1 Tekwaro 4 - Acoli Baibul

Likwayo pa Juda

¹ Litino awobe pa Juda aye Perej, Kejeron, Karmi, Kur ki Cobal.

² Reaya ma wod ‘pa Cobal onywalo Jakat, Jakat onywalo Akumai ki Lakad. Meno aye doggola pa jo Jora.

³ Magi aye litino awobe pa Etam: Jejreel, Icima ki Idibac; nyiŋ lamingi obedo Kajelelponi.

⁴ Penuel ocako gaŋ Gedor, ki Ejer ocako gaŋ Kuca. Magi aye litino awobe pa Kur ma obedo latin kayo pa minne Eprata; en aye ocako Beterekem.

⁵ Acikur ma ocako gaŋ Tekoa, yam tye ki mon aryo, Kela ki Naara.

⁶ Naara onywalo Akujam, Keper, Temeni ki Akactari. Meno aye litino awobe pa Naara.

⁷ Litino awobe pa Kela gin aye Jeret, Ijar ki Etanan.

⁸ Koj onywalo Anub ki Jobeba; jo me doggola pa Akarkel ma wod pa Karum ducu gubedo likwaye.

⁹ Jabej onoŋo giworo maka to omegine ducu. Minne ocako nyiŋe Jabej kun wacci, “Pien anywale ki arem madwoŋ.”

¹⁰ Jabej okok bot Lubaŋa me Icrael kun wacci, “Tim ber, imiya gum ci imi wan lobona obed malac. Bed kweda, igwoka i kom gin marac ducu wek pe otima malit.” Ci Lubaŋa oye gin ma en olego.

¹¹ Kelub ma omin Cuka onywalo Mekir, Mekir onywalo Eciton.

¹² Eciton onywalo Bet-rapa, Pacea ki Tekina ma ocako gaŋ ma gilwoŋo Ir-Nakac, Magi aye jo Reka.

¹³ Litino awobe pa Kenaj gin aye Otiniel gin ki Ceraya. Litino awobe pa Otiniel aye Katat ki Meonatai.

¹⁴ Meonatai onywalo Opra, ki Ceraya onywalo Joab ma ocako nota pa lutic diro. Gin mumiyo gilwoŋo kit meno, pien gin ducu lutic diro.

¹⁵ Litino awobe pa Kaleb ma wod pa Jepune gin aye Iru, Ela ki Naam. Latin awobi pa Ela aye Kenaj.

¹⁶ Litino awobe pa Jekalelel gin aye Jip, Jipa, Tiria ki Acarel.

¹⁷ Litino awobe pa Ejra gin aye Jeter, Mered, Eper ki Jalon. Mered onyomo Bitia ma nya pa Parao; en ogamo ci onywalo nyare Miriam ki litino awobe aryo, Camai ki Iciba ma ocako gaŋ Ectemoa.

¹⁸ Ki dakone ma Lajuda Mered dok onywalo Jered ma ocako gaŋ Gedor, Keber ma ocako gaŋ Coko, ki Jekutiel ma ocako gaŋ Janoa.

¹⁹ Litino awobe pa dako pa Kodia ma lamiŋ Nakam gunywalo jo magi, Keila ma obedo kwaro pa jo Garmi, ki Ectemoa ma obedo kwaro pa jo Maaka.

²⁰ Litino awobe pa Cimon gin aye Amnon, Rina, Ben-kanan ki Tilon. Litino awobe pa Ici gin aye Joket ki Ben-joket.

Likwayo pa Cela

²¹ Likwayo pa Cela ma wod pa Juda aye Er ma ocako gaŋ Leka, Laada ma ocako gaŋ Mareca, ki doggola pa lucwe boŋo camanini ducu ma gibedo i Bet-acibea;

²² ki Jokim, ki jo Koceba, ki Yoaci, ki Carap ma yam obedo laloc i Moab ka dok odwogo obedo i Beterekem. (Meno lok macon twatwal.)

²³ Jo-nu aye lucwe agulu, ki jo ma gubedo i Netaim ki i Gedera. Onoŋo gibedo kunnu kacel ki kabaka pi tiyo ticce.

Likwayo pa Cimeon

²⁴ Litino awobe pa Cimeon gin aye Nemuel, Jamin, Jarib, Jera ki Caul.

²⁵ Caul onywalo wode Calum, ma wode Mibcam, ma wode Micima.

²⁶ Litino awobe pa Micima gin aye wode Kamuel, ma wode Jakur, ma wode Cimei.

²⁷ Cimei onoŋo tye ki awobene apar wiye abicel ki anyirane abicel; ento omegine pe gubedo ki litino mapol, kadi wa ludoggolagi ducu pe gunya mapol ma rom ki jo Juda.

²⁸ Gin yam gibedo i Beer-ceba, Molada, Kajar-cual,

²⁹ Bila, Ejem, Tolad,

³⁰ Becweri, Korma, Jiklag,

³¹ Bet-markabot, Kajar-cucim, Bet-biri ki Caaraim. Magi aye obedo gaŋigi nio wa i kare me loc pa Daudi.

³² Kabedo mukene ma gin gubedo iye gin aye Etam, Ain, Rimmon, Token ki Acan, gagi ducu abic,

³³ kacel ki gagi matino ma orumo gagi man ducu nio kwede wa i Baalat, Magi aye kabedogi, dok gin aye gubedo ki buk me tekwarogi.

³⁴ Mecobab, Jamlek, Joca ma wod pa Amajia,

³⁵ Joel, Yeko ma wod pa Jocibia, wod pa Ceraya, ma wod pa Aciel,

³⁶ Elionia, Jaakona, Jecokaya, Acaya, Adiel, Jecimiel, Benaya,

³⁷ Jija wod pa Cipi ma wod pa Alon, wod pa Jedaya, wod pa Cimri, ma wod pa Cemaya,

³⁸ jo magi ducu ma gicoyo nyiŋgi malo-ni gin aye lutel me doggolagi. Dog odi pa kwarogi onya madwoŋ,

³⁹ ci gucako wot nio wa i yo ma donyo i Gerar, kun girabo dog nota yo tuŋ wokceŋ pi yenyo ka kwayo romigi ki dyegigi.

⁴⁰ Gunoŋo kakwat maber kunnu ma lum olot iye madwoŋ, lobone bene lac ma obedo mot ki kuc. Jo ma gukwoŋo bedo kunnu aye jo Kam.

⁴¹ Jo meno ma gicoyo nyingi-ni guo kunnu i kare pa Kejekia kabaka me Juda, ci guneko jo Kam woko, kacel ki jo Meuni ma gunoŋo kunnu, gutyekogi woko liweŋ nio wa i kare-ni, Kit meno guleyo kabedogi woko, pien onoŋo ka kwayo romigi ki dyegigi tye kunnu maber.

⁴² Jo mogo ma i kingi, jo Cimeon ma giromo miya abic, gucito wa i got Ceir kun gitye ki jo magi ma lutel wigi: Pelatia, Nearia, Repaya ki Ujiel ma gin litino awobe pa Ici.

⁴³ Guneko jo Amalek ma yam guriŋo ci gubwot ma gudoŋ kunnu, ci gucako bedo kunnu nio wa onyoo.