Salmos 61 - Wuj Pa K'ubultzij

Ukub'ib'al k'uxij che utob'al i Dios

¹ Wajwal Dios, chata insik'inik rumal uk'axk'ol i k'ax, ¡Lik chata na wach kintz'onoj chawe!

² Tupu k'a pa k'isb'al rokrik re uwach i jyub' ta'aj in o wi, lik kintz'onoj chawe, man i wanima lik kutij kamik. Chinawesaj chwach i k'ax, chinak'ama b'i puwi jun nim laj ab'aj,

³ man yet at k'ijib'al ipa kinto wi wib'. At keje pacha jun ko laj tak'tik ja ipa kinto wi wib' chwach i ajch'oj chwij!

⁴ Kwaj kinjeqi pa ja re riqb'al ib' awu' ronojel ij saq, chi lik kintotaj chuxe' axik'.

⁵ Yet, Wajwal Dios, atom wach insujum chawe, xaq aya'om i kuxtab'al awe chwe chi kaya chqe yoj ni'pa i kqakoj u'ij ab'i.

⁶ Chaya ni uk'aslemal i ajawinel chi lik naj uwach, lik chk'asi ni k'iyal junab',

⁷ xaq arewi chrajawin ni ru' utzil chomal awe yet. Chachajij ni ru' i k'axnab'al ak'ux xaq ru' i suk'ul laj ak'ux;

⁸ keje ile lik arewi kinb'ixaj ni ab'i, xaq kin-an ni uri ij ij wach insujum chawe.