1 Tekwaro 26 - Acoli Baibul

Lugwok-doggola

¹ Lok kom dul pa lugwokdoggola. I kin jo pa Kora guyero Mecelemia ma wod pa Kore ma i kin likwayo pa Acap.

² Mecelemia onywalo awobe magi: Jekaria ma latin kayone, ka dok me aryone Jediael, me adekke Jebadia, me aŋwenne Jatiniel,

³ me abicce Elam, me abicelle Yekokanan, me abirone Eliekoenai.

⁴ Obed-edom onywalo awobe magi: Cemaya ma latin kayo, ka dok me aryone Yekojabad, me adekke Joa, me aŋwenne Cakar, me abicce Netanel,

⁵ me abicelle Amiel, me abirone Icakar, me aborone Peuletai; pien Lubaŋa omiye gum.

⁶ Ki wode Cemaya bene onywalo awobe ma gubedo rwodi i dog odi pa kwarogi, pien gubedo jo makwiri atika.

⁷ Litino awobe pa Cemaya gin aye Otini, Repael, Obed ki Eljabad, ma omegigi gubedo jo makwiri, nyiŋgi Eliu ki Cemakia.

⁸ Jo magi ducu gin aye likwayo pa Obed-edom kacel ki awobegi ki omegigi, jo makwiri ma giromo tic; jo pa Obed-edom giromo pyerabicel wiye aryo,

⁹ Mecelemia bene obedo ki awo bene ki omegine ma gikwiri, gin apar wiye aboro.

¹⁰ Ki Koca ma i kin likwayo pa Merari onywalo awobe magi: Cimri aye laditgi; kadi pe en aye latin kayo, ento wonne okero en odoko ladit;

¹¹ ka dok me aryone Ilkia, me adekke Tebalia, me aŋwenne Jekaria; awobe pa Koca kacel ki omegine, ducu giromo apar wiye adek.

¹² Dul magi pa lugwok-doggola, ma dul acel acel tye ki laditte, gipokogi tic, kit ma yam gipoko ki utmegigi bene ma gubedo ka tic i ot pa Rwot;

¹³ dok gibolo kwir ma lubo dog odi pa kwarogi, pi noŋo doggola ma gibigwoko, kun dog odi matino ki maditone gitimogi marom.

¹⁴ Kwir ma gibolo pi doggola ma tuŋ wokceŋ opoto i kom Celemia. Gibolo kwir bene pi wode Jekaria, ma en lami-tam ma ŋeyo piny mada, ci mere opoto pi doggola ma tuŋ acam.

¹⁵ Pa Obed-edom opoto pi doggola ma tuŋ acuc, ci pa awobene obedo ot kano jami.

¹⁶ Pa Cupim ki Koca opoto pi doggola ma tuŋ potoceŋ, kacel ki doggola ma gilwoŋo Caleket ma i yo ma dok tuŋ malo. Lugwok-doggola gukemme ki luwotgi.

¹⁷ Ki tuŋ wokceŋ gubedo jo abicel i nino acel acel, ki tuŋ acam jo aŋwen i nino acel acel, ki tuŋ acuc bene jo aŋwen i nino acel acel, kacel ki jo aryo aryo i ot kano jami.

¹⁸ I ot ma tere aperu ma yo tuŋ potoceŋ onoŋo giketo jo aŋwen i ŋet yo, ki aryo i ŋet ot ma tere aperu.

¹⁹ Magi aye dul pa lugwok-doggola ma i kin jo pa Kora ki likwayo pa Merari.

Ludito ma gwoko odi me kano lim

²⁰ I kin Lulevi giketo Akija obedo ladit ma gwoko odi me kano lim ma i ot pa Lubaŋa, ki odi me kano lim me mot ma gidyero bot Rwot.

²¹ I kin likwayo pa Gercon likwayo pa Ladan aye gubedo ludito kaka i dog odi pa kwarogi. Laditgi aye Jekieli.

²² Litino awobe pa Jekieli, ma gin aye Jetam ki ominne Joel, gubedo ludito ma gwoko odi me kano lim ma i ot pa Rwot.

²³ I kin jo pa Amram, pa Ijar, pa Kebron ki pa Ujiel,

²⁴ Cebuel, ma lakwar Gercom ma wod pa Moses, en aye rwot madit ma giketo pi gwoko odi me kano limo

²⁵ Omegine gin ene: i kin likwayo pa Eliejer obedo wode Rekabia, ma wode Jecaya, ma wode Joram, ma wode Jikri, ma wode Celomot.

²⁶ Celomot man ki omegine gubedo ludito ma gwoko odi me kano mot ducu ma yam kabaka Daudi odyero bot Rwot, ki mot ma ludito kaka ma i odi pa kwarogi ki ludito ma giloyo buca mony me jo alip, ki buca mony me jo miya, ki lutel wi mony yam gudyero bene.

²⁷ Gin yam gudyero mot mua i lim ma giyako i lweny me yubo ot pa Rwot.

²⁸ Dok bene lim ducu ma yam Camuel ma lanen-piny, ki Caulo wod pa Kic, ki Abneri wod pa Ner, ki Joab, wod pa Jeruya yam gudyero bot Rwot; mot ducu ma gidyero Celomot ki omegine gubedo ka gwokone.

Ludito tic mukene

²⁹ I kom jo pa Ijar, giketo Kanania ki awobene pi tic ma woko ma i Icrael me bedo jagi ki luŋolkop.

³⁰ I kom jo pa Kebron giketo Kacabia ki omegine ma gikwiri ma romo alip acel ki miya abiro me ne no tic ma i Icrael ma loka Jordan yo tuŋ potoceŋ, pi tic pa Rwot ducu ki pi tic pa kabaka bene.

³¹ I kom jo pa Kebron laditgi obedo Jerija ma loyo jo pa Kebron ducu ma ocoko dog odi pa kwarogi ducu. I mwaka me pyeraŋwen me loc pa Daudi yam gibedo ka yenyo, ci ginoŋo jo makwiri atika ma i kingi i Jajer ma i Gilead.

³² Kabaka Daudi oketo en ki omegine, jo makwiri ma romo alip aryo ki miya abiro, ma gin ludito kaka ma i odi pa kwarogi, me neno tic pa jo pa Reuben, jo pa Gad ki nucu kaka pa Manace pi lok ducu ma mako tic pa Lubaŋa ki pi lok pa kabaka.