Salmos 75 - Wuj Pa K'ubultzij

I Dios are atol tzij

¹ Kqatioxij chawe Ajwal Dios, kqatioxij chawe. ¡Kqakuxtaj kqanataj ab'i xaq kqab'ixaj i lo'laj a'ij achomal!

² I Ajwal kub'ij: “Yin xa junpa we xinch'ob'o, kin-an ni suk'ul laj atb'al tzij.

³ Are kyikyat ulew xaq ronojel ni'pa je o chwach, yin kinchapaw ukub'ib'al man ktzaq taj.”

⁴ Keje iri kinb'ij chke ni'pa i kkikoj ki'ij xaq chke i utz ti laj taq winaq: “Lik mi'an nim che iwib', xaq mikoj i'ij;

⁵ lik mikoj i'ij ru' icho'ab' xaq mi'an taq ile chi k'ax kixch'awik.”

⁶ Man i u'atik tzij kk'un ta li ipa kel wi li ij, mitene ipa ktzaq wi, mitene pa tz'inilik jyub' chaqij mitene tzam taq jyub'.

⁷ Man i Dios are Ire atol tzij, are Ire ketamanik pachin kuqajsaj u'ij xaq pachin kuyak u'ij.

⁸ I Ajwal o i tu'b'al ya pu'ab' re i roywal, o i uwa'al uva muqb'am chupam chi k'i uwach xaq ch'am; are kutix b'i i uwa'al uva muqb'am, konojel itzel laj taq winaq chwach ulew kkitu' nu b'i ronojel i uwa'al uva muqb'am le, lik nti jutz'ujaj kkiya kanoq.

⁹ Xwiri yin arewi kintzijoj ni u-Dios ma Jacob xaq kinb'ixaj ni b'ix che;

¹⁰ man Ire kuqajsaj ni ki'ij i itzel laj taq winaq, xwiri kunimarsaj ni ucho'ab' i utz laj winaq.