1 Tekwaro 27 - Acoli Baibul

Ludito ma loyo tic pa kabaka

¹ Man aye nyiŋ jo Icrael ma ludito kaka ma i odi pa kwarogi, ludito ma giloyo buca mony pa jo alip ki buca mony pa jo miya, ki luditogi ma yam gitiyo bot kabaka i kom lok ducu ma mako dul pa jo ma gibino ki ma gicito dwe ki dwe pi mwaka ducu, kun dul acel acel welle romo jo alip pyeraryo wiye aŋwen:

² Jacobeam ma wod pa Jabdiel en aye ladit ma loyo dul mukwono ma tiyo i dwe mukwono; i dulle tye iye jo alip pyeraryo wiye aŋwen,

³ En yam lakwar Perej, en yam ladit ma loyo luwi mony ducu pa mony ma gitiyo i dwe mukwoŋo.

⁴ Dodai ma jo Akoki aye ladit ma loyo jo ma tiyo i dwe me aryo; i dulle tye iye jo alip pyeraryo wiye aŋwen,

⁵ Ladit me adekke, ma loyo jo ma tiyo i dwe me adek, en aye Benaya wod pa ajwaka Yekoyada, en aye laditgi; i dulle tye iye jo alip pyeraryo wiye aŋwen.

⁶ Benaya man en aye twon oteka ma i kin jo pyeradek ca, dok en aye ma loyo jo pyeradek-ku; wode Amijabad aye ladit ma loyo lwak ma i dulle.

⁷ Me aŋwenne obedo Acael ma omin Joab, pi dwe me aŋwen; ŋat ma olube obedo Jebadia ma wode. I dulle tye iye jo alip pyeraryo wiye aŋwen.

⁸ Ladit me abicce, pi dwe me abic, en aye Camkut ma jo pa Ijra; i dulle tye iye jo alip pyeraryo wiye aŋwen.

⁹ Me abicelle pi dwe me abicel en aye Ira ma wod pa Ikec ma jo Tekoa; i dulle tye iye jo alip pyeraryo wiye aŋwen,

¹⁰ Me abirone, pi dwe me abiro, en aye Kelej ma jo Pelon, ma i kin likwayo pa Epraim; i dulle tye iye jo alip pyeraryo wiye aŋwen,

¹¹ Me aborone, pi dwe me aboro, en aye Cibekai ma jo Kueat, pa jo pa Jera; i dulle tye jo alip pyeraryo wiye aŋwen,

¹² Me aboŋwenne, pi dwe me aboŋwen, en aye Abiejer ma jo Anatot, ma Labenjamin; i dulle tye iye jo alip pyeraryo wiye aŋwen,

¹³ Me aparre, pi dwe me apar, en aye Makarai ma jo Netopa, ma jo Jera; i dulle tye iye jo alip pyeraryo wiye aŋwen,

¹⁴ Me apar wiye acelle, pi dwe me apar wiye acel, en aye Benaya ma jo Piraton, ma i kin likwayo pa Epraim; i dulle tye i iye jo alip pyeraryo wiye aŋwen.

¹⁵ Me apar wiye aryone, pi dwe me apar wiye aryo, en aye Keldai ma jo Netopa, likwayo pa Otiniel; i dulle tye iye jo alip pyeraryo wiye aŋwen.

¹⁶ Jo ma loyo kaka pa Icrael gin ene: ladit ma loyo jo pa Reuben en aye Eliejer ma wod, pa Jikri; pi jo pa Cimeon, Cepatia ma wod pa Maaka;

¹⁷ pi jo pa Levi, en Kacabia ma wod pa Kamuel; pi jo pa Aron, Jadok;

¹⁸ pi jo pa Juda, Eliu, ma ŋat acel ma i kin omegi Daudi; pi jo pa Icakar, Omri ma wod pa Mikael;

¹⁹ pi jo pa Jabulon, Icmaya ma wod pa Obadia; pi jo pa Naputali, Jeremot ma wod pa Ajriel;

²⁰ pi jo pa Epraim, Kocea ma wod pa Ajajia; pi nucu kaka pa Manace, Joel ma wod pa Pedaya;

²¹ pi nucu kaka pa Manace ma i Gilead, Iddo ma wod pa Jekaria; pi jo pa Benjamin, Jaciel ma wod pa Abneri;

²² pi jo pa Dan, Ajarel ma wod pa Jerokam. Magi aye ludito ma loyo kaka ducu ma i Icrael.

²³ Daudi yam pe okwano wel jo ma mwaka me ditogi pe romo pyeraryo, pien Rwot yam ociko ni ebimiyo jo Icrael gibedo mapol macalo lwak lakalatwe me polo.

²⁴ Joab ma wod pa Jeruya yam ocako kwano welgi ento pe ocobo; kadi bed kumeno akemo opoto i kom Icrael pi roc man, welgi bene pe gicoyo i buk me tekwaro pa kabaka Daudi.

²⁵ Ŋat ma loyo odi me kano lim pa kabaka en aye Ajimavet ma wod pa Adiel; ki ma loyo odi lim ma i lobo, ma i gaŋi madito ki matinone, ki i odi matego ma ocudo malo liŋ aye Yonacan ma wod pa Ujia;

²⁶ ki ma loyo jo ma gitiyo tic me pur i poto en aye Ejiri ma wod pa Kelub;

²⁷ ki ma loyo poto olok en aye Cimei ma jo Rama; ki ma loyo gin ma ocek i poto olok ma gikano i odi me kano kono yino en aye Jabdi ma jo Cipmi.

²⁸ Ŋat ma loyo yadi jeituni ki olam ma i bar Cepela en aye Baal-kanan ma jo Geder, dok ŋat ma loyo ot kano moo jeituni en aye Yoaci.

²⁹ Ŋat ma loyo lwak dyaŋi ma gikwayogi i Caron aye Citrai ma jo Caron; ki ma loyo lwak dyaŋi ma i nota ducu aye Capat ma wod pa Adlai.

³⁰ Ŋat ma loyo kinaga aye Obil ma jo Icmael; ki, ma loyo megi kana aye Jedeya ma jo Meronot. Ŋat ma loyo romi ki dyegi aye Jajij ma jo Agri.

³¹ Jo magi ducu gin lugwok-lim pa kabaka Daudi.

³² Yonacan ma okeyo Daudi aye lami-tam, pien obedo dano ma niaŋ matut, dok karan bene; en ki Jekiel ma wod pa Kakmoni gubedo lugwok litino awobe pa kabaka.

³³ Akitopel obedo lami-tam pa kabaka, ki Kucai ma jo Arki obedo larem kabaka.

³⁴ Jo ma guleyo ka tyen Akitopel aye Yekoyada ma wod pa Benaya, ki Abiatar. Joab aye ladit me mony pa kabaka.