Salmos 84 - Wuj Pa K'ubultzij

I rachoch i Dios lik rayijb'al uwach

¹ ¡Lik chom i lo'laj ak'ijib'al, Ajwal Dios, Chi Ronojel Kattiki che!

² ¡Lik ru' ronojel ink'ux kwaj olem chwa taq ja re i lo'laj awachoch xaq ru' ronojel ink'ux kinb'ixaj i b'ix che u-Diosil i k'aslemal!

³ Keje ne i ch'it xaq i wich'il kkiriq kik'ijib'al pa sujb'al sipon chawach, ipa kki'an wi kisok i kak'al, Ajwal Dios, chi Ronojel Kattiki Che, Yet at wajawinel xaq at in-Dios.

⁴ ¡Utz ke ike ni'pa je jeqel pa wachoch xaq kkimayij ti ab'ixaxik!

⁵ ¡Utz ke ike ni'pa kkiriq kitob'al awu', ni'pa kkaj keb'in che ab'e k'a keupon ni puwi ajyub'!

⁶ Are kik'aw che i ta'aj re Uwa'al Wachij, kkijalwachij ni che jun chom laj ya, xaq keje i jab' lik kunojsaj ni uwach che utzil chomal;

⁷ lik knimar ni kicho'ab', xaq chila Sion kkil ni uwach i nim laj Dios.

⁸ Ajwal Dios, Chi Ronojel Kattiki Che, chi at u-Dios ma Jacob, ¡Chata wach kintz'onoj chawe!

⁹ ¡Ajwal Dios, chi at tol qe, utz rilik cha'ana che i jun chi xa'ul pa ajawinel.

¹⁰ ¡Mas utz tupu xa jun ij kink'iji chwa taq ja re awachoch, chwach i lajujwinaq kamo' (1,000) ij chi kink'iji ti pawachoch! Yin lik are kwaj uchajixik uxol uchija re i rachoch in-Dios, chwach kinjeqi pa taq k'ijib'al i pa je o wi itzel laj taq winaq.

¹¹ Man i Ajwal Dios kojuchajij xaq kojrok'aj; i Ajwal k'ax keuna'o xaq kuya ki'ij ni'pa ch'am kik'aslemal, xaq lik nti kuxuyaj chke.

¹² Ajwal Dios, chi Ronojel Kattiki Che, ¡Lik utz ke ike ni'pa kkikub'a kik'ux chawe!