹ Calum wod pa Kore, ma wod pa Ebiacap, wod pa Kora, kacel ki lukakagi ma i dog ot pa kwarogi, likwayo pa Kora, gin aye lugwok dog kema, kit macalo kwarogi yam gubedo ludito ma giloyo gony pa Rwot kun gigwoko doggola me donyo.

²⁰ I kare macon onoŋo Finekaci wod pa Eleajar en aye obedo ladit ma loyogi; onoŋo Rwot tye kwede.

²¹ Jekaria wod pa Mecelemia en aye onoŋo lagwok-doggola ma donyo i kema me rwatte,

²² Jo magi ducu ma yam giyerogi me bedo lugwok-doggola onoŋo giromo dano miya aryo ki apar wiye aryo, Gicoyo nyiŋgi i buk me tekwarogi ki i gaŋgi. Onoŋo kabaka Daudi ki Camuel ma lanen-piny yam gumoko kwarogi i dog tic man, pien gubedo dano ma gigenogi twatwal.

²³ Kit meno gin ki likwayogi gubedo ludito tic ma loyo doggola ot pa Rwot, en aye ot me kema pa Rwot, macalo lukur-piny.

²⁴ Lugwok-doggola giketogi i kabedo aŋwen, yo tuŋ wokceŋ, yo tuŋ potoceŋ, yo tuŋ acam ki yo tuŋ acuc.

²⁵ Lukakagi ma i gaŋigi myero gubin pi nino abiro kare ki kare me bedo kwedgi;

²⁶ pien lugwok-doggola madito gibedo kunnu kare ducu, gin aye Lulevi ma giloyo kicika odi matinone ki odi kano lim ma i ot pa Lubaŋa,

²⁷ Odi butogi girumo ot pa Lubaŋa, pien tic me kuro piny obedo megi, gin bene gigwoko layab me yabo ot odiko odiko,

²⁸ Jo mogo i kingi onoŋo gigwoko jami ma gitiyo kwedgi i ot pa Lubaŋa; i kare ducu ma gidwokogi ki ma gikwanyogi woko, gikwanogi.

²⁹ Jo mukene i kingi giketogi me loyo jami ma bedo i ot pa Lubaŋa, ki jami tic maleŋ ducu, dok giloyo bene moko mapwotte, ki koŋo Yiŋo, ki moo, ki odok eceta, ki an wece.

³⁰ Jo mukene ma gin litino pa ajwagi giyubo jami me aruba pi aŋwece.

³¹ Matitia, dano acel ma i kin Lulevi, ma en latin kayo pa Calum ma jo Kora, en aye obedo lalo tic me tedo mugati ma apada-ni, pien en dano ma genne.

³² Lukakagi mogo ma gin jo Kokat giloyo mugati ma giketo i nyim Rwot; ticgi obedo me yu bone cabit ki cabit.

³³ Magi aye luwer, ma gin ludito kaka i odi pa kwarogi; yam gibuto i kicika odi matinone ma i ot pa Lubaŋa, ma pe gitiyo tic mukene, pien yam gibedo i dog tic dyeceŋ ki dyewor.

³⁴ Magi aye ludito kaka i odi pa kwarogi ma i kaka pa Lulevi, ma lubo yalwakgi, gin aye ludito ma yam gibedo i Jerucalem.

Tekwaro pa Caulo

³⁵ Jeyel ma won Gibeon yam bedo i Gibeon; nyiŋ dakone Maaka,

³⁶ latin awobine me kayo en Abudon, ka dok Jur, Kic, Baal, Ner, Nadab,

³⁷ Gedor, Akio, Jeker, ki Miklot;

³⁸ Miklot aye won Cimeam, Jo magi bene yam gubedo ma gukemme ki lukakagi ma gibedo i Jerucalem, kacel ki lukakagi.

³⁹ Ner onywalo Kic, Kic onywalo Caulo, Caulo onywalo Yonacan, Malkicua, Abinadab ki Ecibaal;

⁴⁰ Yonacan onywalo Meribaal, Meribaal onywalo Mika.

⁴¹ Litino awobe pa Mika gin aye Piton, Melek, Takrea ki Akaj.

⁴² Akaj onywalo Jara, Jara onywalo Alemet, Ajimavet ki Jimri. Jimri onywalo Moja,

⁴³ Moja onywalo Binea; ma wode Repaya, ma wode Eleaca, ma wode Ajel.

⁴⁴ Ajel yam tye ki litino awobe abicel, ma nyiŋgi ene: Ajrikam, Bokeru, Icmael, Cearia, Obadia ki Kanan. Jo magi aye litino awobe pa Ajel.