ZACARÍAS 8 - Wuj Pa K'ubultzij

Usujunik i Ajwal

¹ I Ajwal chi ronojel ktiki che xuya i tzijoniki chwe:

² “Iri are Yin chi in Ajwal chi ronojel kintiki che, kinb'ij: Lik kinna jun nim laj selosil chrij i tinimit Sion, selosil chi lik kumi'saj woywal.

³ Xaq kintzalij chik pa Jerusalén, re kinjeqi chila. Are uri i tinimit Jerusalén kb'ix ni Suk'ul laj Tinimit che, xaq jyub' re i Ajwal chi ronojel ktiki che, kb'ix ni Lo'laj Jyub' che.

⁴ I je rijab' achiyab' xaq i je rijab' ixoqib' kekub'i chik pa k'ijib'al ipa kkimol wi kib' i winaq re i tinimit Jerusalén, kkik'am kicho'ab' che kich'amiy rumal k'iyal chik junab' o chke.

⁵ Ral taq alab'om xaq i ral taq altom lik kkinojsaj upam i k'ijib'al ipa kkimol wi kib' i winaq re i tinimit xaq ke'etz'an ni chila.

⁶ Che taq i ij le ronojel ile k-iltaj na chi lik k'ax uch'ob'ik chke i kekanaj kan pintinimit; xwiri chwe Yin lik k'ax taj. Yin in Ajwal chi ronojel kintiki che kinb'ij:

⁷ Yin kwesaj ni intinimit pu'ab' i tinimit chi o prelb'al ij xaq pu'ab' i jun chik chi o puqajb'al ij,

⁸ kink'am na li pa tinimit Jerusalén re kjeqi ni chila. Keje uri ile ike je intinimit na, i Yin in ki-Dios na, ru' suk'ul k'uxij xaq ru' u'atik tzij.”

⁹ Iri are kub'ij i Ajwal chi ronojel ktiki che: “Chikoch'ij iwach, yix chi che taq i iji itom i tzij chi xkib'ij i profeta, che taq li ij are xoksax ukub'ib'al i ja re uyakik tan chik i rachoch i Ajwal chi ronojel ktiki che.

¹⁰ Man arewi k'a che taq i iji nti kajil i winaq xaq i kaway kya'ik. Rumal i ajch'oj chkij, lik nti chomb'al ib' chkixol i winaq; man Yin in-anom chke chi kki'an ch'oj chkiwach.

¹¹ Xwiri wo'or, ni'pa i kekanaj che i tinimiti, kin-an ti chik chke pacha i xin-an chke i jub'an che i nab'e taq ij. Yin in Ajwal chi Ronojel Kintiki Che kinb'ij.

¹² Man i chomb'al ib' lik o ni chkixol ike. I tikb'al uva kwachin na; i ulew kwachin na; i kaj kuya na li uxaq k'aj. Yin kinya ni ronojel ile chke konojel i kekanaj che i tinimiti.

¹³ Keje pacha yix, chi ix aj Judá, xaq ix aj Israel, lik ix k'oqtal chkixol i jub'an chik nimaq taq tinimit, xwiri Yin wo'or kixinto na, i kin-an ni chiwe chi ix are jun utzil chomal. ¡Mixij iwib'! ¡Chikowij ik'ux!”

¹⁴ Iri are kub'ij i Ajwal chi ronojel ktiki che: “Yin inch'ob'om te'eq chi kinya utojb'alil kimak iwatit imam yix ujer are xkipetsaj woywal, lik xinjikb'a intzij.

¹⁵ Xwiri wo'or, inch'ob'om u'anik i utz che i tinimit Jerusalén xaq che i tinimit Judá. Rumali mixij iwib'.

¹⁶ Iri o uchak chi lik arewi ki'an ni yix: Lik arewi chib'ij i saq laj tzij chiwach xaq suk'ul u'atik tzij chi'ana i chitija u'ijol iwib' che i chomb'al ib' pa taq atb'al tzij;

¹⁷ mi'an k'ax che iwib' chiwach xaq mikuxtaj inb'i puwi jun tzij we qatzij taj. Man Yin tzel kwil ni'pa taq ile. Yin in Ajwal, xinb'ij.”

¹⁸ I Ajwal chi ronojel ktiki che xlapan wu' yin, i xub'ij chwe:

¹⁹ “I umayixik wa'im re utz'onoxik che i Ajwal re i ukaj ik', re ujo' ik', re uwuq ik', xaq re i ulajuj ik' lik keu'on na re kikotemal, chi lik nima'ij re kikotemal re umuq uxikin i ma Judá. ¡Yix lik k'ax china i saq laj tzij xaq i chomb'al ib'!”

²⁰ Iri are kub'ij i Ajwal chi ronojel ktiki che: Lik k'a kek'un ni winaq, xaq uk'iyal winaq ke i nimaq taq tinimit.

²¹ Are uri i winaq re jun tinimit ke'e ku' jub'an chik winaq re jun chik tinimit, i kkib'ij chke: ¡Jo', kqatzukuj i Ajwal chi ronojel ktiki che re kqatz'onoj che chi kuya i utzil chomal pqawi! I jub'an chik kkila' ni uwach chke: ¡Xaq keje yoj koj-e na!

²² I kek'un ni pa Jerusalén k'iyal taq tinimit xaq k'iyal nimaq taq tinimit, kolkitzukuj i Ajwal chi ronojel ktiki che xaq kolkitz'onoj i utzil chomal pkiwi.

²³ Che taq i ij le, lajuj achiyab' je aj naj ke i jub'an chik nimaq taq tinimit kkichap ni che u'u' jun aj Judío i kkib'ij ni che: “¡Kqaj enam iwu' yix, man qatom chi i Dios o iwu' yix!”