ZACARÍAS 6 - Wuj Pa K'ubultzij

Ilanik pa wachij re kajib' ch'ich' b'inb'al re ch'oj

¹ Xwil tan chik jun ilanik pa wachij. Xwil kiwinaqirik kajib' kareta re ch'oj chkixol keb' nimaq taq jyub' re anch'ich'.

² I nab'e kareta jek'tal kumal i kaway kaq kij; i ukab' kareta jek'tal kumal i kaway eq kij;

³ I urox kareta jek'tal kumal i kaway saq kij; xaq i ukaj kareta jek'tal kumal i kaway eq-oj kij.

⁴ Xintz'onoj che i ángel chi klapan te wu': “Wajwal, ¿Wach kraj ub'ixkil iri?”

⁵ I ángel xula' uwach chwe: “Iri are i kajib' tew chi ke'el li chwach i Ajwal i ke'e chwach i jyub' ta'aj.

⁶ I kareta chi jek'tal kumal i kaway eq kij k-e che i tinimit pa moxab'; i kareta chi jek'tal kumal i kaway saq kij, k-e pa tinimit puqajb'al ij; i jun chik kareta chi jek'tal kumal i kaway kaqkoj kij, k-e pa tinimit wiqab'.”

⁷ I xe'el b'i kaway kaqkoj kij lik kek'achirik re kemalkat chwach i jyub' ta'aj. I ángel xub'ij chke: “Chixmalkat chwach ronojel i jyub' ta'aj.” Ike keje ile xki'ano.

⁸ Chrijil iri, i ángel xsik'in chwe: “¡Chawila pe', i jub'an chi xe'e pa tinimit moxab' kkiqajsaj roywal i Ajwal che i tinimit le!”

Ukojik ukoron ma Josué

⁹ I Ajwal xub'ij i tzijoniki chwe:

¹⁰ “Chamolo jun qasan chkixol i je k'amtal te b'i pa Babilonia chi ya xetzalij chaloq: Ma Heldai, ma Tobías xaq i ma Jedaías. Te'uri lik che i ij le, jat chi rachoch i ma Josías chi uk'ojol i ma Sofonías.

¹¹ Ru' i an-o'oj xaq i saq-o'oj chi xamolo, cha'ana k'iyal taq koron che, i chakojo jun che ujolom i ma Josué chi atz laj ajsujul sipon, chi uk'ojol i ma Josadac.

¹² I chab'ij che: I Ajwal chi ronojel ktiki che kub'ij, i achi chi ulum kb'ix che, chi kalax tan chik che i ra' xaq kuyak tan chik i rachoch i Ajwal.

¹³ Kuyak tan chik i rachoch i Ajwal xaq kya' ni u'ij chi lik keje pacha re jun ajawinel. Kkub'i ni che i ukub'ib'al chi o u'ij re ku'at tzij, i chutzal ukub'ib'al chi o u'ij le kkub'i ni ajsujul sipon, xaq o ni chomb'al ib' chkixol ike je keb'.

¹⁴ I koron le kekanaj na re kuxtab'al prachoch i Ajwal man kajwax ni che ma Heldai, ma Tobías, ma Jedaías xaq i ma Josías, chi uk'ojol ma Sofonías.”

¹⁵ Kek'un ni winaq aj naj re keton chuyakik i rachoch i Ajwal; keje uri ile kiwetamaj ni yix chi are i Ajwal chi ronojel ktiki che are Ire xinutaq loq. Iri k-antaj na are kita yix uch'awb'al Iwajwal Dios xaq kixkojon ni che.