Salmos 79 - Wuj Pa K'ubultzij

K'axk'olil rumal usachik uwach i Jerusalén

¹ ¡Ajwal Dios, i tinimit chi kkikoj ti a'ij xkiya kib' chwach awulew! ¡Xkiqajsaj u'ij i lo'laj awachoch, xaq xkiwulijsaj i tinimit Jerusalén!

² I kich'akul awajpatanib' are xekamik, xya' chke i tz'ikin aj chikaj re kkitijo, i kich'akul i je awe yet, chi lik je ch'am, xaq xkiya chke itzel taq chikop.

³ Xekikamsaj konojel, rumali ni'pa kik'el lik pacha ya xlemem pa taq tinimit Jerusalén, xaq nti jun xemuquwik.

⁴ I winaq chi je o chqij chqawach kojkiyo'ya, xaq to' oj ya'ol tzej chke.

⁵ Ajwal Dios, ¿K'a junpa nawi kik'aw awoywal? ¿K'a junpa nawi kuxlan ile chi ktoqow awoywal pacha a'?

⁶ ¡Chpe awoywal chke i tinimit chi kkikoj ti a'ij, chi keta'am ti awach, kkikuxtaj taj xaq kkinataj ti ab'i!

⁷ Man xkikamsaj ma Jacob, xaq xki'an che i rachoch chi pacha jun ja chi wulijnaq.

⁸ Maya utojb'alil kimak i qatit qamam pqawi yoj; ¡Lik juntir chataqa li rutzil ak'ux pqawi man lik oj o pa k'ax!

⁹ Ajwal Dios, chi at Tol qe, ¡Chojato, chojawesaj pa k'ax xaq chakuyu qamak, rumal u'ij i lo'laj ab'i!

¹⁰ Man i winaq chi kkikoj ti a'ij kkib'ij iri chqe: ¿Ipa o wi i-Dios? ¡Chaya ni chqe chi kqil u'anik uk'exel i kamik chke pacha xki'an chke i awajpatan! ¡Xaq i winaq chi kkikoj ti a'ij chketamaj na!

¹¹ Chata ni kitz'onb'enik ajprex chke, xaq cheato ru' i nim laj acho'ab' ni'pa i b'ital chik chke chi kekamsaxik.

¹² Ajwal Dios, cha'ana ni wuqmul uk'exel chke i winaq chi je o chqij chqawach rumal i yo'yanik chi ki'anom chawe;

¹³ yoj, chi oj atinimit, chi oj chij re atzob'ajil, arewi kqatioxij ni chawe, ¡Ronojel ij saq kqab'ixaj ni b'ix chawe!