1 Tekwaro 15 - Acoli Baibul

Gikelo canduk pa Lubaŋa i Jerucalem

¹ Daudi ogero odine i gaŋ kai pa Daudi, ci oyubo kabedo pi canduk pa Lubaŋa, ocako guro kema pire.

² Daudi dok owacci, “Dano mukene pe bitiŋo canduk pa Lubaŋa, ento Lulevi keken, pien Rwot yam oyerogi pi tino canduk pa Rwot ki pi tiyo bote matwal.”

³ Daudi ocoko jo Icrael ducu otorogi i Jerucalem, pi kelo canduk pa Rwot i kabedone ma yam oyubo pire.

⁴ Ci Daudi ocoko litino awobe pa Aron ki Lulevi kacel, gin ene:

⁵ i kin likwayo pa Kokat, Uriel ma laditgi, kacel ki utmegine miya acel ki pyeraryo;

⁶ i kin likwayo pa Merari, Acaya ma laditgi, kacel ki utmegine miya aryo ki pyeraryo;

⁷ i kin likwayo pa Gercon, Joel ma laditgi, kacel ki utmegine miya acel ki pyeradek;

⁸ i kin likwayo pa Elicapan, Cemaya ma laditgi, kacel ki utmegine miya aryo;

⁹ i kin likwayo pa Kebron, Eliel ma laditgi, kacel ki utmegine pyeraboro;

¹⁰ i kin likwayo pa Ujiel, Aminadab ma laditgi, ki utmegine miya acel ki apar wiye aryo.

¹¹ Daudi dok olwoŋo ajwagi Jadok ki Abiatar, ki Lulevi magi, Uriel, Acaya, Joel, Cemaya, Eliel ki Aminadab,

¹² ci owaco botgi ni, “Wun aye ludito kaka ma i dog odi pa kwarowu ma jo pa Levi; wulonnye kekenwu wubed maleŋ, wun kacel ki utmegiwu, wek wukel canduk pa Rwot, Lubaŋa pa Icrael, i kabedo ma atyeko yubone pire.

¹³ I kare mukwono ca onoŋo Rwot Lubaŋa otugge i komwa, pien pe wun aye onoŋo wutino i kare-nu, pien pe yam wapenyo doge i kit ma cik mito.”

¹⁴ Kit meno ajwagi ki Lulevi gulonnye kekengi pi kelo canduk pa Rwot, Lubaŋa pa Icrael.

¹⁵ Lulevi gucako tiŋo canduk pa Lubaŋa, gulebo ki talle i wi gwokgi, kit ma yam Moses ocikogi kwede, macalo Rwot owaco.

¹⁶ Daudi dok ociko ludito pa Lulevi pi yero utmegigi wek gubed luwer ma gibigoyo jami wer maloŋo, naŋa ki opuk ki atego agoya-gu, me tino dwan malo ki yomcwiny.

¹⁷ Kit meno Lulevi gucako yero Eman wod pa Joel, ka dok Acap wod pa Berekia ki i kin utmegine. I kin likwayo pa Merari guyero utmegigi magi, Etan wod pa Kucaya;

¹⁸ ka dok guyero utmegigi ma i dul me aryo, gin aye Jekaria, Jajiel, Cemiramot, Jekiel, Uni, Eliab, Benaya, Maaceya, Matitia, Elipeleku ki Mikneya, ki lugwok-doggola Obed-edom ki Jeyel.

¹⁹ Luwer magi Eman, Acap ki Etan ticgi obedo me goyo atego mola;

²⁰ Jekaria, Ajiel, Cemiramot, Jekiel, Uni, Eliab, Maaceya ki Benaya ticgi obedo me goyo nana i kit me Alamot;

²¹ ento Matitia, Elipeleku, Mikneya, Obed-edom, Jeyel ki Ajajia gin ticgi obedo me telo wer ki opuk i kit me Ceminit.

²² Kenania, ma en aye latelwer pa Lulevi, ticce me nyuto kit me wer pien en aye niaŋ maber.

²³ Berekia ki Elkana yam gin lugwok-doggola me canduk pa Lubaŋa,

²⁴ Cebania, Jocapat, Netanel, Amacai, Jekaria, Benaya ki Eleajar, ma gin ducu ajwagi, ticgi me kuto tum i nyim canduk pa Lubaŋa, Obed-edom ki Jekia gin bene gubedo lugwok-doggola me canduk pa Lubaŋa.

²⁵ Kit meno Daudi ki ludoŋo pa jo Icrael, ki ludito ma loyo jo alip, gucako wot me omo canduk me gicikke pa Rwot nia ki i ot pa Obed-edom ma cwinygi yom matek.

²⁶ Gucako tumo twoni abiro ki nyogi romi abiro, pien Lubaŋa okonyo Lulevi ma gutiŋo canduk me gicikke pa Rwot.

²⁷ Daudi onoŋo orukke ki jor me camanini maberre, macalo Lulevi ducu ma gutiŋo canduk pa Lubaŋa, kacel ki luwer, ki Kenana ma latel-wer pa luwer ducu; Daudi onoŋo otweyo pyere ki epod me camanini.

²⁸ Yam jo Icrael ducu gukelo canduk me gicikke pa Rwot kit meno, ma giwayo ma rwatte ki koko bila, ki tum, ki atego agoya-gu, kun giwero ki nana ki opuk-gu maloŋo.

²⁹ Ka canduk me gicikke pa Rwot obino wa i gaŋ kai pa Daudi, ci Mikal ma nya pa Caulo obolo wane woko ki i wan dirica oneno kabaka Daudi ka myelo ma cwinye yom, ci obedo ka cayo en ki i cwinye.