1 Luker 12 - Acoli Baibul

Jo Icrael gujemo i kom Rekoboam

¹ Rekoboam ocito i Cekem, pien onoŋo jo Icrael ducu gumol gucito i Cekem ka keto en me bedo kabaka.

² Ka Jeroboam wod pa Nebat owinyo pire, ci oa ki i Ejipt odok cen; pien onoŋo Jeroboam pud tye i Ejipt ka ma yam oriŋo iye kabaka Solomon.

³ Gicwalo lukwena ka lwone, ci Jerobaom ki lwak jo Icrael ma gucokke ducu guwaco bol Rekoboam ni,

⁴ “Woru oketo yec mapek i komwa. In doŋ ilok tic matego ma woru omiyowa, ki yec mapek ma en oketo i komwani obed mayot, ci wan wabibedo luticci.”

⁵ Rekoboam ogamo ni, “Koŋ wudok cen wubed kunnu nino adek, ka dok wudwog bota kany.” Ci lwak gudok cen.

⁶ Kabaka Rekoboam ocako poro lok ki ludoŋo muteggi, ma yam gicuŋ i nyim wonne ka miye tam i kare ma en pud kwo, ci openyogi ni, “Wun wumiya kit tam aŋo wek adok iye bot lwak man?”

⁷ Gin guwacce ni, “Ka ce tin imito bedo latic pa lwak man kun itiyo pi konyogi, iloko botgi lok mabeco i kare ma ibidok iye i penygi, ci gin bene gibibedo luticci matwal.”

⁸ Ento en obwoto lam pa ludoŋo muteggi woko, ocako dok poro lok ki awobe ma yalwakke, ma gicuŋ i nyime,

⁹ Openyogi ni, “Wun wumiya kit tam aŋo wek adok iye ki lwak man ma gupenyo ni, ‘Wek yec ma woru oketo i komwa mapek-ki obed yot.”?”

¹⁰ Ci awobe ma yalwakke guwacce ni, “Ibidok iye bot lwak ma gupenyi kit man ni, ‘Woru yam omiyo yecwa odoko pek, ento in imi obed yot botwa’; in ibidok iye ki gin kit man ni, ‘Nyig ciŋa kinoŋ makato pyer wora.

¹¹ Doŋ abitiyo kit man: wora yam oketo yec mapek i komwu, an doŋ abimedo bedo mapek; wora yam pwodowu ki del anino, an abipwodowu ki yib otoŋ.’ ”

¹² Jeroboam ki lwak ducu gubino bot Rekoboam i kom nino me adekke, kit ma onoŋo kabaka ocikogi,

¹³ Kabaka odok i peny pa lwak ki gero, pien oweko tam ma ludoŋo muteggi gumiye.

¹⁴ Oloko kwedgi kit ma awobe guyubo kun wacci, “Wora yam omiyo yecwu odoko pek, ento an abimedo bedo mapek. Wora yam pwodowu ki del anino an abipwodowu ki yib otoŋ.”

¹⁵ Gin mumiyo kabaka pe owinyo lok pa lwak, pien Rwot aye omiyo okwero, wek lokke ocobbe kakare ma yam en oloko bot Jeroboam wod pa Nebat kun ocwalo Akija ma jo Cilo ocito otito bote-ni,

¹⁶ Ka jo Icrael guneno ni kabaka pe owinyogi, ci lwak gudok iye bote ni, “Wan watye ki ‘wan po kwa aŋo i kom Daudi? Pe watye ki dul mo i kom latin pa Yece. Wun jo Icrael wudok i kemawu! In Daudi, doŋ inen odi keni.” Ci jo Icrael gupokke woko gudok i pacogi.

¹⁷ Ento Rekoboam pud loyo jo Icrael ma gibedo i gaŋi ma i Juda,

¹⁸ Kabaka Rekoboam ocwalo Adoram botgi, ladit ma loyo t ic muroni, ci jo Icrael ducu gucele ki got, guneke woko, Kabaka Rekoboam orune oito i gadigadi lwennye oriŋo kwede woko i Jerucalem.

¹⁹ Kit meno-jo Icrael gujemo woko i kom luker me ot pa Daudi cakke ki i kare-nu nio kwede wa onyoo.

²⁰ Ka jo Icrael guwinyo ni Jeroboam odwogo, ci gucwalo kwena gulwoŋe, ci obino bot lwak ma gucokke, lwak gukete me bedo kabaka ma loyo jo Icrael ducu, Pe tye ŋatti mo ma dok olubo kor ot pa Daudi, kono kaka pa Juda keken.

Lok ma lanebi Cemaya otito

²¹ Ka Rekoboam odwogo cen Jerucalem, ocoko jo ma giyero ki i kaka pa Juda ducu ki i kaka pa Benjamin, twoni lweny alip miya acel ki pyeraboro, pi lweny ki jo me ot pa Icrael wek gudwok ker bot Rekoboam wod pa Solomon,

²² Ento lok pa Rwot obino bot dano pa Lubaŋa ma nyiŋe Cemaya kun wacci,

²³ “Wac bot Rekoboam wod pa Solomon ma kabaka me Juda, ki bot jo ducu me ot pa Juda, ki jo pa Benjamin, ki bot jo mukene ducu ni,

²⁴ ‘Rwot owaco ku man ni, Wun pe wubicito ka lweny i kom lutuwu ma gin jo Icrael. Wek dano acel acel odok cen i pacone, pien lok man oa ki bota.’’’ Gin ducu guwinyo lok pa Rwot, ci gudok cen i pacogi, kit ma Rwot owaco-ni.

Jeroboam omiyo jo Icrael gubwoto woro Lubaŋa i Jerucalem

²⁵ Jeroboam ogero gaŋ Cekem i lobo godi me Epraim, ci obedo kunnu; ka dok oa ki kunnu ocito ogero gaŋ Penuel.

²⁶ Ka dok ocako lwodo lok ki i cwinye ni, “Kit ma tye-ni, ker bidok woko cen i ot pa Daudi.

²⁷ Pien ka ce lwak gibedo ka wirre ka tyero gitum wa i Jerucalem ka ma ot pa Rwot tye iye-ni, ci miyo cwiny lwak man bidok woko i kom rwotgi Rekoboam ma kabaka me Juda, ci miyo gibineka woko ka gidok bot Rekoboam kabaka me Juda.”

²⁸ Kit meno kabaka ocako yubo lok ci otiyo cal litino twoni aryo me jabu, ka owaco bot lwak ni, “Wun doŋ wubedo ka wirre wa i Jerucalem twatwal, meno doŋ oromowu, Doŋ wunen lubaŋawu, wun jo Icrael, ma yam gukwanyowu woko ki i lo bo Ejipt.”

²⁹ Jeroboam oketo cal wod twon acel i Betel, ka dok oketo acel i Dan.

³⁰ Lok man odoko bal, pien jo Icrael gucako mol gicito bot wod twon acel ma tye i Betel, ki bot mukene ma tye i Dan,

³¹ Jeroboam dok ogero odi me woro Lubaŋa i wi godi, kun keto iye ajwagi ma okwanyogi ki i kin lwak ata, ma pe gin jo Levi.

³² Dok oketo nino madit obedo i dwe me aboro, i kom nino dwe apar wiye abic, ma rom ki nino madit ma bedo i Juda-ni, ci ocako tyero gitum i kom ke no tyer. Obedo ka tiyo kit meno i Betel, kun tyero gitum bot cal litino twoni ma en otiyo-ni. Dok oketo i Betel ajwagi ma okwanyo ki i kabedo me woro Lubaŋa i wi godi ma en oyubo-ni,

³³ Oito i keno tyer ma en otiyo i Betel i dwe me aboro, i nino dwe apar wiye abic, i nino ma cwinye otamo-ni; oketo nino madit pi jo Icrael, dok oito bene i keno tyer ka wano odok eceta,