1 Luker 11 - Acoli Baibul

Bal pa Solomon me bwoto woro Lubaŋa

¹ Kabaka Solomon obedo ka maro mon mapol: ma anyira rok mapatpat, Onyomo nya pa Parao, ki anyira Moab, ki anyira Ammon, ki me Edom ki me Cidon ki pa jo Kit-gu.

² Onyomogi ki i rok ma yam Rwot ojuko jo Icrael i komgi kun waco ni, “Pe wubinyomo anyiragi, kadi wa gin bene pe gibinyomo anyirawu, pien ada miyo giloko cwinywu dok cen ka lubo lubaŋagi.” Ento Solomon cwinye omaro anyira-nu matek,

³ En obedo ki mon miya abiro ma gin ducu anyira pa luker, ki mon mukene ma aŋeca miya adek; ci monne guloko cwinye woko ada.

⁴ Ka Solomon doŋ oti woko, ci monne guloko cwinye odok i kom lubaŋa mogo mukene, omiyo pe obedo ki leŋic i kom Rwot Lubaŋane, kit ma yam wonne Daudi obedo kwede.

⁵ Solomon ocako lubo kit pa jok ma dako pa jo Cidon ma nyiŋe Acitoret, ki jok kipyeda pa jo Ammon ma gilwoŋo Milkom.

⁶ Kit meno Solomon otiyo gin ma nen marac i wan Rwot, pe doŋ tiyo gin ma Rwot mito ki cwinye ducu, kit ma yam wonne Daudi otiyo-ni.

⁷ Solomon dok ogero wan jok me woro Kemoc ma jok kipyeda pa jo Moab, ki me woro Molek ma jok kipyeda pa jo Ammon; oketo wan jogigi i wi got ma i ŋet Jerucalem yo tuŋ wokeen.

⁸ Obedo ka timo kit meno pi monne ducu me rok mukene ma giwaŋo odok eceta dok gityero gitum bot lubaŋagi.

⁹ Rwot okeco i kom Solomon, pien onoŋo cwinye doŋ oweko Rwot Lubaŋane woko, ma yam onen bote tyen aryo-ni,

¹⁰ ma yam bene ociko Solomon i kom lok man kun waco bote ni pe olub kor lubaŋa mukene; ento en pe omako cik ma Rwot omiye-ni.

¹¹ Omiyo Rwot owaco bot Solomon ni, “Kit macalo cwinyi tye kit man, ma ikwero mako gicikkena ki cik ma aketo ma aciki kwede, an doŋ abimayo kerri woko, amiyo bot laticci,

¹² Ento pi woru Daudi miyo pe abitimo i kare-ni, ento abimayo woko ki i ciŋ wodi.

¹³ Kadi bed kumeno, pe abikwanyo kerri woko ducu, ento abimiyo kaka acel bot wodi, pi nyiŋ laticca Daudi, ki pi Jerucalem ma yam ayero.”

Lumerok pa Solomon

¹⁴ Rwot okelo merok i kom Solomon, Adad ma jo Edom ma obedo wat pa Luker me Edom.

¹⁵ Onoŋo yam i kare ma Daudi obedo i Edom, Joab ma ladit me mony ocito kunnu pi yiko kom dano ma gineko, ci oneko co woko ducu ma i Edom.

¹⁶ I kare ca Joab ki jo Icrael gubedo kunnu dwe abicel kulu, nio ka gutyeko co ma i Edom woko ducu.

¹⁷ Ento Adad oriŋowoko kacel ki jo Edom mogo ma gin Lutic pa wonne. I kare meno onoŋo Adad pud tidi.

¹⁸ Gua woko ki i Midian gucito i Paran, ci gukwanyo co mogo ki i Paran gucito kwedgi i Ejipt bot Parao kabaka me Ejipt. Parao omiyo ot bot Adad ki cam, wa ki lobo bene.

¹⁹ Adad olimo gum madwoŋ ki bot Parao, Parao dok omiye onyomo ywere ma Lamiŋ dakone kikome ma daker-ri, ma nyiŋe Tapanec.

²⁰ Lamiŋ Tapanec onywalo latin laco ki Adad, nyiŋe Genubat, ci Tapanec omiyo Genubat odono i ot pa Parao kun bedo kacel ki awobe pa Parao.

²¹ Ento ka Adad owinyo ki i Ejipt ni Daudi doŋ oto, ma giyike kacel ki kwarine, ki Joab ma ladit me mony bene otyeko to woko, ci Adad openyo Parao ni, “Wek doŋ aa woko ki boti, adok doŋ i lobowa.”

²² Parao openye ni, “Gin aŋo ma pe inoŋo kany ma, ormyo imito dak woko i lobo tuwu-ni?” Adad ogamo ni, “Koŋ iwek acit mono.”

²³ Lubaŋa dok okelo merok mukene bot Solomon. Okelo Rejor ma wod pa Eliada, ma onoŋo yam oriŋo woko ki bot rwode Adadejer kabili ma Joba.

²⁴ En ocoko dano mapol ma gibedo bote, ci odoko ladit me buca mony pa luyak ki i ŋe nek ma Daudi onekogi kwede, Gucito i Damaciko, gubedo kunnu, ci guketo en obedo kabaka i Damaciko.

²⁵ En obedo Lamerok pa jo Icrael i kare pa Solomon ducu, obedo ka timo tim aranyi kit ma yam Adad timo-ni. Obedo ka loyo lobo Ciria, kun cwinye dagjo Icrael.

Lok ma Lubaŋa oloko bot Jeroboam

²⁶ Dano mukene ma otiŋo ciŋe i kom kabaka Solomon obedo Jeroboam wod pa Nebat, ma jo Epraim me Jereda. En yam obedo latic pa Solomon; minne nyiŋe Jerua ma nene cware oto.

²⁷ Jeroboam otiŋo ciŋe i kom kabaka pi tyen lok man. I kare ca onoŋo Solomon obedo ka gero Millo dok ocego wan cel me gaŋ kal pa wonne Daudi ka ma yam gimuko woko-ni.

²⁸ Jeroboam onoŋo tye ki kero kome ki kwiri bene. Ka Solomon oneno ni en latin awobi ma kome mit i tic, ci omiye dit me loyo tic muroni ducu pa jo me ot pa Yucepu.

²⁹ I kare mo ma Jeroboam oweko Jerucalem okato woko, ci lanebi Akija ma Lacilo orwatte kwede iyo, kun onoŋo Akija oruko boŋo manyen. Gin aryo onoŋo girye kengi i dye tim.

³⁰ Ci Akija olunyo boŋo manyen ma oruko i kome-ni, oyeco iye dul apar wiye aryo.

³¹ Ka ocako lok ki Jeroboam, owacci, “Gam dul boŋo apar-ri iter obed meri, pien Rwot Lubaŋa me Icrael owaco kuman ni. ‘Nen, an acok mayo ker woko ki i ciŋ Solomon, ci abimiyo kaka apar i ciŋi.

³² Ento en bidoŋ ki kaka acel pi nyiŋ laticca Daudi, ki pi Jerucalem ma yam ayero-ni, en aye gaŋ ma yam ayero ki i kin kaka ma i Icrael ducu.

³³ Pien Solomon doŋ otyeko bwota woko, ocako woro gire Acitoret ma jok ma dako ma jo Cidon giworo-ni, ki Kemoc ma jok pa jo Moab, ki Milkom majok pa jo Ammon. En pe doŋ tye ka lubo kora, pe dok tiyo gin ma nen atir i waŋa, pe dok mako cik ma aketo, pe doŋ lubo cikka kit ma yam wonne Daudi olubo-ni.

³⁴ Ento pe abikwanyo ker woko ducu ki i cine kikome; abimiyo en bedo laloc i kare me kwone ducu, pi laticca Daudi ma yam ayero, ma yam gwoko cikka ki cik ma aketo ducu.

³⁵ Ento abikwanyo ker woko ki iciŋ wode, abimiyo boti, gin kaka apar-ri ducu.

³⁶ Ci abimiyo kaka mo acel bot wode, wek laticca Daudi obed ki mac tara i nyima jwijwi i Jerucalem, i gaŋ ma yam ayero me keto iye nyiŋa.

³⁷ Abiketo in Jeroboam ibedo kabaka me Icrael, ci ibiloyo gin ma cwinyi mito ducu.

³⁸ Ka ce ibiwinyo cikka ma aciki kwede, ce ilubo yona, kun itiyo gin ma nen atir i waŋa, pi gwoko cikka ki gin ma aciko ducu kit ma yam laticca Daudi ogwoko-ni, ci abibedo kwedi; an aye abimiyo odi cuŋ matek atika, kit ma yam atimo pi Daudi-ni, dok abimiyo jo Icrael i ciŋi.

³⁹ Abiketo can i kom likwayo pa Daudi, ento canne pe bibedo matwal.’ ”

⁴⁰ Solomon otemo neko Jeroboam ento Jeroboam oa woko, oriŋo i Ejipt bot Cicak kabaka me Ejipt, ci obedo gire i Ejipt nio ka Solomon oto.

To pa Solomon

⁴¹ Lok kom Solomon mudoŋŋe ducu, ki gin ducu ma yam otiyo, ki ryekone, gityeko coyone ducu i buk me kwo pa Solomon.

⁴² Kare ma Solomon oloyo kwede jo Icrael ducu kun bedo i Jerucalem oromo mwaka pyeraŋwen.

⁴³ Solomon oto ci oywe kacel ki kwarine, ka giyiko i gaŋ kal pa wonne Daudi. Rekoboam ma wode aye oleyo ka tyene.