Salmos 9 - Wuj Pa K'ubultzij

B'ix re i suk'ul laj u'atb'al tzij i Dios

¹ Ajwal, kwaj katinb'ixaj ru' ronojel ink'ux xaq kwaj ulapik i k'iyal taq chomal chi ka'ano.

² Nim laj Dios, lik awumal yet kwaj kinsik'in ru' nim laj kikotemal, ¡Kwaj kinb'ixaj i b'ix kojb'al a'ij!

³ I je ajch'oj chwij lik ke'anmaj ni chawach; ketzaq na xaq kekam na.

⁴ Yet at suk'ul laj atol tzij: At kub'inaq pakub'ib'al chi o u'ij chu'anik i atb'al tzij pinwi.

⁵ A'atim i je aj-anol i utz taj; achupsam kiwach i itzel laj taq winaq, ¡Ni'pa i kuxtab'al ke lik xachup uwach ronojel ij saq!

⁶ I je ajch'oj xekamik, xwi ta la ile, xaq xsach kiwach kitinimit. Yet xatsachaw kiwach, lik mitene i kuxtab'al ke xaya kanoq.

⁷ Xwiri i Ajwal are Ire a Ajawinel ronojel ij saq; lik uyijb'am chik ukub'ib'al chi o u'ij, anb'al re i atb'al tzij:

⁸ Ku'an ni jun suk'ul laj atb'al tzij puwi i jyub' ta'aj, kuya ni utojb'alil kimak i jalajuj taq tinimit pacha kmajaw chke.

⁹ I Ajwal keuto ni'pa kkitij i k'ax pki'ab' i jub'an chik; Ire lik keuto che i ij are je o pa k'ax.

¹⁰ Ajwal, ni'pa i keta'am awach lik kikub'am kik'ux chawe, yet lik keawo'taj ti ni'pa i katkitzukuj.

¹¹ Chib'ixaj b'ix che i Ajwal, chi krajawin pa tinimit Sion; xaq ronojel ni'pa i u'anom Ire, lik chitzijoj pa jalajuj taq tinimit.

¹² I Dios arewi o chuk'ux ni'pa i je oknaq il, xaq ksach ti chuk'ux ni'pa i ko'ej; rumali Ire kuya utojb'alil chke i ke'anaw i k'ax le.

¹³ Ajwal, chawila tob'al inwach, chawila pe ni'pa i k'ax kintij kumal ni'pa ktitat kipam chwe, ¡Chinawesaj chuxol taq uchija re i kamik!

¹⁴ Man keje ile, chila xol taq uchija re i tinimit Jerusalén, kinb'ij ni chke konojel i winaq re uwach i jyub' ta'aj, chi yet lik kmajaw chawe koksax a'ij ru' b'ix, xaq yin lik kinkikotik man xinato.

¹⁵ I je aj-anol i utz taj ketzaq ni chupam kitzaqsab'al ike; i kaqan kech'api ni kan chupam i tzaqsab'al le, chi lik je are ike je anawnaq.

¹⁶ I Ajwal uya'om retamaxik pachin Ire; ¡Ire u'anom i suk'ul laj atb'al tzij! Man i utz ti laj winaq ktzaq chupam i tzaqsab'al chi are ire yijb'awnaq.

¹⁷ I itzel laj taq winaq xaq i aj-anol i utz taj, ni'pa ksach i Dios chkik'ux, kekik'isa ni chila ipa krajawin wi i kamik;

¹⁸ man arewi kesach ti chk'uxij i nib'a'ib', xaq ronojel ij saq ksach ti uwach i koy-em.

¹⁹ Chatwalijoq Ajwal, maya che i winaq chi kukoj u'ij, ¡Lik cha'ata tzij pkiwi i nimaq taq tinimit!

²⁰ Ajwal, cha'ana chke chi lik kkixij kib'; ¡Cha'ana chke chi kketamaj na chi xa je winaq xaq xa je ik'awel!