1 Tekwaro 13 - Acoli Baibul

Daudi okelo tam me kela canduk pa Lubaŋa i Jerucalem

¹ Daudi yam oyubo lok ki ludito ma loyo buca mony me jo alip ki buca mony me jo miya, ki ludito ma i dul acel acel.

² Ci Daudi oloko ki kacokke pa jo Icrael ducu kun wacci, “Ka ce bedo ber botwu, ma Rwot Lubaŋawa bene mito, ci wacwalu kwena orom kin utmegiwa ma gudoŋ i lobo Icrael ducu, kacel ki ajwagi ki Lulevi ma i gaŋi ma gitye ki lobo me kakwatgi, wek gubin gucokke kacel botwa.

³ Ka wek doŋ wakelu canduk pa Lubaŋawa botwa, pien i kare pa Caulo yam watenyo woko ata.”

⁴ Ci kacokke ducu oye ni gitim kit meno, pien lokke onen atir bot lwak ducu.

Daudi ocito ka omo canduk pa Lubaŋa

⁵ Daudi ocoko jo Icrael ducu cakke ki i Cikor ma i Ejipt nio wa i yo ma donyo i Kamat, pi kelo canduk pa Lubaŋa ki i Kiriat-jearim.

⁶ Daudi ki jo Icrael ducu gucito i Baala, ma en aye Kiriat-jearim ma tye i Juda, ka omo canduk pa Lubaŋa woko ki kunnu, en aye canduk ma gilwoŋo ki nyiŋ Rwot ma bedo i wi komker malo ka wi lukerubi.

⁷ Ci gutiŋo canduk pa Lubaŋa i wi gadigadi manyen, gukelo woko nia ki i ot pa Abinadab, ci Uja ki Akio gubedo ka Leko twoni ma ywayo gadigadi.

⁸ Daudi ki jo Icrael ducu gubedo ka yarre ki myel ki yomcwiny i nyim Lubaŋa ki kero komgi ducu, ki wero wer-gu, ki goyo opuk-gu ki nana-gu ki ajaa-gu, ki atego agoya-gu ki tum-gu.

⁹ Ka guo i laro moyo pa Kidon, Uja ocwalo cine pi mako kom canduk, pien onoŋo twoni gucato.

¹⁰ Ci kiniga omako Rwot i kom Uja, ci oneke woko pien onoŋo oketo ciŋe i kom canduk; oto woko kunnu i nyim Lubaŋa,

¹¹ Ci kiniga omako Daudi, pien Rwot otugge i kom Uja; mumiyo kabedo-nu gilwoŋo ni Perej-uja nio wa onyoo.

¹² Daudi obedo ki lworo i kom Lubaŋa i nino meno; owacci, “Abikelo canduk pa Lubaŋa wa paco bota niŋniŋ?”

¹³ Kit meno omiyo Daudi pe otero canduk wa i gaŋ kal pa Daudi, ento onak kwede woko i ot pa Obed-edom ma jo Gat.

¹⁴ Canduk pa Lubaŋa obedo i ot pa Obed-edom pi dwe adek; ci Rwot omiyo gum ‘bot Obed-edom ki jone ducu.