Salmos 63 - Wuj Pa K'ubultzijI Dios are i kub'sanel kik'ux i winaq 1 ¡Wajwal Dios, yet at in-Dios! ¡Lik kin-at inpen chatzukuxik! Man lik at rajwaxik chwe, pacha ulew chi lik kchaqijik nti ya che, nti uk'aslemal. 2 ¡Kwaj awilik pa lo'laj ak'ijib'al, man keje ile kwil acho'ab' xaq a'ij achomal, 3 man i k'axnab'al ak'ux lik mas utz chwach i k'aslemal! Ru' inchi' kinkoj ni a'ij; 4 ronojel ij re ink'aslemal kinb'ixaj ni a'ij, xaq chawach yet kinyak wi in-ab' chutz'onoxik chawe. 5 Lik kkub'i ni ink'ux, pacha i jun chi kuqusij jun nim laj wa'im chi lik jel; xaq inchi' katub'ixaj na ru' nim laj kikotemal. 6 Kok taq a'ab', are inkotz'ol chik, katk'un chink'ux xaq kinok chach'ob'ik; 7 man are Yet kinato. ¡Lik kinkikot chuxe' axik'! 8 Lik che ronojel ink'aslemal kinjek' ti wib' awu'; i a'ab' wiqab'im lik kinro'taj taj. 9 Konojel ni'pa kkaj inkamsaxik, ketzaq nu b'i k'a xejul ke i kamnaq; 10 ¡Kekam ni ru' i ch'ich' chi o uware k'ulala, xaq lik kwor ni pkiqul kumal i nimaq taq utiw! 11 Xwiri i ajawinel kkikot ni rumal i Dios; konojel ni'pa lik kkib'ij pub'i Ire, lik kkib'ixaj ni b'ix, xwiri ni'pa ket'oronik ktz'apix ni kichi' chke. |
© Biblia Achí de Cubulco, Derechos reservados de Sociedad Bíblica de Guatemala
Bible Society in Guatemala