1 Tekwaro 24 - Acoli Baibul

¹ Dul pa likwayo pa Aron gin ene. Litino awobe pa Aron gin aye Nadab, Abiu, Eleajar ki Itamar.

² Ento Nadab ki Abiu guto i kare ma wongi pud kwo, litinogi bene pe, mumi yo ‘Eleajar ki Itamar gudoko ajwagi pa Lubaŋa.

³ Ci Daudi opokogi muporo dog ticgi ma giyerogi iye, kun jo ma gukonye gin aye Jadok ma i kin likwayo pa Eleajar, ki Akimelek ma i kin likwayo pa Itamar.

⁴ Doŋ macalo ginoŋo jo madito mapolle i kin likwayo pa Eleajar makato ma i kin likwayo pa Itamar, gupoko ludito kaka ma i dog odi pa kwarogi apar wiye abicel pi likwayo pa Eleajar, ki ludito kaka ma i odi pa kwarogi aboro pi likwayo pa Itamar.

⁵ Gipokogi ki bolo kwir, marom, pien ludito me kabedo maleŋ ki ludito pa Lubaŋa yam gubedo i kin likwayo pa Eleajar ki i kin likwayo pa Itamar bene,

⁶ Cemaya wod pa Netanel ma Lalevi, ma obedo karan, yam ocoyo nyiŋgi ki i nyim kabaka, ki’ i nyim rwodi, ki ajwaka Jadok, ki Akimelek wod pa Abiatar, ki ludito kaka ma i odi pa kwaro pa ajwagi ki pa Lulevi; yam guyero dog ot pa kwarogi acel pi Eleajar ki acel giyero pi Itamar.

⁷ Kwir mukwoŋo opoto i kom Yekoyarib, ki me aryo i kom Jedaya,

⁸ me adek i kom Karim, me aŋwen i kom Ceorim,

⁹ me abic i kom Malkija, me abicel i kom Mijamin,

¹⁰ me abiro i kom Kakoj, me aboro i kom Abija,

¹¹ me aboŋwen i kom Yecwa, me apar i kom Cekania,

¹² me apar wiye acel i kom Eliacab, me apar wiye aryo i kom Jakim,

¹³ me apar wiye adek i kom Kupa, me apar wiye aŋwen i kom Jecebeab,

¹⁴ me apar wiye abic i kom Bilga, me apar wiye abicel i kom Imer,

¹⁵ me apar wiye abiro i kom Kejir, me apar wiye aboro i kom Kapijej,

¹⁶ me apar wiye aboŋwen i kom Petakia, me pyeraryo i kom Jekejikel,

¹⁷ me pyeraryo wiye acel i kom Jakin, me pyeraryo wiye aryo i kom Gamul,

¹⁸ me pyeraryo wiye adek i kom Delaya, me pyeraryo wiye aŋwen i kom Maajia.

¹⁹ Dog tic ma giyero jo magi iye obedo me donyo i ot pa Rwot, kun gilubo cik ma yam kwarogi Aron oketo pigi, ‘macalo Rwot Lubaŋa pa Icrael yam ociko en kwede.

²⁰ Lok kom likwayo pa Levi mudoŋŋe: i kin likwayo pa Amram giyero Cubael; ki i kin likwayo pa Cubael giyero Jedeya.

²¹ Likwayo pa Rekabia: i kin likwayo pa Rekabia giyero Icia ma laditgi.

²² I kin likwayo pa Ijar giyero Celamot; i kin likwayo pa Celamotgiyero Jakat.

²³ I kin likwayo pa Kebron giyero Jeria ma laditgi, me aryone Amajia, me adek Jakajiel, me aŋwen Jekameam.

²⁴ I kin likwayo pa Ujiel giyero Mika; i kin likwayo pa Mika giyero Camir,

²⁵ Umin Mika en aye Icia; i kin likwayo pa Icia giyero Jekaria.

²⁶ I kin likwayo pa Merari giyero Makali ki Muci. I kin likwayo pa Jajia giyero Beno.

²⁷ Likwayo pa Merari gin aye Jajia, Beno, Cokam, Jakur ki Ibri.

²⁸ I kin likwayo pa Makali giyero Eleajar ma pe onywalo awobe.

²⁹ I kin likwayo pa Kic giyero Jeramel.

³⁰ I kin likwayo pa Muci giyero Makali, Eder ki Jerimot. Magi gin aye likwayo pa jo Levi, kun lubo dog odi pa kwarogi.

³¹ Jo magi bene, ludito kaka ma i dog odi pa kwarogi acel acel gubolo kwir, kun ladit bolo kacel ki utmegine matino, macalo utmegigi ma likwayo pa Aron gubolo ki i nyim kabaka Daudi, Jadok, Akimelek ki ludito kaka ma i dog odi pa kwaro pa ajwagi ki pa Lulevi,