Salmos 81 - Wuj Pa K'ubultzij

Rutzil uk'ux i Dios xaq i utz taj chi kki'an aj Israel

¹ ¡Lik ru' kikotemal chib'ixaj i Dios chi are qacho'ab'! ¡Lik ru' kikotemal chixsik'in chub'ixaxik u-Dios ma Jacob!

² ¡Chixb'ixan ru' usonil i chilchil, ru' i chom laj usonil i arpa, xaq ru' i salterio!

³ Chixut'ij i trompeta are k'ak'al ik', xaq are ktik'i i ik', man are i ij re i nim laj qanima'ij.

⁴ Man iri are i tzij pixab' chi xuya u-Dios ma Jacob chke aj Israel;

⁵ are i taqanik chi xya' che ma José are xch'ojin i Dios chkij aj Egipto. Yin xinta jun ch'awb'al chi lik intom taj:

⁶ Wesam i eqan rij aqul, at wesam chupam i k'ax laj taq chak.

⁷ Chupam i k'ax xinasik'ij, Yin xatinto, xinla' uwach chawe chupam i sutz' are lik ko' upam; xink'am apam chila chuchi' i ya Meriba.

⁸ Yix chi ix intinimit, chita wach kinb'ij chiwe chuxe'el, aj Israel, ¡Lik utz te'eq wetene kixkojon chwe!

⁹ Meaya jub'an chik dios awu', xaq makoj taq ki'ij i tiox le.

¹⁰ Yin in Awajwal Dios, chi xatwesaj li pa Egipto, chajaqa achi' man Yin kinya ni chawe wach i katijo.

¹¹ Xwiri intinimit xkaj ti xinkita; i aj Israel xkaj ti xekojon chwe.

¹² Rumali xewo'taj chupam kib'uyil, xaq ike xki'ano pacha xumaj kiwach.

¹³ Intinimit wetene xinkita, wetene i aj Israel xkaj b'inik chupam inb'e,

¹⁴ Yin lik xa pacha jumutz'aj b'a'wachij kinqajsaj te'eqi ki'ij i je ajch'oj chkij xaq xinya te'eqi utojb'alil chke i ajch'oj chkij.

¹⁵ Ni'pa i kkixutuj i Dios, ketzaq te'eqi pu'ab'; xaq i utojb'alil kimak lik ronojel ij saq uwach.

¹⁶ Xwiri yet katutzuq ni ru' i utz laj trigo, xaq ru' uwa'al kab' re uwach ab'aj katunojsaj na.