1 Tekwaro 16 - Acoli Baibul

¹ Gukelo canduk pa Lubaŋa wa paco, gucibo i kema ma yam Daudi oguro pire; gucako tyero gitum awaŋa ki gityer lakwecwiny i nyim Lubaŋa.

² Ka Daudi otyeko tyero gitum awaŋa-gu ki gityer lakwecwiny, ci ocako lamo gum i kom lwak i nyiŋ Rwot.

³ Lacen ocako poko jami ki jo Icrael ducu, co wa ki mon; dano acel acel gimiye mugati acel, ki riŋo anida, ki poki olok mutwone.

⁴ Dok oketo Lulevi mogo pi bedo lutic i nyim canduk pa Rwot, pi lwoŋo nyiŋ Lubaŋa, pi pwoyo en ki pi pako Rwot, Lubaŋa pa Icrael.

⁵ Acap aye laditgi, ki me aryone ma lube obedo Jekaria, Jeyel, Cemiramot, Jekiel, Matitia, Eliab, Benaya, Obed-edom ki Jeyel, gin aye lugo nana ki opuk. Acap onoŋo goyo atego agoya,

⁶ ki Benaya ki Jakajiel ma ajwagi gin aye lukut tum teretere i nyim canduk me gicikke pa Rwot.

Wer me pwoc pa Daudi

⁷ I kare meno en aye nino ma Daudi okwono ciko ni Acap ki utmegine gubed ka wero wer me pwoyo Rwot, kit man:

⁸ Wumi pwoc bot Rwot, wulwon nyiŋe, wumi ticce oneŋe i rok ducu!

⁹ Wuwer bote wer me pako en, wutit ticce me aura ducu!

¹⁰ Wuket deyo i kom nyiŋe maleŋ; jo ma yenyo Rwot cwinygi obed yom!

¹¹ Wubin bot Rwot wek wunon tek ki bote, wubed i nyime nakanaka.

¹² Wupo kom tic me aura ma en otiyo ducu, ginaura ma yam otiyo ki kop ma oŋolo,

¹³ wun likwayo pa Abraim ma yam laiicce, wun litino pa Yakobo ma en oyerowu.

¹⁴ En aye Rwot Lubaŋawa; kop ma en oŋolo romo i lobo ducu.

¹⁵ En cwinye omoko i kom gicikkene ma bedo nakanaka, i kom lok ma yam ociko, pi yatwak alip ki alip,

¹⁶ en gicikke ma oketo ki Abraim, ki lok ma yam okwoŋo ki Icaka,

¹⁷ ma omoko odoko cik bot Yakobo, wek obed gicikke ki Icrael matwal,

¹⁸ kun wacci, “Abimiyo lobo Kanaan botwu, obed lobo me aleyawu.”

¹⁹ I kare ma pud gin nok, ma welgi tidi, ma pud gin lubedo i lobo-nu,

²⁰ ma giwirre i kin rok mapatpat, ma gia i te ker acel, gikobo i rok mukene,

²¹ Lubaŋa pe oye ŋat mo odiyogi; ojuko luker mapol pigi kun wacci,

²² “Pe wugud kom jo ma an awirogi, pe wutim lunebina marac!”

²³ Wuwer bot Rwot, wun lobo ducu! wutit pi larre nino ducu.

²⁴ Wutuc deyone bot lurok, wutit ticce me aura bot rok ducu!

²⁵ Rwot aye dit, myero gipake twatwal, myero gilwore makato lubaŋa mukene-gu ducu.

²⁶ Pien lubaŋa pa lurok ducu gin cal jogi apaya, ento Rwot aye oketo polo.

²⁷ Deyo ki dit tye bote, tek ki yomcwiny tye ka ma en bedo iye.

²⁸ Wun kaka me rok ducu, wumi deyo bot Rwot, wumi deyo ki tek bot Rwot!

²⁹ Wumi deyo bot Rwot muporo nyiŋe; wukel gityer, wubin wa i nyime! Wuwor Rwot ki boŋo maleŋ;

³⁰ komwu omyel i nyime, wun lobo ducu; ada, lobo ocuŋ matek ma pe yeŋŋe.

³¹ Polo iye obed yom lobo bene obed ma cwinye yom, dano guwac i kin lurok ni, “Rwot tye ka loc!”

³² Wek nam omor, ki gin mupoŋ iye, poto bene oum, ki jami ducu ma tye iye!

³³ Yadi ma i buŋa ducu gibiwer ki yomcwiny i nyim Rwot, pien obebino ka ŋolo kop i kom lobo.

³⁴ Wumi pwoc bot Rwot, pien en ber; mar mere ma pe lokke bedo nakanaka!

³⁵ Wuwac bene ni, “Larwa, ai Lubaŋa lalarwa, icokwa ci ilarwa ki i kin lurok, wek wapwo nyiŋi maleŋ, waum ka wapaki.

³⁶ Gipwo Rwot, Lubaŋa pa Icrael, nia con ki con nio nino ma pe tum!” Lwak ducu gugamo ni, “Amen!” ci gupako Rwot.

Giketo Lulevi pi tic i kom canduk pa Lubaua

³⁷ Daudi oweko Acap ki utmegine i nyim canduk me gicikke pa Rwot wek gubed ka tic kunnu i nyim canduk pa Rwot kit ma mitte kwede i nino acel acel,

³⁸ ka dok Obed-edom ki utmegine pyerabicel wiye aboro, kun Obed-edom wod pa Jedutun ki Koca gubedo lugwok-doggola.

³⁹ Dok oweko ajwaka Jadok ki utmegine ma gin ajwagi wa i nyim kema pa Rwot i ka woro Lubaŋa i wi got ma tye i Gibeon,

⁴⁰ pi tumo gitum awaŋa bot Rwot i wi keno tyer me gitum awaŋa, kun lubo lok ducu ma gicoyo i cik pa Rwot ma yam ociko ki io Icrael.

⁴¹ Ki Eman ki Jedutun gunywako tic kwedgi, kacel ki jo mukene ma yam giyerogi ki nyiŋgi pi miyo pwoc bot Rwot pi mar mere ma bedo nakanaka.

⁴² Eman ki Jedutun onoŋo gitye ki tura ki atego agoya pi wer agoya, ki jami agoya mukene ma gigoyo i kare me wero wer maleŋ, Litino awobe pa Jedutun yam giketogi pi gwoko doggola ot pa Rwot.

⁴³ Ci lwak ducu guket, dano acel acel odok i ode, ki Daudi bene odok i pacone ka lamo gum i kom jone.