1 Tekwaro 14 - Acoli Baibul

Kiram opwoyo ker pa Daudi

¹ Kiram kabaka me Turo yam ocwalo kwena bot Daudi, kun miyo bao yat cedar ki lupa-godi bene ki lupa-bao me gero ot pa Daudi.

² Omiyo Daudi oniaŋ ni Rwot otyeko moko en me bedo kabaka ma loyo Icrael, dok ni otyeko miyo kerre obedo ki deyo madwoŋ pi pilo wi jone jo Icrael.

Litino ma Daudi onywalogi i Jerucalem

³ Daudi dok omedde ki nyomo mon i Jerucalem, ci onywalo awobe ki anyira mukene.

⁴ Magi aye nyiŋ litino ma onywalogi i Jerucalem. Camua, Cobab, Natan, Solomon,

⁵ Ibar, Elicua, Elpelet,

⁶ Noga, Nepeg, Japia,

⁷ Elicama. Beeliada ki Elipelet.

Daudi oloyo jo Piliciti

⁸ Ka jo Piliciti guwinyo ni Daudi doŋ gityeko wire odoko kabaka ma loyo jo Icrael ducu, ci jo Piliciti ducu gucito ka yenyo Daudi; ento Daudi owinyo pigi, okato woko ka lweny i komgi.

⁹ Onoŋo jo Piliciti gubino gumonyo nota Repaim.

¹⁰ Daudi ocako penyo dog Lubaŋa ni, “Ber acit ka lweny i kom jo Piliciti? Ibimiyogi i ciŋa?” Rwot ogamo doge ni, “Citi, abimiyogi i ciŋi.”

¹¹ Daudi ocito wa i Baal-perajim, ci oloyogi kunnu, ci owacci, “Lubaŋa otyeko baro dye lumerok woko ki ciŋa, macalo lalele mucorre.” Mumiyo nyiŋ kabedo meno gilwoŋo ni, Baal-perajim.

¹² Jo Piliciti gutenyo cal jogigi kenyo, ci Daudi ociko pi wanogi woko.

¹³ Jo Piliciti dok gudwogo gumonyo nota meno.

¹⁴ Ka Daudi dok openyo dog Lubaŋa, ci Lubaŋa ogamo ni, “Pe ibicito i komgi atir. Wot iman ŋegi ci ipot i komgi ki ka ma okemo yadi owak.

¹⁵ Ka ce iwinyo kor tyen dano ma gitye ka wot lirukruk ma winnye wa i wi yadi owak, ci doij icit ka lweny, pien Lubaŋa doŋ obetelo nyimwu pi neko mony pa jo Piliciti woko.”

¹⁶ Daudi otiyo kit ma Lubaŋa ocike kwede, ci guneko mony pa jo Piliciti nia ki i Gibeon nio wa i Gejer.

¹⁷ Nyiŋ Daudi oywekoromo lobo ducu, ci Rwot omiyo lworo omako rok ducu i kom Daudi.