1 Tekwaro 28 - Acoli Baibul

Daudi ociko Solomon pi gero ot pa Lubaŋa

¹ Daudi ocoko ludito pa jo Icrael ducu i Jerucalem, ludito ma loyo kaka ducu, ludito ma loyo dul tic ducu ma gitiyo i te loc pa kabaka, ludito ma loyo buca mony me jo alip, ki buca mony me jo miya, ludito ma gwoko jami ducu ki lim makwo ducu pa kabaka ki pa awo bene, kacel ki ludito ma loyo gaŋ kai, ki jo ma twoni oteka, ki jo ducu ma gunyebbe ki lweny.

² Ci kabaka Daudi oa malo, ocuŋ, ocako waco ni, “Wuwiny an, wun utmega ki wun lwakka. Yam abedo ki tam i cwinya me gero ot ka ma canduk me gicikke pa Rwot biywe iye, ki ka ma gibiketo iye kom pa Lubaŋa me teno tyene; ci abedo ka yubo kit me gerone ducu.

³ Ento Lubaŋa ojuka kun wacca ni. ‘In pe ibigero ot mo pi nyina, pien in lalweny, dok ityeko oyo lwak remo madwoŋ.’

⁴ Kadi bed kumeno, ci Rwot Lubaŋa pa Icrael yam oyero an ki i kin doggola pa kwarina ducu me bedo kabaka ma loyo jo Icrael matwal; pien yam oyero Juda wek obed ladit, ki i ot pa Juda oyero ot pa wora, ki i kin litino awobe pa wora cwinye okwanyo an me bedo kabaka ma loyo Icrael ducu.

⁵ I kom litino awobena ducu, macalo Lubaŋa omiya litino awobe mapol, en oyero iye woda Solomon me bedo i wi komker ma i te ker pa Rwot ma loyo Icrael.

⁶ En rwacca ni, ‘Wodi Solomon aye bigerra ot ki dye kalle ducu, pien ayero en wek obed woda, ki an bene abibedo wonne.

⁷ Abimoko kerre bedo matwal, ka ce cwinye omoko matek me lubo cikka ki lok ma aŋolo ducu kit ma en tye kwede i kare-ni.’

⁸ Doŋ acikowu i nyim jo Icrael ducu, ki i nyim lwak pa Rwot ducu, ma kun Lubaŋa bene winyo, wun wubed ka gwoko ki ka yenyo cik pa Rwot Lubaŋawu ducu, wek wubed wegi lobo man maber-ri, ci wuwek obed ginaleya matwal bot likwayowu ma gibilubo newu.

⁹ “In woda Solomon bene, ber iŋe Lubaŋa pa wora, iti ki en ki cwinyi ducu ki kero komi ducu; pien Rwot niyo cwiny dano ducu, dok ŋeyo gin ma cwiny dano yubo ducu ki tamme ducu. Ka ce iyenyo en, ci in ibinoŋo kome; ento ka ce ibwoto en woko, en bitenyi woko matwal.

¹⁰ Ber igwokke matek, pien Rwot doŋ otyeko yero in pi gero ot me kabedo maleŋ; bed laco, wek itim woko.”

¹¹ Ci Daudi omiyo bot wode Solomon cal kicika ot me donyo i ot pa Lubaŋa ma yam gicoyo, ki cal odine ducu, ki cal odi kano lim, ki me kicika ma malo ducu, ki me kicika odi matino ducu ma i iye, ki me kicika ma kom me kica bedo iye.

¹² Dok omiye cal ma nyuto dyekal me ot pa Rwot ducu kit ma yam cwinye otamo, ki kicika odi matino ma orumo ot ducu, ki odi me kano lim ducu ma i ot pa Lubaŋa, ki odi me kano lim me mot ma gidyero bot Rwot.

¹³ Onyutte bene dul tic pa ajwagi ki Lulevi, ki kit kwa tic ducu ma gitiyo i ot pa Rwot; ki kit kwa jami ducu ma gitiyo kwedgi i ot pa Rwot,

¹⁴ ki pek pa jabu ma mitte pi jami me jabu ma i dog tic acel acel, ki pek pa jami me ryal pi dog tic acel acel,

¹⁵ ki pek pa okar-mac me jabu, ki mac laputgi, pek me jabu ma mitte pi okar-mac acel acel ki lwak laputte ducu, ki pek pa ryal ma mitte pi okar-mac acel acel ki lwak laputte ducu, muporo kit tic pa okarmac acel acel ma gitiyo kwede,

¹⁶ ki pek me jabu ma mitte pi meja acel acel me mugati me aketa i nyim Rwot, ki pek me ryal ma mitte pi tiyo meja me ryal ducu,

¹⁷ ki jabu ma giliyo maberre pi gin lacob riŋo, ki becen ducu, ki kikopo ducu; dok pi atabo jabu ducu, ki pekgi acel acel; pi atabo ryal ducu ki pekgi acel acel;

¹⁸ ki pi keno tyer me wano odok eceta ma gitiyo ki jabu ma giliyo maleŋŋe, ki pekke. Ka doki onyutte cal gadigadi mejabu pa lukerubi ma giyaro bwomgi me umo canduk me gicikke pa Rwot.

¹⁹ Man ducu en onyuto ka maleŋ pi gin ma yam Rwot ocoyo pire ki cine: tic ducu myero giti ma lubo kit cal meno.

²⁰ Daudi dok owaco bot wode Solomon ni, “Bed laco ma cwinyi nwaŋ, wek itim woko. Pe ilwor, pe cwinyi oryanne: pien Rwot Lubaŋa, ma en aye Lubaŋana, tye kwedi. En pe bibwoti ata, dok pe bitenyi, nie-ka tic ducu ma gitiyo i ot pa Rwot bitum.

²¹ Nen, it ye ki lwak dul pa ajwagi ki pa Lulevi pi tiyo tic ducu me ot pa Lubaŋa; jo ducu ma ludiro i kwa tic ducu, ma gitye ki miti, gibinywako tic kwedi; ki ludito ki lwak ducu gibiwinyo dogi i lok ducu.”