1 Luker 10 - Acoli Baibul

Kabaka ma dako me lobo Ceba olimo Solomon

¹ I kare meno kabaka ma dako me Ceba owinyo pi yweka pa Solomon, ci obino bote ka temo iye ki peny matego.

² Obino i Jerucalem ki lwak jo madito ma gicom i kore, kacel ki kinaga-gu ma giyeyo aŋwece, ki jabu madwoŋ twatwal, ki litino godi me wel, Ka obino bot Solomon, ci otitte lok ducu ma onoŋo tye i cwinye.

³ Solomon odok iye i pennye ducu; pe onoŋo tye lok mo wacel ma okanne ki bot kabaka, ma tucone oloye.

⁴ Ka kabaka ma dako me Ceba oneno ryeko pa Solomon ducu, ki ot ma en ogero,

⁵ ki cam ma i wi mejane, ki kit kabedo pa luditone, ki tic pa luticce ducu, ki boŋŋigi, ki lutin kikopo-gu, ki gitum awaŋa ma en tyero i ot pa Rwot, ci tam otum woko ki i cwinye.

⁶ ‘Owaco bot kabaka ni, “Lok ducu ma i komi ma yam gitero bota ki i lobona, ki lok i kom ryekoni bene, onoŋo lokke tye kakare;

⁷ ento yam pe aye lok ma gitero bota, nio ka abino aneno ki waŋa. Nen, pe gititta kadi wa nucune kulu, pien ryekoni ki lonyoni kato lok dog ma gitero bota.

⁸ Monni gitye ki yomcwiny kuman! Luticci ducu gitye ki yomcwiny ma rom mene, ma gibedo ka cuŋ i nyimi jwijwi ka winyo lok me ryekoni!

⁹ Gipwo Rwot Lubaŋani ma cwinye opwoyo in ci oketi i wi komker me Icrael! Pien Rwot omaro Icrael matwal, en aye mumiyo oketi ibedo kabaka, wek ibed ka ŋolo kop atir dok kakare.”

¹⁰ En omiyo bot Solomon jabu madwoŋ ma romo talanta miya acel ki pyeraryo, ki lwak aŋwece mapatpat madwoŋ twatwal, ki lwak litino godi me wel, Aŋwece pe dok obino madwoŋ ma rom meno ma kabaka ma dako me Ceba omiyo bot Solomon.

¹¹ Dok bene mel ma Kiram kelo ki jabu ma i Opir okelo bao me yat almug madwoŋ twatwal, ki lwak godi matino me wel,

¹² Kabaka otiyo ki bao yat almug pi jeijo kor ot pa Rwot ki kor ot pa kabaka. Otiyo kwede opuk bene ki nana pa luwer. Kit bao me almug macalo meno pe dok obino i lobo, pe dok onen, nio wa onyoo.

¹³ Kabaka Solomon omiyo bot kabaka ma dako me lobo Ceba jami ducu ma cwinye omito, omiye gin ducu ma openyo, omedo ki gin ma en Solomon oyubo pi miyo bote muporo lonyone. Kit meno kaba ka me Ceba ocako wot me dok i lobone kacel ki luticce ducu.

Lonyo pa Solomon ki ywekane

¹⁴ Lwak jabu ma obino bot Solomon i mwaka acel acel pekke onoŋo cok romo ratili alip pyerabiro,

¹⁵ ma pe giribo iye ma obino ki tuŋ bot lucat-wil me paco ki me lobo ma woko, ki ma oa ki bot luker me lobo Arabia ki bot lulo dul lobo mapatpat me lo bo Icrael.

¹⁶ Kabaka Solomon otiyo kwodi madoŋo miya aryo me jabu, ma gitetogi ki nyol; i kom kwot acel acel odonyo iye jabu ma pekke cok romo ratili pyeraryo.

¹⁷ Dok otiyo kwodi matinone miya adek ma gitetogi ki nyol, kun kwot acel acel giteto ki jabu ma pekke cok romo ratili abicel. Kabaka oketogi i ot ma gilwoŋo ni Buŋa me Lebanon.

¹⁸ En dok otiyo komker madit me lak lyec, ci omwono kome woko ki jabu ma giliyo maber,

¹⁹ Komker meno onoŋo tye ki rwomme abicel, ki i ŋe komker giketo iye cal wi wod twon. Ka ŋete tuŋŋi ki tuŋŋi giketo iye ka teno cin dano, ki cal labwor aryo gucuŋ ka ŋet bad kom me teno ciŋ tuŋŋi ki tuŋŋi.

²⁰ Onoŋo tye bene cal labwor apar wiye aryo ma gucuŋ i agikki rwom abicel-li, tuŋŋi ki tuŋŋi tye komker mo ma yam gitiyo ma cal ki meno i te ker ducu.

²¹ Jami ducu ma yam kabaka Solomon mato kwede onoŋo me jabu keken, wa jami ducu ma gitiyo kwedgi i ot Buŋa me Lebanon obedo me jabu ma giliyo maber. Pe tye iye jami me ryal mo acel, pien i kare pa Solomon pe tye ŋatti mo ma otamo pi ryal ni obedo gin mo.

²² Onoŋo co tye ki lwak mel madonone ma giwoto i nam kacel ki mel pa Kiram. Mel man madoŋo-ni ma gilwoŋo ni mel me Tarcic yam dwogo cen ka mwaka okato adek adek kun gikelo jabu ki ryal ki lak lyec-gu, ki ayom-gu ki gunya-gu,

²³ Kabaka Solomon obedo dit makato luker ma wi lobo ducu pi lonyone ki pi ryekone.

²⁴ Dano me lobo ducu gubedo ka yenyo kit yo me neno wan Solomon, ki pi winyo kit ryekone ma Lubaŋa oketo i cwinye-ni.

²⁵ Dano acel acel tero motte bote, kun gitero jami me ryal ki me jabu-gu, ki ginaruka-gu, ki odok murra, ki aŋwece, ki aguragura ki kanagu mwaka ki mwaka.

Solomon lacat aguragura ki gadigadi lweny

²⁶ Solomon ocoko gadigadi lweny ki lulweny ma giriŋo ki aguragura. Obedo ki gadigadi lweny alip acel ki miya aŋwen, ki wegi aguragura alip apar wiye aryo, Oketo mogo i kingi i gaŋi me gadigadi lweny, ki mukene gubedo bote i Jerucalem.

²⁷ Kabaka Solomon Omiyo ryal odoko gin malam ma rom ki gweŋ-gu i Jerucalem, dok okelo yadi cedar mapol ata ma rom ki olam ma i bar Cepela.

²⁸ En yam limo aguragura ma a ki i Ejipt ki Kuc; lucat-wil pa kabaka gamogi ki i Kuc i wel lim ma onoŋo giyubo.

²⁹ Gadigadi lweny ma gia ki i Ejipt welgi onoŋo romo cekel me ryal miya abicel, ki aguragura acel welle cekel miya acel ki pyerabic; ka dok lucat-wil pa kabaka catogi’ bot luker ducu pa jo Kit ki bot luker me Ciria.