1 Tekwaro 12 - Acoli Baibul

Lukony Daudi i Jiklag

¹ Jo magi yam gubino bot Daudi i Jiklag, i kare ma piny odiyo ma doŋ pe twero wot ka mo pi Caulo wod pa Kic; gin aye onoŋo gitye i kin twoni oteka ma gubedo ka konye i lweny.

² Gin wegi atum; gin yam gicelo atero nyo gibayo kidi kadi ki ciŋgi ma lacuc ki lacam bene. Gin onoŋo jo pa Benjamin, ma i kaka pa Caulo-gi.

³ Laditgi obedo Akiejer, ka dok Yoaci gin aryo ducu litino pa Cema me Gibea; ka dok Jejiel ki Pelet ma awobe pa Ajimavet; ki Beraka, Yeko me Anatot.

⁴ Icmaya me Gibeon, twon oteka ma i kin jo pyeradek ca, en ladit ma loyo jo pyeradek-ku; Jeremia, Jakajiel, Yokanan, Jojabed me Gedera,

⁵ Elujai, Jerimot, Bealia, Cemaria, Cepatia ma jo Karup;

⁶ Elkana, Icia, Ajarel, Joejer ki Jacobeam, ma gin jo pa Kora,

⁷ ki Joela ki Jebadia, gin awobe pa Jerokam me Gedor.

⁸ Oteka ma guŋiyo ki lweny ma i kin jo pa Gad gugwarre gucito bot Daudi i kakannene ma i tim, oyi ta ma giŋeyo lweny ki kwot ki toŋ, ma wangi nen calo wan labwor, ma gidwir calo til ma i godi.

⁹ Gin ene: Ejer ma laditgi, me aryone Obadia, me adekke Eliab,

¹⁰ me aŋwenne Micimana, me abicce Jeremia,

¹¹ me abicelle Atai, me abirone Eliel,

¹² me aborone Yokanan, me aboŋwenne Elijabad,

¹³ me aparre Jeremia, me apar wiye acelle Makibanai.

¹⁴ Jo Gad magi ducu gin ludito ma loyo mony; ludito matinone giloyo jo miya, ki maditone loyo jo alip.

¹⁵ Magi gin aye jo ma yam guŋolo Jordan i dwe mukwono, i kare ma onoŋo piine opoŋ woko Libyeny nio wa i tura ci guryemo jo ma gitye i nota ducu, ma yo tuŋ wokceŋ ki yo tuŋ potoceŋ.

¹⁶ Ka dok jo pa Benjamin mogo, ki pa Juda, gubino bot Daudi i kakannene.

¹⁷ Daudi okato woko ka jolo wigi, kun waco botgi ni, “Ka ce wubino bota ki cwiny me wat pi konya, ci abibedo kwedwu ki yomcwiny. Ento ka ce wubino ka umo waŋa wek wumiya bot lumerokka, kadi bed an cwinya leŋ, ci Lubaŋa pa kwarowa myero onen ci oŋol gire.”

¹⁸ Ci Cwiny pa Lubaŋa obino i kom Amacai, ma en aye ladit pa jo pyeradek ca, ci owacci, “Wan wa lwakki, in Daudi, wabibedo kwedi, in wod pa Yece. Kuc, kuc obed kwedi, kuc bene obed i kom lukony in! Pien Lubaŋani aye tye ka konyi.” Daudi ojologi, ci oketogi gubedo ludito me buca monnye.

¹⁹ Jo pa Manace mogo gulokke bot Daudi i kare ma obino ki jo Piliciti ka lweny i kom Caulo. Kadi bed kumeno en pe omedo ki konyogi pien ludito pa jo Piliciti guyubo lok i kome, ci guryeme woko, kun giwacci, “Ka ce bidok bot laditte Caulo, ci doŋ wato oke.”

²⁰ Jo pa Manace ma gudonyo bote i kare ma en cito i Jiklag gin ene: Adina, Jojabad, Jediael, Mikael, Jojabad, Eliu ki Jiletai, ma gin aye ludito ma loyo jo alip ma i Manace.

²¹ Gukonyo Daudi ki lweny i kom buca mony pa luyak; pien onoŋo gin ducu twoni oteka lweny ma ludito me mony,

²² Dano gibino ka konyo Daudi nino ki nino, nio ka gudoko cwar mony madit, ma rom ki mony pa Lubaŋa.

Mony ma Daudi obedo kwede i Kebron

²³ Magi gin aye wel dul buca mony ma guruko lweny ma yam gubino bot Daudi i Kebron pi dwoko ker pa Caulo i ciŋe, kit ma yam Rwot owaconi.

²⁴ Jo pa Juda ma wegi kwot ki toŋ onoŋo giromo alip abicel ki miya aboro ma guruko lweny.

²⁵ Ki jo pa Cimon ma twoni oteka lweny alip abiro ki miya acel.

²⁶ Jo pa Levi alip aŋwen ki miya abicel.

²⁷ Ka dok Yekoyada ma loyo jo me ot pa Aron obino ki jo alip adek ki miya abiro.

²⁸ Jadok latin awobi ma twon oteka obino ki ludito wi mony pyeraryo wiye aryo ma i dog ot pa wonne kikome.

²⁹ Jo pa Benjamin ma lukaka pa Caulo gubino ma romo alip adek; jo mapol ki i komgi yam gubedo ka cwako kor ot pa Caulo nio wa i kare meno.

³⁰ Jo pa Epraim gubino ma romo alip pyeraryo ki miya aboro, ma gin oteka lweny ma nyiŋgi oywek i dog odi pa kwarogi.

³¹ Jo ma i nucu kaka pa Manace gubino ma romo jo alip aboro ma giyerogi ki nyiŋgi wek gubin ka keto Daudi kabaka.

³² Jo pa Icakar, jo ma onoŋo giŋeyo kare dok giŋeyo gin ma myero Icrael oti, gubino ki ludito miya aryo ki lukakagi ducu ma i te locgi.

³³ Jo pa Jabulon gubino ki jo ma gunyebbe ki lweny ma romo alip pyerabic, ma gurukke pi lweny ki jami lwenygi ducu pi konyo Daudi ki cwinygi acel.

³⁴ Jo pa Naputali gubino ki ludito wi mony ma romo alip acel ma gitye ki danogi alip pyeradek wiye abiro ma gutiŋo kwot ki toŋ.

³⁵ Jo pa Dan gubino ki jo alip pyeraryo wiye aboro ki miya abicel ma guyubbe pi lweny.

³⁶ Jo pa Acer gubino ki jo ma gunyebbe ki lweny ma romo alip pyeraŋwen, ma doŋ guyubbe pi lweny.

³⁷ Jo pa Reuben, jo pa Gad ki nucu kaka pa Manace ma gua loka Jordan gubino ma romo alip miya acel ki pyeraryo ma gurukke ki jami lwenygi ducu.

³⁸ Lulweny magi ducu gurwayo ma guryeyo kikore, gubino kwede wa i Kebron ki cwiny mukemo keto Daudi kabaka ma loyo Icrael ducu; kit meno jo Icrael ducu mudoŋŋe gubedo ki cwiny acel me keto Daudi kabaka.

³⁹ Ci gubedo ki Daudi kunnu pi nino adek kun gicamo, gimato bene, pien onoŋo utmegigi gutyeko yubbe pigi.

⁴⁰ Dok jo ma gicok kwedgi bene, ma gua wa ki i lobo Icakar ki Jabulon ki Naputali gucom ki cam ma giketo i wi kana, ki kinaga, ki kana madito ki twoni-gu; gukelo lwak moko kwon madwoŋ, ki poki otini, ki dog tuga olok mutwo-gu, ki koŋo vino, ki moo-gu, ki twoni ki romi, pien onoŋo yomcwiny tye i Icrael.