Salmos 74 - Wuj Pa K'ubultzij

Lapanik ru' i Dios tz'onb'al re uto'ik i tinimit

¹ Ajwal Dios, ¿B'uchak xojawo'taj ronojel ij saq? ¿B'uchak xmi' awoywal chke achij re uwa ata'aj?

² Chk'un atinimit chak'ux chi lik chuxeb'al loq xak'amo, chi xawesaj chwach i k'ax, anb'al atzob'ajil chke, chk'un chak'ux i jyub' Sion ipa at jeqel wi.

³ Chatpet chrilik i wulijsaniki chi lik nti usuk' antalik, ¡I ajch'oj uwulijsam ronojel i lo'laj ak'ijib'al!

⁴ I je ajch'oj chawij kkib'ixaj i b'ix re i ch'akanik pa lo'laj ak'ijib'al; ¡Kikojom chik k'ul chi kuk'ut u'ij kitzob'aj ike,

⁵ puwi i okb'al che i tinimit! Pacha taq je ajsi' pa taq k'achelaj.

⁶ Ru' ikaj xaq ru' ch'ayb'al xki'an mutmut che i tz'alam chi antal chomiq taq retz'b'alil.

⁷ Xkinak' a' che i lo'laj ak'ijib'al, ¡Xkiqajsaj u'ij i ja re riqb'al ib' awu', lik xkiwulijsaj k'a chwach ulew!

⁸ Lik xkich'ob' uchupik qawach; ¡Xkik'at ronojel i jalajuj taq k'ijib'al pa tinimit ipa kqamol wi te'eq qib' chukojik a'ij!

⁹ Kqil ti chik uwach jalajuj taq b'iroxik chi k'utb'al re chi o i Dios qu', nti chik jun profeta, xaq lik qeta'am taj ni'pa ij kuch'ij ile.

¹⁰ Ajwal Dios, ¿K'a junpa nawi kkimayij qayo'yaxik i je ajch'oj chqij? ¿K'a junpa kkimayij ile chi k'ax kech'aw chawij yet?

¹¹ ¿B'uchak to' atz'ulem b'i a'ab' chrilik? ¿B'uchak kawuwaj a'ab' chi lik nim ucho'ab'?

¹² Ajwal Dios, lik ujer loq yet at Wajawinel, yet xeato konojel i winaq chi chwach i jyub' ta'aj.

¹³ Yet xajach uxol i mar ru' acho'ab'; xapaxij kijolom i nimaq taq chikop pa mar.

¹⁴ Xa'an tz'ajtz'ik che kijolom i nim laj chikop Leviatán ub'i, xaq xeaya pkiti' i itzel taq chikop aj pa taq tz'inilik jyub' chaqij.

¹⁵ Yet xa'ano chi xalax li i ya, xb'in i raqana xaq xachaqijsaj i nimaq taq raqana chi lik ketzaj taj.

¹⁶ Awe yet i pa'ij xaq i cha'ab', yet xakub'a i ik' xaq i ij.

¹⁷ Yet xayijb'a ipa ktani wi uchi' i jyub' ta'aj; yet xatkojow i sa'ij xaq i alaj.

¹⁸ Chk'un chak'ux, Ajwal, chi i ajch'oj chawij katuyo'ya, chi xaq i b'uy laj winaq k'ax kch'aw chawij.

¹⁹ ¡Su' mojsach chak'ux! Man lik nti qacho'ab', oj keje pacha i ixkuku, ¡Mojajach pki'ab' i itzel taq chikop!

²⁰ Chk'un atrat chak'ux, man lik nti usuk' i kamsanik pa tinimit uponnaq k'a pa k'isb'al taq rokraq.

²¹ Maya'o chi kqajsax u'ij i jun chi kkamsax pa chak; ¡Cha'ana chi katkib'ixaj i nib'a'ib' xaq i ajaj laj taq winaq!

²² ¡Ajwal Dios, chatwalijoq, chato awib'; chk'un chak'ux chi ij ij kkimayij ti ayo'yaxik i b'uy laj taq winaq!

²³ Msach chak'ux chi lik kesik'in i je ajch'oj chawij, xaq uk'iyarik i kisik' i je qelqel laj taq winaq.