ZACARÍAS 12 - Wuj Pa K'ubultzij

Totajik re i Jerusalén

¹ Iri are jun tzijonik re i Ajwal chrij i tinimit Israel. I Ajwal chi u'anom i kaj, xaq uya'om ukub'ib'al i ulew, xaq uya'om uk'aslemal i winaq, kub'ij:

² Yin kin-an ni che i tinimit Jerusalén pacha jun tu'b'al uwa'al uva muqb'am chi keu'ab'arsaj ni konojel i nimaq taq tinimit chi je o naqaj. Ike are kkisutij rij i Jerusalén xaq i jub'an chik tinimit re i Judá, k-an ni ch'oj chkij.

³ Che i ij le kin-an ni che i tinimit Jerusalén pacha jun ab'aj chi lik al chke konojel i nimaq taq tinimit. Keusok na xapachin kkaj uyakik i ab'aj le. Konojel i nimaq taq tinimit kkimol ni kib' chrij i tinimit Jerusalén,

⁴ Xwiri yin keinxib'ij ni konojel i kaway xaq kin-an ni ch'uj chke i winaq chi ke'an chkij. Keinchajij ni i je umuq uxikin i tinimit Judá xaq kin-an ni potz' chke konojel i kaway pa nimaq taq tinimit.

⁵ Are kkil iri, i je aj-ok'al utzam i tinimit Judá kkib'ij ni keje iri che kib': I Ajwal chi ronojel ktiki che lik are ki-Dios i je jeqel pa tinimit Jerusalén, xaq are ire kuya kicho'ab'.

⁶ Che taq i ij le kin-an ni chke i je aj-ok'al utzam i tinimit Judá chi je keje pacha jun yab'al a'al chi lik kjuluw chupam i si', keje pacha jun a' chuxol k'iyal yotaj trigo. Kujarsaj nu b'i pa wiqab'im xaq pa moxim chke konojel ni'pa i nimaq taq tinimit aj naqaj, tz'aqat i winaq aj pa tinimit Jerusalén kejeqi ni chik pkitinimit.

⁷ Xwiri Yin in Ajwal, nab'e keinto ni ralk'uwal i tinimit Judá, man keje ile kkinimarsaj ti ki'ij umuq uxikin i mam David xaq i uwinaq i tinimit Jerusalén pkiwi i jub'an chik umuq uxikin i ma Judá.

⁸ Yin in Ajwal, keinchajij ni jub'an chi je jeqel pa tinimit Jerusalén. I jub'an chi lik nti kicho'ab' chkixol ike, lik kpe ni kicho'ab' pacha ucho'ab' i ajawinel ma David, xaq i je umuq uxikin i ma David je keje na pacha i Dios, pacha i ángel re i Ajwal, chi nab'e chkiwach ike.

⁹ Che i ij le kinsachsaj ni uwach xapachin jun nim laj tinimit chi ku'an ch'oj chrij i tinimit Jerusalén.

¹⁰ Kinnojsaj ni ru' utz laj Tewal xaq ru' tz'onb'enik che i Dios pkiwi i je umuq uxikin i ma David xaq pkiwi uwinaq i tinimit Jerusalén. Are uri kkil ni jun chi xkimin i che' ch'ich' utzam puk'alk'ax, keb'ison na xaq ke'o' ni che ire pacha ukamik jun ak'al chi lik xwi ire o te'eq o we ntaj pacha ukamik jun ak'al atz.

¹¹ K-an ni pa Jerusalén jun nim laj b'is, lik nim pacha i b'is chi k-an che i dios Hadadrimón chila chwa ta'aj re i Meguido.

¹² Pa taq alk'uwalxelab', lik chkijujunal na, keb'ison ni pa tinimit: I umuq uxikin ma David xaq i kixoqil; i umuq uxikin ma Natán xaq i kixoqil;

¹³ i umuq uxikin i ma Leví xaq i kixoqil; i umuq uxikin i ma Simei xaq i kixoqil;

¹⁴ Xaq keje jub'an chik alk'uwalxelab' ke'o' na, chkijujunal xaq keje i kixoqil.