1 Tekwaro 22 - Acoli Baibul

¹ Daudi dok owacci, “Ot pa Rwot Lubaŋa bibedo kany, ki keno tyer me gitum awaŋa pi jo Icrael bene bibedo kany.”

Daudi oyubo pi gero ot pa Lubaŋa

² Daudi ociko pi coko lurok ma onoŋo gibedo i lobo Icrael, ci oketo lupa-godi ka yubo godi ma gipayogi mabeco pi gero ot pa Lubaŋa,

³ Daudi dok okano lwak nyonyo madwoŋ me yubo mucumar pi guro kika me dog gaŋ, ki okol latwe bao, ki lwak mola madwoŋ ma pekke pe pimme,

⁴ ki lwak bao cedar ma welle pe kwanne, pien jo Cidon ki jo Turo gukelo bot Daudi bao cedar madwoŋ twatwal.

⁵ Pien Daudi yam owacci, “Latinna Solomon pud tidi, peya tye ki ŋec mo, dok ot ma gibigero pi Rwot myero obed me deyo makato ducu, wek ywekane ki deyone orom lobo ducu; mumiyo an aye ayubo kit gerone.” Pienne Daudi ocako yubo lwak jami madwoŋ twatwal ma pud kwo.

⁶ Ka dok olwoŋo wode Solomon, ociko en pi gero ot pa Rwot Lubaŋa pa Icrael.

⁷ Daudi owaco ki Solomon ni, “Woda, onoŋo abedo ki tam i cwinya pi gero ot mo pi nyiŋ Rwot Lubaŋa.

⁸ Ento lok pa Rwot yam obino bota kun wacci, ‘In doŋ ityeko oyo lwak remo mapol, dok ibedo ka Lwenyo lweny madito-gu; pe ibigero ot mo pi nyina, pien ityeko oyo lwak remo madwoŋ i nyima ki i wi lobo.

⁹ Nen ba, ibinywalo latin laco; en bibedo ki kuc, abimiye kuc ma lumerokke ducu pe gibiyele; pienno nyiŋe bibedo Solomon, dok abimiyo kuc ki yweyo bot Icrael i karene,

¹⁰ En aye bigero ot pi nyiŋa, En bibedo woda, ki an abibedo wonne, dok abimoko komkerre bedo i Icrael matwal.’

¹¹ Iyo latinna, Rwot obed kwedi, wek ityek gero ot pa Rwot Lubaŋani, kit ma yam oloko kwede i komi-ni.

¹² Atikane, Rwot aye myero omiyi ryeko ki niaŋ matut, wek ibed ka lubo cik pa Rwot Lubaŋani ka en doŋ omiyi dit me loyo Icrael.

¹³ Dok ibilimo gum ka ce ibedo ka gwoko kit cik ducu ki ŋol ducu ma cen Rwot ociko ki Moses pi jo Icrael. Bed oteka ma cwinyi nwaŋ. Pe ilwor; cwinyi pe opoti.

¹⁴ Nen an doŋ ayelle mada’ ci doŋ atyeko yubo jami magi pi ot pa Rwot: jabu ma romo talanta alip miya acel, ryal ma romo talanta milion acel, ki mola ki nyonyo ma pekke pe pimme, pien gidwoŋ twatwal; ka dok ayubo bao ki got-gu, In dok imed mu kene i komgi.

¹⁵ Dok it ye ki lwak lutic mapol: I upa-godi, lugedo ki godi, lupac ki ludiro tic ducu ma welgi pe kwanne, ki jo ma gikwiri i ticgi,

¹⁶ ma gitiyo ki jabu, ki ryal-gu, ki mola ki nyonyo-gu, Doŋ ia malo icak tic cut! Rwot “obed kwedi.”

¹⁷ Daudi dok ociko ludito ma i Icrael ducu pi konyo wode Solomon kun wacci,

¹⁸ “Rwot Lubaŋa tye kwedwu? Dok pe en aye omiyowu kuc i kabedo ducu? En aye otyeko miyo wegi lobo-ni i ciŋa; dok lobo doŋ gitayo ki i nyim Rwot ki i nyim lwakke.

¹⁹ Iyo, kombeddi doŋ wuket tamwu ki cwinywu ka yenyo Rwot Lubaŋawu. Doŋ wutwarre malo wuciger kabedo maleŋ pa Rwot Lubaŋa, ka wek canduk me gicikke pa Rwot ki jami pa Lubaŋa maleŋ-gu ducu gikelgi wa i ot ma doŋ gigero pi nyiŋ Rwot.”