1 Tekwaro 11 - Acoli Baibul

Daudi odoko kabaka me Icrael kacel ki Juda

¹ Lacen jo Icrael ducu gucokke bot Daudi i Kebron, ci guwacci, “Nen ba, wan aye wa cogo komi ki riŋo komi.

² I kare macon ca, wa i kare ma onoŋo Caulo aye kabaka ma loyowa, in yam itelo wi jo Icrael ka gicito ka lweny, idwokowa paco bene, Rwot Lubaŋani bene nene owaco boti ni, ‘In aye ibibedo lakwa lwakka jo Icrael, dok ibibedo laker ma loyogi.’ ”

³ Kit meno ludoŋo pa jo Icrael ducu gubino bot kabaka i Kebron. Kabaka Daudi oketo gicikke kwedgi i Kebron i nyim Rwot, ci guwiro Daudi obedo kabaka ma lo yo jo Icrael, kit ma yam Rwot oloko ki i dog Camuel.

Daudi omayo got Cion

⁴ Daudi ki jo Icrael ducu gucito i Jerucalem, ma en aye Jebuc, ka lweny i kom jo Jebuc ma gibedo i lobo kunnu,

⁵ Jo ma gibedo i Jebuc onoŋo guwaco bot Daudi ni, “In pe ibidonyo kany.” Ento Daudi ocito omayo gogo me Cion woko, ci odoko gaŋ kalle.

⁶ Daudi owacci, “Dano ma bikwoŋo neko jo Jebuc, en aye bibedo ladit ma lawimony.” Ci Joab wod pa Ceruya okwono ito kunnu ci en odoko laditgi.

⁷ Daudi ocako bedo i cel gogo, mumiyo gilwoŋo ni, Gaŋ kai pa Daudi.

⁸ Daudi ogero gaŋ madit orumo woko likiŋ, cakke ki i Millo; Joab ogero odi mukene ma i gaŋ ma yam oballe.

⁹ Daudi omedde odoko dit twatwal, pien onoŋo Rwot me mony aye tye kwede.

Twoni oteka lweny pa Daudi

¹⁰ Magi gin aye ludito ki i kin twoni oteka lweny pa Daudi, jo ma yam gumiyo kony matek i kerre, kacel ki jo Icrael ducu, ci guketo en me bedo kabaka, kit ma onoŋo Rwot yam oloko i kom Icrael.

¹¹ Man aye lok kom twoni oteka lweny pa Daudi: Jacobeam ma jo Kakmon en aye ladit pa jo adek-ki; en yam okato ki toŋŋe i kom jo miya adek, ci onekogi woko ducu lawaŋacel.

¹² Ŋat ma lubo en ki i kin twoni oteka rweny acel-ki en aye Eleajar wod pa Dodo ma jo Akoki.

¹³ En obedo kacel ki Daudi i Pac-dammim i kare ma jo Piliciti gucokke ka lweny kunnu. Poto onoŋo tye kunnu ma cayiri ocek iye mabup, ci lwak ocako riŋo woko ki i nyimjo Piliciti.

¹⁴ Ento en ocamo co ci ocuŋ i dye poto pi laro, ocako neko jo Piliciti, ci Rwot olarogi ki loc madit twatwal.

¹⁵ Jo adek ki i kin ludito pyeradek-ki gulor piny wa i got ka ma Daudi bedo iye i boro Adullam; onoŋo mony pa jo Piliciti ogony i nota Repaim.

¹⁶ I karenu onoŋo Daudi tye i kakannene, ki cel gogo pa Lupiliciti onoŋo tye i Beterekem,

¹⁷ Daudi oloko ki miti madwoŋ ni, “Kono ŋatti mo ocito ka twomo pii ki i wan it Beterekem ma tye cok ki dog gaŋ ca, omiya amati, kono ber mada!”

¹⁸ Ci twoni lweny adek-ku gucito gubaro dye gony pa jo Piliciti, gutwomo pii ki i wan it Beterekem ma tye cok ki dog gaŋ ca, ci gukelo bot Daudi. Ento Daudi pe omato; otiŋo oliyo piny i nyim Rwot pi gityer amata,

¹⁹ kun wacci, “Pe obed kumeno ki i nyim Lubaŋana, an pe myero atim kit man. An aye dok amato remo pa jo-ni? Pien gukelo pi dyero komgi.” En aye lok mumiyo pe omato pii meno. Twoni lweny adek-ku yam gutimo kit meno.

²⁰ Abicai omin Joab onoŋo ladit i kin jo pyeradek-ki. Otiŋo toŋŋe olwenyo i kom jo miya adek ci onekogi woko ducu, ma omiyo nyiŋe oywek ma mito rom ki jo adek ca.

²¹ Pienno olimo yweka madit ki i kom jo pyeradek-ki, ci odoko ladit wi monygi; ento pe olimo rwom pa jo adek ca.

²² Ki Benaya wod pa Yekoyada obedo twon oteka ma i Kabjeel, latim gin madito; en oneko awobe aryo ma gin twoni labwor me Moab. En bene olor odonyo i bur ci oneko iye labwor i kare ma pee ocwer mapek,

²³ Ka dok oneko Laejipt mo, dano ma kome pek ma borre romo futi abiro ki nucu. Laejipt meno onoŋo tye ki toŋŋe i ciŋe ma rom ki rii yat lacwe boŋo; ento en Benaya ocito bote ki odoone, ci oyuto toŋ woko ki i cin Laejipt, ka oneke kwede woko ki toŋŋe-nu.

²⁴ Benaya wod pa Yekoyada otimo gin madito kit meno, omiyo nyiŋe olimo yweka madit ma mito rom ki twoni lweny adek-ki.

²⁵ Nyiŋe oywek i kin jo pyeradek-ki, ento pe olimo rwom pa jo adek ca. Daudi oketo en obedo ladit pa jo ma gwoko en kabaka.

²⁶ Twoni oteka lweny ma i kin lumony gin aye Acael ma omin Joab, Elkanan wod pa Dodo me Beterekem,

²⁷ Camot me Karod, Kelej ma jo Palti,

²⁸ Ira wod pa Ikec me Tekoa, Abiejer me Anatot,

²⁹ Cibekai ma Lakucat, Ilai ma jo Akoki,

³⁰ Makarai me Netopa, Keled wod pa Baana me Netopa,

³¹ Itai wod pa Ribai me Gibea pa jo Benjamin, Benaya me Ptraton,

³² Kurai ma bedo i nota ora me Gaac, Abiel me Arba,

³³ Ajimavet me Bakarum, Eliaba me Caalbon,

³⁴ Kacem ma jo Gijon, Yonacan wod pa Cage ma jo Karar,

³⁵ Akiam wod pa Cakar ma jo Karar, Elipal wod pa Ur,

³⁶ Keper ma jo Mekerat, Akija ma jo Pelon,

³⁷ Kejero me Karmel, Naarai wod pa Eiibai,

³⁸ Joel omin Natan, Mibkar wod pa Agri,

³⁹ Jelek ma jo Ammon, Nakarai me Beerot ma latin jami lweny pa Joab wod pa Jeruya,

⁴⁰ Ira ma jo Itri, Gareb ma jo Itri,

⁴¹ Uria ma jo Kit, Jabad wod pa Aklai,

⁴² Adina wod pa Cija ma jo pa Reuben, ma ladit i kin jo pa Reuben, en aye obedo ki jone pyeradek bene;

⁴³ Kanan wod pa Maaka ki Yocapat ma Lamitini,

⁴⁴ Ujia ma jo Acitera, Cama ki Jeyel ma awobe pa Ketam me Aroer,

⁴⁵ Jediael wod pa Cimri ki ominne Joka, ma Latiji,

⁴⁶ Eliel ma jo Makavi, ki Jeribai ki Jocavia ma awobe pa Elnaam, ki Itima ma jo Moab,

⁴⁷ Eliel ki Obed, ki Jaciel ma jo Mejoba.