Salmos 67 - Wuj Pa K'ubultzij

Chatkib'ixaj ni konojel i tinimit

¹ Ajwal Dios, chawila ni tob'al qawach, xaq chaya ni utzil chomal pqawi, lik cha'aljinsaj ni a'ij achomal pqawi.

² Man keje ile konojel i nimaq taq tinimit chwach i jyub' ta'aj kketamaj ni urayijb'al ak'ux, xaq i atotajik.

³ Ajwal Dios, chatkib'ixaj ni i tinimit, lik konojel i tinimit chatkib'ixaj na.

⁴ I nimaq taq tinimit chesik'in ni rumal kikotemal, man yet lik suk'ul ni u'anik i atb'al tzij ka'an pkiwi i tinimit, ¡Yet katok'aw utzam chke i nimaq taq tinimit re uwach i jyub' ta'aj!

⁵ Ajwal Dios, chatkib'ixaj ni i tinimit, ¡Lik konojel i tinimit chatkib'ixaj na!

⁶ I ulew wachinnaq; i qa-Dios uya'om utzil chomal pqawi.

⁷ ¡I Dios chuya ni utzil chomal pqawi! ¡Choksax ni u'ij kumal i winaq re ronojel uwach i jyub' ta'aj!