1 Jo Korint 13 - Acoli Baibul

Mar

¹ Kadi aloko leb pa dano ki pa lumalaika, ka pe atye ki mar, abedo calo olaŋ ma kok, gara ma wo awoya.

² Ka atye ki mot me tito lok pa Lubaŋa macalo lanebi, ma aniaŋ i muŋ ducu, dok bene noŋo atye ki ŋec ducu, ma atye bene ki niye ducu, ma atwero bene kobo kwede godi madoŋo-gu woko ka mukene, ce pe atye ki mar, ci pe a gin mo.

³ Ka apoko jami ducu ma atye kwede, ma bene amiyo koma ni giwaŋ woko ki mac, ento ka pe atye ki mar, ci pe konya ki gin mo.

⁴ Mar diyo cwinye, dok lakica bene; mar pe lanyeko, pe wakke;

⁵ pe nyatte, pe tiyo gin ma pe myero, pe yenyo gin mukemo en kene; pe bedo ki keccwiny, pe bedo kun keto cwinye i kom gin marac ma gitimo i kome;

⁶ cwinye pe bedo yom i kom tim ma pe atir, ento cwinye bedo yom i lok ada.

⁷ Mar diyo cwinye i kom jami ducu, ye lok ducu,, dok bedo ki gen i kare ducu, keto tek bene me ciro jami ducu.

⁸ Mar pe gik; ento lok atita bitum woko; kadi ki dumo leb bene bigik woko; kadi ŋec bene bitum woko,

⁹ pien wan waŋeyo dul mogo manoknok keken, lutit lok pa Lubaŋa gitito dul mogo manoknok keken;

¹⁰ ento gin makulu ka obino, ci gin ma obedo duldul bigik woko.

¹¹ I kare ma pud an latin, aloko lok calo latin, aparo jami ducu calo latin; ento kombeddi ma doŋ ateggi-ni, doŋ abwoto kit me tino woko.

¹² Gin ma waneno kombeddi cal ki tipo ma nen ribiribi i kiyo; ento i kare ma bino anyim ca wabinenne waŋ ki waŋ. Kombeddi aŋeyo dul mo manok keken, ento i nino ma bino anyim ca abibedo ki ŋec ducu liweŋ, kit macalo Lubaŋa tye ki ŋec ducu i koma-ni.

¹³ Doŋ tye gin adek ma gibedo matwal: niye, gen, mar; ento gin ma pire dit ma katogi ducu en aye mar.