ZACARÍAS 5 - Wuj Pa K'ubultzij

Ilanik pa wachij re i b'orom tz'um chi o tz'ib' chwach

¹ Xwil tan chik jun ilanik pa wachij. Xwil jun b'orom tz'um chi o tz'ib' chwach, chi ksayay pa tew.

² I ángel xutz'onoj chwe: “¿Wach kawilo?” I xinla' uwach che: “Kwil jun b'orom tz'um chi o tz'ib' chwach, chi ksayay pa tew; i raqan o waqib' xik'ab' che, i unimal uwach o oxib' xik'ab' che.”

³ Are uri xub'ij chwe: “Chila tz'ib'tal wi i k'oqonik chi kuk'ulmaj ronojel i nim laj tinimit. Chrij wach i tz'ib'tal chrij chwach i b'orom tz'um, we o jun kel-anik xaq we o jun kt'oronik kya' ni utojb'alil uri chke.

⁴ I Ajwal chi ronojel ktiki che kub'ij: Yin kintaq b'i k'oqoniki man keje ile kok chi rachoch i kel-anik xaq chi rachoch i jun chi kukuxtaj inb'i xwiri saqil ti kub'ij. I k'oqonik lik kkanaj ni chila k'a kusach ni uwach taq i et re i ja xaq i ab'aj.”

Ilanik pa wachij re i pajb'al xaq i ixoq

⁵ Te'uri xel chali i ángel chi klapan te wu', i xub'ij chwe: “¡Lik chakojo retalil wach kwinaqir wo'or!”

⁶ Xintz'onoj che: “¿Wach ile?” Ire xula' uwach chwe: “Are jun pajb'al. Ile are i pajb'al re mak atzalal ke i je jeqel pa tinimit.”

⁷ I pajb'al ch'uqum ru' jun ch'uqb'al re raxch'ich'. I xyak i ch'uqb'al le, are uri o jun ixoq kul chupam i pajb'al.

⁸ I ángel xub'ij chwe: “I ixoq le are i mak atzalal.” I xutakpuj b'i chupam i pajb'al, xaq xutz'apij uwi ru' i ch'uqb'al re raxch'ich'.

⁹ Xwil tan chik, kiwinaqirik keb' ixoqib'. O kixik', i tew keuyak chikaj. I kixik' keje pacha kixik' i chak'jowox, kik'amom b'i pajb'al pa taq tew.

¹⁰ Are uri xintz'onoj che i ángel chi klapan te wu': “¿Ipa kkik'am b'i i pajb'al le?”

¹¹ Ire xula' uwach chwe: “Kkiyak jun rachoch tiox pa Babilonia. Are ya utzinnaq chik uyakik i ja le, kkiya ni pajb'al le chila puwi ukub'ib'al.”